MATAYO 28 - Chasu New Testament 1967

Kuvuka he vefwie kwakwe Yesu

¹ Msi wa sabato ukinasie, hakacha msi wa kuvoka juma, Maria Magdalena, ne Maria ula ungi vakatonga kurarereha mbira.

² Naho hekiketie kididimo kibaha cha isanga, ambu malaika wa Mfumwa eseie kufuma uko wanga, akaza, akahelija lila ibwe, akaliikaia.

³ Fwani yakwe yeikee sa kiimiko, na suke jakwe jeikee sa chasheru.

⁴ Kwa kufoleka, vala varinji vakazingiza, vakaikaa sa vefwie.

⁵ Ula malaika akagharusha, akavati vala vache, “Unywi musifoleke! Ambu namanya iti mumwenda Yesu ula ekivambiwe he msalaba.

⁶ Tewaha ye, ambu avuka he vefwie sa vuntu ekitetie. Nzoni murerehe hantu ekiyejwe.

⁷ Heicho tongani fia murevavwira varateri vakwe: ‘Avuka he vefwie;’ rereha, enemurongorira kutonga Galilaya, niho hantu mwenemvonia. Nakenja kumuvwira huvo.”

⁸ Vakavuka fia hala he mbira vena na fole na kuizihirwa kubaha; vakasara, vakamanyisha varateri vakwe iyo mburi.

⁹ Ingeri Yesu akazana navo, ekiti, “Nimukezya!” Vakamswia, vakamgura maghu, vakamdunkutia.

¹⁰ Yesu akavati, “Musifoleke, tongani murevavwira vandughu vangu vatonge noko Galilaya; niho hantu venenivonia.”

¹¹ Navo aho vekitinga, kumwe he vala vasikari vakaingia he muzi; vakavagaia vabaha va vatasi vyose vyeketike.

¹² Vakavungana hamwe na vaghosi, vakachila, vakavainka vala vasikari fedha nyingi,

¹³ vekiti, “Tetani iti varateri vakwe vezie kio tweshinjie vakamwiva.

¹⁴ Kakicha iyo mburi yekisikiwa he mlao, tuneteta naye nesa musikete masa.”

¹⁵ Vakaghuha jila fedha, vakaketa sa vuntu vechejijwe. Icho kiteto kikagisha iko he Vayuda mhaka yoo ili.

Yesu efumia ntume jakwe uko Galilaya

¹⁶ Vala varateri ikumi na mmwe vakatonga noko Galilaya mhaka he ila ntuvi Yesu evaazere.

¹⁷ Navo vekinamvone, vakamdunkutia; mira va kumwe hevo vakaketa matatanyi.

¹⁸ Yesu akaza hevo, akateta navo, akavati, “Neinkiwe nzinya jose uko wanga na kunu si.

¹⁹ Tongani mughoshe vaisanga vose vaoke varateri vangu, mwekivabatiza he Izina la Vava, na Mwana, na Mpeho Wedi,

²⁰ na kuvacheja vagurishe vyose nemuazere. Rereha, mi niho na unywi misi yose mhaka msirikijo wa masanga.”