MATAYO 26 - Chasu New Testament 1967

Kiaghano cha kumkoma Yesu

¹ Niho Yesu ekinakenje ivyo viteto vyose, akavati, varateri vakwe,

² “Mwemanyije iti misi miri yekivecha, ula ungi ni wa Pasaka, na Mwana wa Mntu eneinkijwa avambwe he msalaba.”

³ Igheri lila vabaha va vatasi va vaghosi va vantu ngwa, vakavungana he kitala cha Mtasi M’baha eitangwa Kayafa,

⁴ vakateta njama hamwe, nesa vamgure Yesu kwa kiavia, na kumkoma.

⁵ Vakati, “Mira kisioke he msi m’baha, nesa hasireketa mkede wa vantu.

Yesu egerwa mafuta uko Betania

⁶ Aho Yesu eho uko Betania he nyumba yakwe Simoni mreumbuka,

⁷ akaswiiwa ni mche ehete kachupa ka mafuta edi a zora mbaha, akamgera he mtwi, aho eikae si ekila.

⁸ Varateri vakwe vekivona, vakavihiwa, vakati, “Ni konda ani ii?

⁹ Ambu aa mafuta chekive kutaghijwa kwa fedha nyingi, jiinkwe vakiva.”

¹⁰ Yesu akamanya, akavati, “Hanini mwemrisha uu mche vwasi? Ambu enirongiie ndima yedi.

¹¹ Ambu vakiva muna navo misi yose, mira mi temuna nami misi yose.

¹² Ambu aho ekigera mwiri wangu mafuta aa, eketie huvo nesa aniringanyije kujikwa kwangu.

¹³ Kididi nimuti, He masanga ose kila hantu ii Mburi Yedi yenebirikirwa, na icho eketie kineretetwa kwa kukumbuka.”

Irenge lakwe Yuda

¹⁴ Igheri ilo mmwe wa vala ikumi na veri, eitangwa Yuda Iskarioti, akatonga he vabaha va vatasi,

¹⁵ akati, “Muneninka ni nekimwinkija he mikono yenyu?” Vakamunka fedha makumi matatu.

¹⁶ Kuvokia ilo igheri akaenda nzia vuntu enemwinkija.

Kijo cha msirikijo

¹⁷ Ingeri msi wa kuvoka wa mikate yesigerirwe chachu, varateri vakamswia Yesu, vakamti, “Ni hio weenda tukuharehie halia Pasaka?”

¹⁸ Akavati, “Tongani he muzi ha mntu msiku, mumti, ‘Mcheji eti, Igheri langu lazengelela, ninelia Pasaka hako hamwe na varateri vangu.’”

¹⁹ Varateri vakaketa sa vuntu Yesu evaazere, vakaringanya Pasaka.

²⁰ Hekinaoke chahemagheri, akaikaa si kula kijo hamwe na vala ikumi na veri.

²¹ Aho ekila akati, “Kididi nimuitio, Mmwe wenyu eneniinkija.”

²² Vakaonda haiwa, vakavoka kumvwija mmwe mmwe, kuti, “Mfumwa, kana nimi?”

²³ Akagharusha, akati, “Uu atoveja hantu hamwe nami he bakuli, niye eneniinkija.

²⁴ Mwana wa Mntu etonga sa vuntu eandikiwe, mira vwasi vwa uo mntu enemwinkija Mwana wa Mntu! Neki chedi uo mntu nanga tekimoghiwe.”

²⁵ Yuda ula mremwinkija akagharusha, akati, “Rabi, kana nimi?” Akamti, ‘Vuntu wateta.”

²⁶ Aho vekila, Yesu akaghuha mkate akaanjela, akaubendua, akavainka varateri vakwe akati, “Koni mule, uu ni mwiri wangu.”

²⁷ Kangi akaghuha kikombe akaanjela, akavainka akati, “Nwani hecho vose;

²⁸ ambu ii niyo sakame yangu ya kiaghano, yeitwa vuntu vwa vajinki nesa vashighiwe mabanu.

²⁹ Mira nimutio, Kuvokia yoo sikanwe kangi neri chemoghwa ni mzabibu, mhaka ula msi nenenwa mshaa hamwe na unywi uko he vufumwa vwa Vava wangu.”

³⁰ Vekinakenje kuimba, vakafuma, vakatonga he ntuvi ya Mizeituni.

Yesu evavonyesha varateri vuntu venemshigha

³¹ Niho Yesu akavati, “Unywi vose kio iki munenivihiwa; ambu cheandikwe iti, ‘Ninem’bigha mrisha, na magonji a ifio enezarika.’

³² Mira nekinekenja kuvuka he vefwie, ninemurongorira noko Galilaya.”

³³ Petro akagharusha, akamti, “Hata vose vekinevihiwa vuntu vwako, mi sikavihiwe neri.”

³⁴ Yesu akamti, “Kididi nikuvwira we, kio iki nkuruvi yesinaamba, unenikana kantu katatu.”

³⁵ Petro akamti, “Hata chekinitara kufwa hamwe nawe, sikakukane neri.” Na varateri vose vakareteta huvo.

Yesu uko Getsemane

³⁶ Niho Yesu akatonga hamwe navo, akafika he mghunda weitangwa Getsemane, akavati varateri vakwe, “Ikaani aha, nitonge kuraomba.”

³⁷ Akamtika Petro na vana Zebedayo veri; akavoka kusononoya na kuonda.

³⁸ Niho akavati, “Ngoro yangu ina vwasi mno kiringanyo cha kufwa, ikaani aha muyae kiavi hamwe nami.”

³⁹ Akatonga kamozya hadori, akasoma vusho si, akaomba ekiti, “Vava wangu, kakicha kive, iki kikombe kiniveche; mira si sa vuntu mi nekunda, esire sa vuntu we wekunda.”

