MFUNUKURO 19 - Chasu New Testament 1967

Vuonwa uko wanga na mlondolo wa Mwana Ng’onji

¹ Ivi vyekivecha nikasikia izii sa izii la mavungano majinki, izii ibaha uko wanga, lekiti, “Haleluya; lukio, na ngazo na nzinya ni vya Mrungu wetu;

² ambu milaho yakwe ni ya idi na ya kitea; ambu amlaha ula mche mreshinda m’baha ekondanye isanga kwa mashindo akwe, na kuchwa sire he sakame ya vazoro vakwe he mkono wakwe.”

³ Vakateta ka keri, “Haleluya. Na moshi wawo utururika na wanga kae na kae.”

⁴ Na vala vaghosi makumi meri na vane, na jila nyama ne, vakadunkuta, kumtasa Mrungu eikaie kila kichumbi cha kifumwa, vekiti, “Amen, Haleluya.”

⁵ Izii likafuma he kila kichumbi cha kifumwa, lekiti, “M’bumijeni Mrungu wetu, unywi vazoro vakwe vose, unywi mwemfoleka, vadori na vabaha.”

⁶ Nikasikia izii sa izii la mavungano majinki, na sa kughona kwa mpombe mbaha, na sa mrurumo wa kikwakwara cha nzinya, lekiti, “Haleluya! ambu Mfumwa Mrungu Mwenye nzinya jose aghuha vufumwa.

⁷ Tuizihirwe, tung’are, tumunke shima yakwe; ambu mlondolo wa mwana Ng’onji wafika, na mwai wakwe naye akuringanya.

⁸ Naye ainkwa kudoka suke nyewa yedi yemekenisa, yezerire;” ambu suke iyo nyewa ni mihiro ya kitea ya vezerire.

⁹ Naye akati, “Andika: Varela vwedi ni vala verarikwe he mbao ya mlondolo wa Mwana Ng’onji.” Akaniti, “Viteto ivi ni viteto vya idi vyakwe Mrungu.”

¹⁰ Nami nikagwa mozya ya maghu akwe, nesa nimdunkutie, akaniti, “Rereha, usikete huvo; mi ni mzoro mghenji wako na wa vandughu vako vena na vuonwa vwakwe Yesu. Mdunkutie Mfungu! ambu vuonwa vwakwe Yesu nivwo mpeho wa vuroti.”

Kristo mvoti

¹¹ Kangi nikavona wanga hejuvuke, rereha farasi nyewa, na ula evekiwe niyo eitangwa Mkitengo na wa Idi, naye echwa masa na kubigha nkondo kwa kitea.

¹² Na meso akwe neki sa luverevere lwa moto, na he mtwi wakwe ena ngoki nyingi; kangi ena izina leandikwe, hesina mntu elimanyije esire ye mwenye.

¹³ Naye edokie suke yeshofekwe he sakame, na izina lakwe eitangwa, “Kiteto cha Mrungu.”

¹⁴ Na marivati eho uko wanga vakamratera, vevekiwe ni farasi nyewa na kudokwa suke nyewa jedisha.

¹⁵ Na he momo wakwe hefuma mhandwi wekehe, nesa ateme nawo vaisanga. Naye enevarisha na nzata ya kighera, naye evata ikamio la mvinyo wa oro ya kuvihiwa kwa Mrungu Mwenye nzinya jose.

¹⁶ Naye ena izina leandikwe he suke yakwe na he fae yakwe, “MFUMWA WA VAFUMWA NA M’BAHA WA VABAHA.”

Kukondwa kwa vanzo vakwe

¹⁷ Kangi nikavona malaika eimuke he izuva; akaamberija na izii ibaha ekivwira madeghe ose eparatika wanga, “Nzoni muzane he mbao ya Mrungu e mbahisha;

¹⁸ nesa mule nyama ja vafumwa, na nyama ja vaakida vabaha, na nyama ja venye nzinya, na nyama ja farasi na ja vala vevekiwe nijo, na nyama ja vantu vose, nkombolwa na vazoro, vadori na vabaha.

¹⁹ Nikavona iyo nyama na vafumwa va isanga, na marivati avo, vezomane kuomana na ula eikaie ila farasi hamwe na marivati akwe.

²⁰ Ila nyama ikagurwa hamwe na ula mroti wa mongo, ula eketie maluvengo mozya heye, eo eishije nao vantu vala veghuhie kila kisimbiko cha iyo nyama, na vala vedunkutie fwanyanyi yayo; avo veri vakataghwa vereho he ila ndiva ya moto yeaka kwa kibiriti.

²¹ Na vala vangi vakakomwa na mhandwi wa ula eikaie ila farasi, mhandwi wefuma he momo wakwe. Na madeghe ose akaighuta nyama javo.