MATAYO 9 - Chasu New Testament 1967

Kubanja eholoje

¹ Akaingia he ngilawa, akakelanya, akafika he muzi wavo.

² Niho vakamwetie muwaji eholoje, eshinjie he kitanda. Yesu ekivona mwitikijo wavo, akamti ula muwaji eholoje, “Tundana ngoro mwanangu, washighiwa mabanu ako.”

³ Niho vaandiki kumwe vakadunganya he ngoro javo kuti, “Uu emfalaja Mrungu.”

⁴ Yesu naye ekimanya madunganyo avo, akavati: “Hanini mwedunganya mburi mbivi he ngoro jenyu?

⁵ Hama kijangu ni kihi, ni kuti, ‘Washighiwa mabanu ako,’ kana ni kuti, ‘Vuka utonge?’

⁶ Mira nesa mumanye iti Mwana wa Mntu ena nzinya kunu he si ii ya kushighia mabanu,” akamti ula eholoje, “Vuka, tika kitanda chako, ughotoke na kaa hako.”

⁷ Akavuka, akaghotoka na kaa hakwe.

⁸ Mavungano vekivona huvo vakafoleka, vakamkaza Mrungu eye evainka vantu nzinya yeringane huvo.

Mwitango wakwe Matayo

⁹ Yesu ekivecha kufuma aho, akavona mntu eikae he nyumba ya kughuhia kodi, eitangwa Matayo, akamti, “Niratera!” Akavuka akamratera.

¹⁰ Aho eikae si he nyumba iti ale kijo, vareghuha kodi vajinki na vabanu vakaza, vakaikaa si hamwe ne Yesu na varateri vakwe.

¹¹ Vafarisayo vekivona, vakavati varateri vakwe, “Hanini Mcheji wenyu ela hamwe na vareghuha kodi na vabanu?”

¹² Naye ekinasikie, akavati, “Vala vesiwaa teveenda mghanga, esire vala vewaa.

¹³ Mira tongani mukucheje iti kitize kila kiteto cheti, ‘Cho neenda ni mbonea, neri si itasi.’ Ambu sizie kuitanga venye kitea, esire vabanu.”

Kukuima

¹⁴ N’ndeho varateri vakwe Yohane vakamswia, vakamti, “Hanini uswi na Vafarisayo twekuima, mira varateri vako vesikuima?”

¹⁵ Yesu akavati, “Vala verarikwe he mlondolo, veidimaze kuhomborera verena na mwenye mlondolo? Mira heneza misi mwenye mlondolo enevushwa, niho venekuima.

¹⁶ Tehena mntu egera ndame shaa he suke yesakae, ambu ila ndame yegerirwe inechwa ila suke izike danduka.

¹⁷ Neri tevegera luhwa he masagha esakae, kakicha vekiketa huvo, masagha ebajika, na mawa aitike, masagha akondike. Mira vegera luhwa he masagha mashaa, niho vyose vyekia.”

Mwana wa kiche wakwe Yairo na mche mwaji wa kugavukana

¹⁸ Echerivavwira ivyo, hakaza Mchili mmwe, akamdunkutia, ekiti, “Mwanangu wa kibora arachika moo iki huvu, mira nzo umvikie mkono wako, enekia.”

¹⁹ Yesu akavuka akamratera hamwe na varateri vakwe.

²⁰ Hekina mche ewaie vuwaji vwa kugavukana miaka ikumi na miri, akamzia uko nyuma, akakunta mlingo wa suke yakwe,

²¹ ambu edunganye he ngoro yakwe kuti, “Nekikunta du suke yakwe, ninebanda.”

²² Yesu akagharuka akamvona, akamti, “Tundana ngoro, we mwana wa kiche, mwitikijo wako wakukija.” Kuvokia saa ila ula mche akabanda.

²³ Yesu ekifika he nyumba ya ula Mchili, akavona varebigha mitoriro na luvungano vekichwa ntiro.

²⁴ Akavati, “Vukani aha, ambu uu m’bora tefwieye, eteshinjia;” vakamseka mno.

²⁵ Mira luvungano lukinafunywe, akaingia, akamgura ula m’bora mkono, akaimuka.

²⁶ Ii mburi ikagisha he lila isanga lose.

Matuntu veri

²⁷ Yesu ekivecha kufuma aho, akaraterwa ni matuntu veri vekiitangisha na wanga, vekiti, “E, Mwana Davidi, tuvoneie.”

²⁸ Ekiingia he nyumba, vala matuntu vakamswia; Yesu akavati, “Mweitikije iti niidima kuketa icho?” Vakamti, “Yee Mfumwa.”

²⁹ Niho akakunta meso avo, akati, “Muketiwe sa vuntu mweitikije.”

³⁰ Meso avo, akatambaruka. Yesu akavakokontia ekiti, “Rerehishani, hasikete mntu neri mmwe ekimanya.”

³¹ Mira vakafuma, vakamanyisha mburi jakwe ha lila isanga lose.

Muntu ena mpepo esiidima teta

³² Aho avo vekifuma, vakamwetie mntu esiidimateta, ena mpepo.

³³ Ila mpepo ikinafunywe, niho ula esiidimateta akateta; mavungano vakakugha, vekiti, “Narini icho tekinavoneka he Israeli.”

³⁴ Mira Vafarisayo vakati, “Efunya mpepo kwa nzinya ya m’baha wa mpepo.”

Kristo eondia vantu

³⁵ Yesu ekijunguluka he mizi yose na vumuzi, ekicheja he sinagogi javo na kubirikira Mburi Yedi ya vufumwa, na kubanja kila vuwaji na vusoka vwa kila mbare.

³⁶ Ekivona mavungano, akavasikiwa vwasi, kila vefikiwe na kuzarika sa magonji esina mrisha.

³⁷ Niho akavati varateri vakwe, “Mafindiko ni majinki, mira vandima ni vaghere.

³⁸ Heicho, mwombeni Mfumwa wa mafindiko, atume vandima he mafindiko akwe.”