⁴⁰ Akahunduka he vala varateri, akakicha vashinjia, akamti Petro, “Kave twaidima kuyaa kiavi nami neri saa mwe?

⁴¹ Yaani kiavi na kuomba, nesa musireingia he mighesho! Ngoro ikunda, mira mwiri weleghele.”

⁴² Akatonga kangi ka keri, akaomba ekiti, “Vava wangu, kakicha tekive iti iki kikombe kiniveche nesikinwie, kikundire chako kifumane.”

⁴³ Akahunduka wa akakicha vashinjia, ambu meso avo eemee.

⁴⁴ Akavashigha wa akatonga akaomba ka katatu, ekirateta viteto vila vila.

⁴⁵ Ekikenja akavazia varateri vakwe, akavati, “Shinjiani ana na kuhema. Rereha, saa yafika, Mwana wa Mntu eneinkijwa he mikono ya venye mabanu.

⁴⁶ Vukani tutonge! Rereha, ula mreniinkija azengelela.”

Kugurwa kwakwe Yesu

⁴⁷ Aho echeriteta, niho Yuda mmwe wa vala ikumi na veri akaza, ena na vantu vajinki, vetikie mihandwi na marungu, vefuma he vabaha va vatasi na vaghosi va vantu.

⁴⁸ Ula mremwinkija evainkie luvengo kuti, “Uo nenem’bwita, niye, mgureni.”

⁴⁹ Hala indi akamswia Yesu, akamti, “Rabi, nakukezya,” akam’bwita.

⁵⁰ Yesu akamti, “Mbwiaa, chekuetie nini?” Niho vakamswia Yesu vakaronga mikono vakamgura.

⁵¹ Aho niho mmwe wa vala vena ne Yesu, akaronga mkono wakwe, akajuta mhandwi wakwe, akamtema mzoro wa mtasi m’baha, akamchwa isikio.

⁵² Niho Yesu akamti, “Hundua mhandwi wako hantu hawo; ambu vala vegura mhandwi venekomwa ni mhandwi.

⁵³ Kana uti sekiidima kumsemba Vava wangu, naye anietie iki huvu malaika marivati ikumi na meri na kukela?

⁵⁴ Ana maandiko enekoloshwa ze, iti nivwo vuntu chetara kioke?”

⁵⁵ Saa ila Yesu akamvwira luvungano kuti, “Mwezie kunigura mwetikie mihandwi na marungu sa mweragura mraghumba? kila msi nekiikaa he nyumba ya mtaso nekicheja, neri temunigurire.

⁵⁶ Mira ivyo vyose vyeokie, nesa maandiko a varoti akoloshwe.” Niho varateri vose vakamshigha, vakaaha.

Kulahwa kwakwe Yesu he mtasi m’baha

⁵⁷ Na vala vemgurire Yesu vakamtika hakwe Kayafa mtasi m’baha, eho hantu vaandiki na vaghosi vekivungane,

⁵⁸ Petro akamratera, mira hae hae, mhaka he kitala cha mtasi m’baha, akaingia, akaikaa si na valughojo, nesa avone vuntu mburi yenechika.

⁵⁹ Niho vabaha va vatasi na chila yose vakamwendia Yesu vuonwa vwa mongo, nesa vamkome;

⁶⁰ mira vasivone, nziaho hezie vaonwa vajinki va mongo. Uko nyuma hakavuka veri,

⁶¹ vakati, “Uu etetie, ‘Niidima kubaja nyumba ya Mrungu na kuijenga kwa misi mitatu.’”

⁶² Mtasi m’baha akaimuka, akamti, “Tuna cho wegharusha? Ni vuonwa ani ava vekutetia?”

⁶³ Mira Yesu akahuja. Mtasi m’baha akamti, “Nikurighia he Mrungu mwenye moo, utuvwire, kakicha niwe Kristo Mwana wa Mrungu.”

⁶⁴ Yesu akamti, “Niwe wati huvo. Kangi nimutio, ‘Kuvokia iki munemvona Mwana wa Mntu eikae he mkono wa kume wa nzinya, ekiza wanga he majumbi a uko wanga.’”

⁶⁵ Niho Mtasi m’baha akabaja suke jakwe ekiti, “Emfala Mrungu! Vaonwa tuvaendiani wa? Rerehani iki mwasikia iyo falaja yakwe:

⁶⁶ mutize unywi?” Vakagharusha vekiti, “Chemtara ni kifwa!”

⁶⁷ Niho vakamtufia mate a vusho, vakam’bigha nkundi; kumwe vakam’bigha maluhi,

⁶⁸ vekiti, “We Kristo, turotie iti ni ani akubigha?”

Petro emkana Yesu

⁶⁹ Petro ekiikae si aho nze he ua; mgitu mmwe akamswia, akati, “Nawe werena ne Yesu wa Galilaya.”

⁷⁰ Naye akakana mozya he vose, ekiti, “Simanyije icho weteta.”

⁷¹ Naye ekinafume nze ya mvera, mgitu ungi akamvona, akavati vala veho hala, “Hata uu ekirena ne Yesu Mnazareti.”

⁷² Akakana wa kwa kirigho, “Simmanyije uu mntu!”

⁷³ Kakenda kadori vala veimuke hala vakamswia Petro, vakamti, “Kididi hata we ure mmwe wavo, ambu hata kitetire chako kikumanyisha.”

⁷⁴ Niho akavoka kukurara na kukurighia ekiti, “Uo mntu simmanyije.” Hala indi nkuruvi ikaamba.

⁷⁵ Niho Petro akakumbuka kila kiteto Yesu etetie, “Nkuruvi yesinaamba unenikana kantu katatu.” Akafuma na nze akaia kwa lusoyoyo.