MFUNUKURO 21 - Chasu New Testament 1967

Wanga shaa na isanga ishaa

¹ Kangi nikavona wanga shaa na isanga ishaa; ambu wanga ya kuvoka na isanga la kuvoka, vyakenja kuvecha, neri tehena bahari kangi.

² Nami nikavona ula muzi wezerire, Yerusalemu mshaa, wekisea kufuma uko wanga ha Mrungu, weringanywe sa mwai elondolwa ehambiiwe mme wakwe.

³ Nikasikia izii ibaha lefuma he kila kichumbi cha kifumwa, lekiti, “Rereha kikalo cha Mrungu hamwe na vantu vakwe, na Mrungu mwenye eneikajanya navo.

⁴ Naye enehanguja kila isoji he meso avo, neri kifwa tekikazevoneka narini, kana ntiro, kana kiio, kana kusulumira, tekukazevoneka wa; ambu vila vya kuvoka vyavecha.”

⁵ Na ula eikaie kila kichumbi cha kifumwa, akati, “Rereha, naghosha vyose vishaa.” Akaniti, “Andika iti viteto ivi ni vya kuitikijwa na vya idi.”

⁶ Akaniti, “Vyakoloka. Mi ni Alfa na Omega, wa kuvoka na wa kukenja, ninemunka ula ena nkiru, mpombe ya kisima cha nkalamo, sutwa.

⁷ Ula enevota, enepala ivyo; nami nineoka Mrungu wakwe, naye eneoka mwana wangu.

⁸ Mira vafole na vala vesina mwitikijo, na vevihija, na vakomi, na vareshinda, na vasavi, na vala vetasa mirungu, na vamongo vose, ifungu lavo ni he ila ndiva yeaka moto na kibiriti. Icho nicho kifwa cha keri.

Yerusalemu wa uko wanga

⁹ Hakaza mmwe wa vala vamalaika mfungate veihete vila vidende mfungate vyeizue ala mabigho mfungate a mkengelejo, naye akateta nami, ekiti, “Nzo na kunu, nami ninekuvonya ula mwai wa mlondolo, mwai wa Mwana Ng’onji.

¹⁰ Akaniti kimpeho na he ntuvi mbaha ndeza, akanivonyesha ula muzi wezerire, Yerusalemu, wekisea kufuma uko wanga hakwe Mrungu.

¹¹ Wena ngazo ya Mrungu, kangi kianga chawo chefwanane na ibwe la zora mbaha, sa kabwe ka yaspi, keshononote sa kiyoo;

¹² wekina lukuta lubaha, lueza, lwena mivera ikumi na miri, na he ila mivera vmalaika ikumi na mbiri ja vana Israeli.

¹³ Mondo wa kibuka izuva mivera mitatu; na mondo wa ughu mivera mitatu; na mondo wa ishi mivera mitatu; na mondo wa kigwa izuva mivera mitatu.

¹⁴ Na lukuta lwa muzi lwekina misingi ikumi na miri, na he ila misingi mazina ikumi na meri a jila ntume ikumi na veri va Mwana Ng’onji.

¹⁵ Ula ekiteta nami ekihete mjungu wa dhahabu, nesa aidime kupima uo muzi, na mivera yawo, na lukuta lwalo.

¹⁶ Na ula muzi una mpembe ne, vueza vwavo va varamu vweringane. Akapima muzi na ula mjungu; ukakoloka maili kiku kimwe na maghana masano; vueza vwawo na vuaramu, na kueha na wanga weringane.

¹⁷ Akapima lukuta lwalo, lukakoloka mikono ighana na makumi mane na mine, he kiringanyo cha kimntu, nikwo kuti cha malaika.

¹⁸ Na mijengire ya lukuta lwawo neki ya yaspi, kangi ula muzi neki wa dhahabu yedisha, sa kiyoo cheelile.

¹⁹ Na misingi ya lukuta lwa muzi, yekihambiwe na mabwe a zora mbaha a kila mbare. Msingi wa kuvoka neki wa yapsi; wa keri neki wa safiri; wa katatu neki kalkedoni; wa kane neki zumaridi;

²⁰ wa kasano neki sardoniki; wa katandatu neki yakiki; wa kafungate neki krisoliti; wa kanane neki zabarajadi; wa kenda neki topasi; wa ikumi neki krisopraso; wa ikumi na kamwe neki kiakinto; wa ikumi na keri neki ametisto.

²¹ Na ila mivera ikumi na miri ni lulu ikumi na mbiri; kila mvera ni lulu mwe. Kangi nzia ya muzi neki dhahabu njenye, yevona sa kiyoo.

²² Nami sivonie nyumba ya mtaso hewo; ambu Mfumwa Mrungu Mwenye nzinya jose, na Mwana Ng’onji, nivo nyumba ya mtaso hewo.

²³ Uo muzi teuenda izuva kana mweji kuuangaja, ambu ngazo ya Mrungu iugera kianga, na taa yawo ni Mwana Ng’onji.

²⁴ Vaisanga venetongia he kianga chawo, na vafumwa va isanga veete ngazo yavo hewo.

²⁵ Na mivera yawo teikafingwe he musi neri; ambu aho tehena kio.

²⁶ Navo veneete ngazo na shima ja vaisanga hewo.

²⁷ Na hewo tehekaingie kintu chochose ekisoka, kana ula eronga vyevihija na mongo, mira nire vala veandikwe he kitabu cha nkalamo cha Mwana Ng’onji.