MFUNUKURO 20 - Chasu New Testament 1967

Shetani echungwa miaka kiku

¹ Kangi nikavona malaika ekisea kufuma uko wanga, ena funguo ya he gehena, na myororo m’baha he mkono wakwe.

² Akagura lila ijoka, nyoka ila ya kae, eyo Mrenge na Shetani, akaichunga miaka kiku;

³ akamvirita noko he gehena, akamfingia, akavika kisimbiko wanga heyo, nesa asizeisha kangi vaisanga mhaka ila miaka kiku ikoloke; nyuma kimtara achunguiwe wa kamtungo kadori.

⁴ Kangi nikavona vichumbi vya kifumwa, vakaviikaia, navo vakainkwa kuchwa mburi; nami nikavona ngoro ja vala vechwiwe mitwi vuntu vwa vuonwa vwakwe Yesu, he vuntu vwa kiteto cha Mrungu, na vala vesidunkutie ila nyama, kana fwanyanyi yayo neri kughuha lula luvengo he vizango vyavo, neri he mikono yavo; navo vakaketa moo, vakatetia hamwe ne Kristo miaka kiku.

⁵ Na vala vangi vefwie teveketie moo mhaka miaka kiku ikoloke. Ukwo nikwo kuvuka kwa vefwie kwa kuvoka.

⁶ Mrela vwedi na ezerire, ni ula ena ifungu he kuvuka he vefwie ka kuvoka; he avo kifwa cha keri tekina nzinya; mira veneoka vatasi vakwe Mrungu na vakwe Mrungu na vakwe Kristo, navo venetetia hamwe naye iyo miaka kiku.

Shetani echungwa, nkondo ya msirikijo

⁷ Na iyo miaka kiku yesikia Shetani enechunguiwa, afume he kichungo chakwe;

⁸ naye enefuma kuvakengera vaisanga veho he myondo mine ya isanga, Gogi na Magogi, kuvavunganya he nkondo, evo itaro e sa mshangagha wa he bahari.

⁹ Vakakwea wanga he vuaramu vwa isanga, vakajivirija mararo a vezerire, na ula muzi wekundiwe. Moto ukasea kufuma uko wanga, ukavala.

¹⁰ Na ula Mrenge, ula mzavakengera, akaviritwa na he ila ndiva ya moto na kibiriti, hantu ila nyama yeho na ula mroti wa mongo; navo venerishwa vwasi kio na msi mhaka kae na kae.

Kuvuka kwa vefwie na mlaho wa mkengelejo

¹¹ Nikavona kichumbi cha kifumwa, kibaha, kijewa, na ula ekiikaie; si na wanga vikaaha mozya ya vusho vwakwe, neri hantu havyo teherevoneka.

¹² Nikavona vefwie vabaha na vadori, veimuke mozya ya icho kichumbi cha kifumwa; na vitabu vikatambarurwa; na kitabu kingi kikatambarurwa, echo cha nkalamo; na avo vefwie venechwiwa mburi na ivyo veandikwe he vila vitabu, kiringanyo cha mihiro yavo.

¹³ Bahari ikafunya vefwie vekiho heyo; kifwa na uko he nkoma vikafunya vefwie vekihoho, vakalahwa kila mntu kwa kiringanyo cha mihiro yakwe.

¹⁴ Kifwa na he nkoma vikaviritwa na he ila ndiva ya moto. Icho nicho kifwa cha keri, echo iyo ndiva ya moto.

¹⁵ Na kakicha hena mntu esivoneke iti eandikwe he kitabu cha nkalamo, akaviritwa na he ila ndiva ya moto.