MFUNUKURO 22 - Chasu New Testament 1967

¹ Kangi akanivonyesha mweta wa mpombe ya nkalamo, wemekenisa sa kiyoo, wekifuma he kila kichumbi cha kifumwa cha Mrungu, na cha Mwana Ng’onji.

² Ghati he nzia mbaha yawo mondo uu na uu wa ula mweta, hekina mti wa nkalamo wegera ntunda mbare ikumi na mbiri, wefunya ntunda jawo kila mweji; na mahungo a uo mti ni a kubanjija vaisanga.

³ Kangi tehekazeketa kiraro chochose narini; na kichumbi cha kifumwa cha Mrungu na cha Mwana Ng’onji kineikaa aho, na vazoro vakwe venemtumikia;

⁴ navo venemvona vusho vwakwe na izina lakwe linevoneka he vizango vyavo.

⁵ Neri tehekazeketa kio narini; kangi tevekareenda taa, neri kianga cha izuva; ambu Mfumwa Mrungu evaangaja, navo venetetia kae na kae.

Msirikijo

⁶ Akaniti, “Viteto ivi ni vya kuitikija na vya idi; na Mfumwa Mrungu wa mpeho ja varoti emtumie malaika wakwe kuvavonyesha vazoro vakwe vila vyeneoka fia.

⁷ Rereha, niza fia; mrela vwedi ni ula egurisha viteto vya vuroti vwa iki kitabu.”

⁸ Nami Yohane nimi nesikie na kuvona ivyo. Aho nekisikia ivyo na kuvivona, nikagwa si, iti nidunkute mozya he maghu a malaika ula enivonyesha ivyo.

⁹ Naye akaniti, “Rereha, usikete huvo; mi ni mzoro mghenji wako, na wa vandughu vako varoti, na wa vala vegurisha viteto vya iki kitabu. Mdunkutie Mrungu!”

¹⁰ Akaniti, “Ivi viteto vya vuroti vwa iki kitabu usivigere isimbiko, ambu igheri lavyo lazengelela.

¹¹ Mkibonda nazike keta kibonda; ejirare nazike kukujiraja; na mkitea nazike keta kitea; na ezerire nazike kukuzerija.

¹² Rereha niza fia, na mhako wangu nirena nawo kumriha kila mntu sa vuntu ndima yakwe yeikee.

¹³ Mi ni Alfa na Omega, kivoko na msio, wa kuvoka na wa kukenjija.”

¹⁴ Varela vwedi ni vala veoja suke javo, vakundijwe kutonga he uo mti wa nkalamo, na kuingia he mivera yawo vafikie muzi.

¹⁵ Uko nze hena maguro, na vasavi, na vareshinda, na vakomi, na varetasa mirungu, na kila mntu ekunda mongo na kuuketa.

¹⁶ “Nimi Yesu nemtumie malaika wangu kumutetia vuonwa kwa ivyo he makanisa. Mi nimi ne kikolo na mbereko yakwe Davidi; ila ngalakere yeangaja chaheyavo.”

¹⁷ Na Mpeho na Mwai elondolwa vati, “Nzoo!” Na ula esikia nati, “Nzoo!” Na ula ena nkiru naze; na ula eenda, naghuhe mpombe ya nkalamo sutwa.

¹⁸ Nimtetia vuonwa kila mntu esikia viteto vya vuroti vwa iki kitabu, mntu wowose eneviongeja, Mrungu enemwongejija ao mabigho eandike he iki kitabu.

¹⁹ Na kila mntu evusha chochose he viteto vya vuroti vwa iki kitabu, Mrungu enemvushija ifungu lakwe he ula mti wa nkalamo, na he ula muzi wezerire, ewo mburi jawo jeandikwe he iki kitabu.

²⁰ Ula etetia ivi vuonwa, eti, “Yee, niza fia.” Amen. Nzoki Mfumwa Yesu.

²¹ Mbonea ya Mfumwa Yesu na iikae na unywi vose. Amen.