MFUNUKURO 17 - Chasu New Testament 1967

Kuvona kimpeho mche eshinda na nyama

¹ Hakaza mmwe wa val vamalaika mfungate, vehete vula vudende mfungate, akateta nami, ekiti, “Nzo na kunu, ninekuvonyesha mlaho wa ula mche mreshinda m’baha eikaa he mpombe nyingi;

² eye vafumwa va masanga veshindie naye, na vala vetue he masanga veengejwa ni mvinyo wa mashindo akwe.”

³ Akanitika kimpeho noko nyika, nikavona mche evekiwe ni nyama nkundu twa, yyeizue mazina na falaja, yena mitwi mfungate na mpembe ikumi.

⁴ Kangi ula mche ekidokiwe suke ja zurungi na nkundu, ehambiwe na dhahabu, na mabwe ena zora mbaha na lulu, naye ekiihete kikombe cha dhahabu he mkono wakwe, cheizue mavihijo, na maikwe a mashindo akwe.

⁵ Na he kizango chakwe ekina izina leandikwe la mpiso, “BABELI M’BAHA, MLALA WAVO VARESHINDA NA MAVIHIJO A II SI.”

⁶ Nikamvona ula mche eengee sakame ya vezerire na sakame ya vaonwa vakwe Yesu. Nikinamvone nikamaka kimako kibaha.

⁷ Na ula malaika akaniti, “Hanini wemaka? Ninekuvwira mpiso ya uu mche, na ii nyama yemtikie, yena mitwi mfungate, na mpembe ikumi.

⁸ Ila nyama weivonie yekihoho, nayo teiwaho, nayo yekuringanye kukwea kufuma he gehena itonge he kukondika. Na vala vetue he isanga vesiandikwe mazina avo he kitabu cha nkalamo, too aho si ii yekidungwa kurumbwa, venemaka vekivona ila nyama, iti yekihoho, nayo teiwaho, nayo inereoka aho.

⁹ Aho niho hena kucha kwena kiugho. Iyo mitwi mfungate ni ntuvi mfungate uo mche ejiikaie,

¹⁰ najo ni vafumwa mfungate. Vasano vakenja vakenja kugwa, na mmwe echeri aho, na ula ungi tenaza. Naye ekiza kimtara aikae kamtungo kadori.

¹¹ Na ila nyama yekiho kangi teiwaho, nayo niyo ya kanane, nayo niyo mwe na jila mfungate, nayo itonga he kukondika.

¹² Na jila mpembe ikumi wejivonie ni vafumwa ikumi, evo vesinaghuha kifumwa, mira veghuha vubaha sa vafumwa, hantu ha saa mwe hamwe na ila nyama.

¹³ Ava mburi yavo ni mwe, navo veinka ila nyama nzinya yavo na nguju javo.

¹⁴ Ava venelwana na Mwana Ng’onji, na Mwana Ng’onji enevazima, ambu ye ni Mfumwa wa vafumwa, na M’baha wa vabaha; na vala ena navo nivo veitangwe, na vesaghurwe, na vakitengo.”

¹⁵ Kangi akaniti, “Ila mpombe weivonie, hantu ula mche eshinda eikae si, ni malukolo na mavungano, na vaisanga, na vitetire.

¹⁶ Na jila mpembe ikumi wejivonie, na iyo nyama, ijo jinemvihiwa ula mche mreshinda, najo jinemghumba na kumshigha kituhu, jinemla nyama jakwe; jinemshota atikimire he moto.

¹⁷ Ambu Mrungu ejiinkie he ngoro jajo kuringanyanya mburi yakwe, na kuchwa mburi mwe, na kuinka ila nyama vufumwa vwajo mhaka viteto vya Mrungu vikoloshwe.

¹⁸ Na ula wemvonie ni ula muzi m’baha wena vufumwa vwa kutetia vafumwa va si ii.”