MATAYO 7 - Chasu New Testament 1967

Musilahe vaghenji

¹ “Musilahe, nesa na unywi musirelahwa.

² Ambu mlaho mwelaha nawo, nirewo na unywi mwenelahiwa; na ngero ila mwenegerira, nireyo mwenegerirwa.

³ Hanini werereha kasanu keho he iziso la mndughu wako, na mghamba weho he iziso lako we mwenye wesiurereha?

⁴ Kana unemtize mndughu wako, ‘Cheki ning’ole kasanu he iziso lako,’ uko he iziso lako we mwenye hena mghamba?

⁵ We mlung’ong’o! Rongang’ola uo mghamba he iziso lako niho wenevona nezo, na kung’ola kasanu he iziso la mndughu wako.”

⁶ “Musiinke maguro kila chezerire, neri musitaghe lulu jenyu he nguve, jisirejivatira na maghu ajo, jikagharuka na kumung’arura.”

Ombani muneinkwa

⁷ “Ombani muneinkwa; endani munevona; kokontani munejuvuiwa.

⁸ Ambu kila eomba einkwa, na ula eenda evona, na ula ekokonta enejuvuiwa.

⁹ Kana henyu hena mntu, mwanawe ekimwomba kijo enemunka ibwe?

¹⁰ Kana ekimwomba samaki enemunka nyoka?

¹¹ Ana ukinakiche unywi mwe vavivi, mwemanyije kuinka vana venyu vintu vyedi, Vava wenyu wa uko wanga tekazike kuvainka vyedi vala vemwomba?

Maandiko ezerire

¹² Heicho vyose mweenda kuketiwa ni vantu, na unywi vaketieni huvo, ambu icho nicho myomongwa na varoti.”

Nzia mbiri

¹³ “Ingiiani he mpenge sisiri; ambu mpenge aramu na nzia aramu, vitonja he kuteka, na vareingia he iyo mpenge ni vajinki.

¹⁴ Ambu mpenge ni sisiri, na nzia ni fufuji yetonja he nkalamo, na vareivona ni vaghere.”

Idi na mongo

¹⁵ “Kucheieni he varoti va mongo, vemuzia vedokie mikota ya magonji, mira uko ndeni ni maghinga makai.

¹⁶ Munevamanyija he ntunda javo. Hena mntu etunda zabibu he mivwa; kana nkuu he midangu?

¹⁷ Nirehuvo, kila mti wedi ugera ntunda jedi, na mti mvivi ugera ntunda mbivi.

¹⁸ Mti wedi teuidima kugera ntunda mbivi, neri mti mvivi teuidima kugera ntunda jedi.

¹⁹ Kila mti wesigera ntunda jedi, unetemwa ugerwe he moto.

²⁰ Heicho munevamanyija he ntunda javo.”

Viteto na mihiro

²¹ “Si kila mntu eniitanga Mfumwa, Mfumwa, eneingia he vufumwa vwa uko wanga, esire ula eronga vila vyekundiwe ni Vava wangu wa uko wanga.

²² Ula msi vajinki veneniti, ‘Mfumwa, Mfumwa, teturotie na izina lako, na he izina lako kufunya mpepo, na kuronga virumo vijinki he izina lako?’

²³ Niho nenevavwira boo iti, ‘Na too simumanyije unywi; vukani hangu unywi varehira vivivi.’”

Misingi miri

²⁴ “Heicho, kila mntu esikia ivyo viteto vyangu na kuronga huvo, enefwanyanywa na mntu echee, ejengie nyumba yakwe wanga he mrarabwe.

²⁵ Mvua mbaha ikagwa, beria ikasea, nkungu ikafefeta, vyose vikakusha ila nyumba, isigwe, ambu msingi wayo wejengiwe wanga he mrarabwe.

²⁶ Na kila esikia ivyo viteto vyangu esironga huvo, enefwanyanywa na mntu erundie, ejengie nyumba yakwe he mshangaga.

²⁷ Mvua ikagwa, beria ikasea, nkungu ikafefeta, vyose vikakusha ila nyumba, ikagwa, kigwire chayo kikaoka kibaha.”

²⁸ Yesu ekikenja ivyo viteto vyakwe, luvungano lukakugha vuntu vwa michejire yakwe,

²⁹ ambu evachejije nezo sa mwenye nzinya, si sa vaandiki vavo.