MFUNUKURO 13 - Chasu New Testament 1967

Kuvona nyama kimpeho

¹ Nikaimuka he mshangagha wa bahari. Niho nikavona nyama yekifuma he bahari, yena mpembe ikumi na mitwi mfungate, na he jila mpembe hena ngoki ikkumi, kangi na he mitwi yayo hena mazina a falaja.

² Na ila nyama neivonie yekifwanane na mpishi, na maghu ayo neki sa a bilobilo, na momo wayo ni sa momo wa simba; lila ijoka likaiinka nguju yalo, na kichumbi chalo cha kifumwa na nzinya mbaha.

³ Nikavona mtwi wayo mmwe weikee sa wevinyijwe kuvinywa kwa kifwa kikabanda; si yose ikamaka ila nyama.

⁴ Vakadunkutia lila ijoka ni hala lainka ila nyama nzinya yalo; kangi vakadunkutia ila nyama, vekiti, Ni anu efwanane na ii nyama? Kangi ni ani eveiwa kuigera nkondo?”

⁵ Nayo ikainkwa momo weteta viteto vibaha na vya kufalaja. Ikainkwa nzinya ya kuhira ndima yayo mieji makumi mane na miri.

⁶ Ikavusha momo wayo ikamdavura Mrungu na kurara izina lakwe na kikalo chakwe, na vala veikaa uko wanga.

⁷ Kangi ikainkwa kuketa nkondo na vezerire na kuvazima, ikainkwa nzinya he kila mbari, na malukolo na vitetire, na he vaisanga.

⁸ Na vantu vose veho he isanga veneidunkutia, kila mntu izina lakwe lesiandikwe he kitabu cha nkalamo cha Mwana Ng’onji ekomiwe too kidungo cha si ii.

⁹ Mntu ena masikio nasikie.

¹⁰ Mntu ekighuha mitahe enetahwa. Mntu ekikoma na mhandwi, kimtara kukomwa na mhandwi. Aho niho hena kugumirija na mwitikijo wa vezerire.

Kuvona nyama ingi kimpeho

¹¹ Kangi nikavona nyama ingi yefuma he isanga; nayo yena mpembe mbiri sa mwana ng’onji, ikateta sa ijoka.

¹² Nayo yerena nzinya sa ila nyama ya kuvoka. Nayo ikaghosha ii si na vetue heyo vose kudunkutia ila nyama ya kuvoka, eyo yebandie kila kionda chayo cha kifwa.

¹³ Nayo iketa maluvengo mabaha hata kugusha moto kufuma uko wanga ugwe na he isanga mozya he vantu.

¹⁴ Nayo ivahosha vala veikaa he isanga kwa ala maluvengo yeinkiwe kuaketa mozya ya ila nyama, ekivavwira vala veikaa he isanga vaharehie ila nyama sanamu, ila yekina kionda cha mhandwi nayo ikabanda.

¹⁵ Ikainkwa kugera muho he fwanyanyi ya ila nyama, nesa ila fwanyanyi ya nyama itete, na kuvaghosha vala vose vesidunkutia fwanyanyi ya ila nyama vakomwe.

¹⁶ Nayo ivaghosha vose vadori na vabaha, vazuri na vakiva, nkombolwa na vazoro, vavikwe luvengo he mkono wavo wa kume, kana he vizango vyavo;

¹⁷ kangi iti mntu wowose asiidime kuzora kana kutaghija, esirena lula luvengo, ni kuti, izina la ila nyama, kana itaro la izina layo.

¹⁸ Aho niho ha kiugho. Ula echee nadunganye itaro la iyo nyama; ambu ni itaro la kimntu. Na itaro layo ni maghana mtandatu na makumi mtandatu na mtandatu.