MFUNUKURO 1 - Chasu New Testament 1967

Kivokio na ngezya

¹ Mfunukuro wakwe Yesu Kristo, einkiwe ni Mrungu avavonyeshe vazoro vakwe vila vyenetara kuoka kwa fia; naye akatuma kwa mkono wa malaika akamvonyesha mzoro wakwe Yohane,

² eye etetiie kiteto cha Mrungu vuonwa; na vuonwa vwakwe Yesu Kristo, he vila vyose evivonie.

³ Mrela vwedi ni ula esoma na vala vesikia viteto vya uvu vuroti, na kugura vila vyeandikwe aho: ambu igheri liho hafuhi.

⁴ Yohane, ha ala makanisa mfungate eho uko Asia: Mbonea iikae na unywi na mporere yefuma he ula ewaho, na ekiwaho, na eneza; na yefuma he Mpeho mfungate veho mozya he kichumbi chakwe cha kifumwa;

⁵ kangi yefuma he Yesu Kristo, mwonwa mkitengo, mzamoghwa wa kuvoka wa vefwie, na m’baha wa vafumwa va ii si. Ula etukundie na kutuoja mabanu etu he sakame yakwe,

⁶ na kutughosha tuoke vufumwa vwa vatasi he Mrungu, naye ni Vavee; ngazo na vubaha ni vwakwe Ye kae na kae. Amen.

⁷ Rereha, eneza na majumbi; na kila iziso linemvona, na vala vekimsomie; na mbari jose ja ii si jinechwa ntiro he vuntu vwakwe. Hevae, Amen.

⁸ Mi ni Alfa na Omega, wa kuvoka na wa kukenjija, ni Mfumwa Mrungu eti, ula eho na ekiwaho, na eneza, Mwenye nzinya jose.

Kuvonyeshwa Mwana wa Mrungu kimpeho

⁹ Mi Yohane, mndughu wenyu na ena vumwe na unywi he vwasi na vufumwa na kugumirija kwakwe Yesu Kristo, nekiho he kirua cheitangwa Patmo, he vuntu vwa kiteto cha Mrungu, na vuonwa vwakwe Yesu.

¹⁰ Nekiho Kimpeho, msi wa Mfumwa; nikasikia izii ibaha uko nyuma he mi, sa izii la igunda,

¹¹ lekiti: “Ivi wevona viandike he kitabu, uvitume he ala makanisa mfungate: Efeso, na Smirna, na Pergamo, na Tiatira, na Sardi, na Filadelfia, na Laodikia.

¹² Nikagharuka iti nivone lila izii letetie nami. Na nekigharuka, nikavona vinara vya taa mfungate vya dhahabu;

¹³ na ghati he vila vinara nikavona ye, efwanane na Mntu, edokie suke yeseie mhaka he mavato, kangi echungiwe na ngana ya dhahabu he mpafu.

¹⁴ Mtwi wakwe na nywii jakwe neki nyewa sa mavoa majewa, sa chasheru; na meso akwe sa luverevere lwa moto;

¹⁵ na maghu akwe efwanane sa ng’andu yezerijwe he ng’anzo; na izii lakwe leikee sa kughona kwa mpombe nyingi.

¹⁶ Naye ekiihete ntondo mfungate he mkono wakwe wa kume; na mhandwi wekehe myondo yose, wekifuma he momo wakwe; kangi vusho vwakwe vweikee sa izuva lemekenisa na nzinya jalo.

¹⁷ Nami nekinamvone, nikagwa he maghu akwe sa mntu efwie. Akanivikia mkono wakwe wa kume, ekiti, “Usifoleke, Mi ni wa kuvoka na wa kukenjija,

¹⁸ na ula eho moo, nami nekifwie, mira rereha niho na moo kae na kae. Nihete funguo ja kifwa na ja uko he nkoma.

¹⁹ Iki ana andika ivyo wevivonie, na ivyo vyewaho, na vila vyenezavoneka uko nyuma ya ivyo.

²⁰ Mpiso ya jila ntondo mfungate wejivonie he mkono wangu wa kume, na ya vila vinara mfungate vya dhahabu: Jila ntondo mfungate ni vamalaika va ala makanisa mfungate; na vila vinara mfungate ni makanisa mfungate.