MFUNUKURO 2 - Chasu New Testament 1967

Barua he kanisa la Efeso

¹ “He malaika wa kanisa yeho uko Efeso andika: Ivi vitetwa ni ula egurire jila ntondo mfungate he mkono wakwe wa kume, ula etongia ghati ya vila vinara mfungate vya dhahabu.

² Nemanyije ndima jako, na vwasi vwako, na kugumirija kwako, na iti tuidima kutonjanya na vala vavivi, kangi wevagheshije vala vekuitanga ntume, uko sivwo, ukavamanya iti ni vamongo.

³ Kangi wegumirije he kurishwa vwasi vuntu vwa izina langu, neri tughatae.

⁴ Mira nina mburi nawe, iti washigha lukundo lwako lwa kuvoka.

⁵ Iki ana kumbuka hantu wegwie; uchwe mti, ukete mirongire ya kuvoka. Mira wekisaketa huvo, nineza hako, nami ninevusha kinara chako hantu hacho, wekisachwa mti.

⁶ Mira cho wena ni iti uvihiwa ni mirongire ya Vanikolai, eyo nami neivihiwe.

⁷ Ula ena isikio, nasikie kiteto iki echo Mpeho evwira makanisa. Ye evota, ninemunka kula ntunda ja mti wa nkalamo, weho he Paradiso ya Mrungu.

Barua he kanisa la Smirna

⁸ “He malaika wa kanisa yeho uko Smirna andika: Ivi vitetwa ni ula e wa kuvoka na wa kukenjija, ula ekifwie, kangi akaketa moo.

⁹ Nemanyije vwasi na vusovu vwako mira u mzuri, nemanyije na viravo vya avo veti iti ni Vayuda, uko sivwo, mira ni sinagogi yakwe Shetani.

¹⁰ Usifoleke wekinerishwa vwasi; rereha, uo Shetani enevagera vakumwe venyu hena kichungo nesa mugheshwe, na unywi munevona vwasi misi ikumi. Uoke mkitengo mhaka kufwa, nami ninekunka ngoki ya nkalamo.

¹¹ Ula ena isikio, nasikie kiteto iki echo Mpeho evwiraa makanisa. Ye enevota tekafikiwe ni mavwasi a kifwa cha keri.

Barua he kanisa la Pergamo

¹² He malaika wa kanisa yeho uko Pergamo andika: Ivi vitetwa ni ula ena na uo mhandwi wekehe, myondo yose.

¹³ Nemanyije hantu weikaa niho hena kichumbi cha kifumwa chakwe Shetani; nawe wegurishe izina langu, neri tukanie mwitikijo wangu, hata he misi yakwe Antipa mwonwa wangu, mkitengo wangu, ekomiwe ghati henyu, hala hantu Shetani eikaa.

¹⁴ Mira nina viteto vighere hewe, ni hala wena vantu vegurire michejire yakwe Bileamu, eye ekimchejije Balaki avike kikwangwalo he Vaisraeli, iti vale vintu vyeinkijwe vya mitaso he mirungu, na kushinda.

¹⁵ Nirehuvo, hata we urena vantu vegurire michejire ya Vanikolai.

¹⁶ Heicho chwa mti; na wekisachwa mti, nineza hako fia nineomana navo na uo mhandwi wa momo wangu.

¹⁷ Ula ena isikio, nasikie kiteto iki echo Mpeho evwira makanisa. Ye evota ninemghavia ila mana yevisiwe ale, kangi ninemunka ibwe ijewa, na wanga he ilo ibwe heandikwe izina ishaa lesimanywa ni mntu esire ula elighuha.

Barua he kanisa la Tiatira

¹⁸ He malaika wa kanisa yeho uko Tiatira andika: Ivi vitetwa ni Mwana wa Mrungu, ula ena meso sa luverevere lwa moto, na maghu akwe eikee sa ng’andu yezerijwe chwe:

¹⁹ Nemanyije ndima jako na lukundo na mwitikijo na mihiro na migumirijije yako, na iti ndima jako jakenjija jakela jila ja kuvoka.

²⁰ Mira nina kintu kimwe hewe, iti umkundija ula mche Izebeli, eye ekuitanga mroti na kuvacheja vazoro vangu na kuvatesha, nesa vashinde na kula vintu vyeinkijwe vya kutasa mirungu.

²¹ Nami nemunkie kiaze cha kuchwa mti, mira techwie mti he uko kushinda kwakwe.

²² Rereha, ninemvirita he kitanda hamwe na vala veshinda naye, vavone vwasi vubaha, vekisachwa mti he mihiro yavo;

²³ nami ninekoma vana vakwe kwa kifwa. Na makanisa ose enemanya iti nimi nesungia mpigho na ngoro. Nami ninemunka kila mmwe wenyu kiringanyo cha mihoro yakwe.

²⁴ Mira nimuvwira unywi va kumwe mweho Tiatira, vose vesina na iyo michejire, vesimanyije viavya vyakwe Shetani, sa vuntu veti, ‘Sikamivikie mjigho ungi.’

²⁵ Esire iti, gurisha nezo kila wena nacho, mhaka aho nekineza.

²⁶ Ula evota, na kurinda mirongire yangu mhaka mginto, ninemunka nzinya ya kuvatetia vaisanga,

²⁷ naye enevarisha na nzata ya kighera, sa vuntu ntanu ja ivumba jerughunyuwa, sa vuntu nami neghuhie he Vava wangu.

²⁸ Nami ninemunka ila ngalakere.

²⁹ Ula ena isikio, nasikie kiteto iki echo Mpeho evwira makanisa.