MATAYO 4 - Chasu New Testament 1967

Kugheshwa kwakwe Yesu

¹ Niho ana Yesu akatikwa noko nyika ni Mpeho iti aregheshwa ni Shetani.

² Akakuima chala misi makumi mane, hemsi na kio, nyuma akasikia nza.

³ Mreghesha akamzia, akamti, “Kakicha niwe Mwana wa Mrungu, iti aa mabwe aoke mikate.”

⁴ Naye akamgharusha, akati, “Cheandikwe kuti, ‘Mntu tevikwa ni kijo du, esire kwa kila kiteto chefuma he momo wa Mrungu.’”

⁵ Nyuma Shetani akamtika he muzi wezerire, akamvika wanga he msodi wa nyumba ya mtaso,

⁶ akamti, “Kakicha niwe Mwana wa Mrungu, kugushe na aho si, ambu cheandikwe iti, ‘Enekutumia vamalaika vakwe, Vakurindije he mikono yavo, Usireturuma kughu kwako he ibwe.’”

⁷ Yesu akamti, “Chereandikwa-wa kuti, ‘Usimgheshe Mfumwa Mrungu wako.’”

⁸ Shetani akamtika kangi he ntuvi ndeza mno, akamvonyesha vufumwa vwose vwa si ii na vwedi vwayo,

⁹ akamti, “Ninekunka ivi vyose, wekigwa si na kunidunkutia.”

¹⁰ Niho Yesu akamti, “Vuka aha Shetani! ambu cheandikwe kuti, ‘Mdunkutie Mfumwa Mrungu wako, umtase ye du.’”

¹¹ Niho Shetani akamshigha; vamalaika vakaza vakamtumikia.

Yesu etua Kapernaumu ya Galilaya

¹² Yesu ekinasikie iti Yohane achungwa, akatonga noko Galilaya.

¹³ Akavuka uko Nazareti, akaretua Kapernaumu, muzi weho mbaimbai ya bahari, he mhaka wa isanga lakwe Zabuloni ne Naftali;

¹⁴ nesa kila chetetiwe ni mroti Yesaya kikoloke, sa vuntu etie,

¹⁵ Isanga lakwe Zabuloni na lakwe Naftali, Nzia ya he bahari, sela ya Yordani, Galilaya ya vaisanga,

¹⁶ Vantu vala vekiikaa he kija, Vavona kianga kibaha; Na vala vekiikaa he isanga la mvuri wa fwire Kianga chavafumia.

Yesu evoka kuhirikira

¹⁷ Kuvokia ilo igheri Yesu akavoka kubirikira, ekiti, “Chweni mti, ambu vufumwa vwwa uko wanga vwazengelela!”

Yesu eitanga varateri va kuvoka

¹⁸ Ingeri ekivecha mbaimbai ya bahari ya Galilaya, akavona vantu veri, mntu na mjinawe, ni Simoni eitangwa Petro, ne Andrea mjinawe, vekigera nyavu javo he bahari, ambu ne vareloa.

¹⁹ Akavati, “Niraterani, nami ninemughosha vareloa vantu.”

²⁰ Hala indi vakashigha nyavu javo, vakamratera.

²¹ Ekivecha mozya akavona vangi veri, mntu na mjinawe, ni Yakobo mwana Zebedayo, ne Yohane mjinawe, veho he ngilawa hantu hamwe na vavee eye Zebedayo, vekihareha nyavu javo; akavaitanga.

²² Hala indi vakashigha ngilawa na vavee, vakamratera.

Yesu ejunguluka ekironga ndima uko Galilaya

²³ Naye ekijunguluka uko Galilaya hose, ekicheja he masinagogi avo, na kubirikira Mburi Yedi ya vufumwa, na kubanja kila vuwaji na vushokeri vwose vweho he vantu.

²⁴ Nguma yakwe ikagisha he isanga lose la Sirya; vakamwetie vawaji vose, vegurirwe ni mpepo na vegwa kisa na veholoje, naye akavabanja.

²⁵ Mavungano majinki akamratera, vefuma Galilaya na Dekapoli na Yerusalemu, Yudea na sela ila ya Yordani.