MATAYO 25 - Chasu New Testament 1967

Mfwanano wa vabora ikumi

¹ “Niho vufumwa vwa uko wanga vwenefwanana na vabora ikumi, veghuhie taa javo, vakatonga kuramzana mwenye mlondolo.

² Vasano hevo vekirundie, na vasano vechee.

³ Vala vekirundie vetikie taa javo, vesijitikie na mafuta hantu hamwe najo;

⁴ mira vala vechee vetikie mafuta he ntanu javo hamwe na taa javo.

⁵ Igheri mwenye mlondolo ekineikaishe, vose vakachunda, vakashinjia lughohe.

⁶ Mira uko kio ghati hakaketa kilonzo, ‘Mwenye mlondolo! Fumani mutonge kuramzana!’

⁷ Hala indi vala vabora vose vakavuka, vakahareha taa javo.

⁸ Vala verundie vakavati vala vechee, ‘Tughavieni vufuta he ao enyu, ambu taa jetu jijimika.’

⁹ Mira vala vechee vakagharusha, vekiti, ‘Hai, teekakoloke he uswi na unywi; keba mutonge he vala vataghija muzore enyu.’

¹⁰ Navo aho vekitonga kurazora, mwenye mlondolo akaza, na vala vekuringanye vakaingia naye he mlondolo, lughwi lukafingwa.

¹¹ Uko nyuma vala vabora vangi navo vakaza, vakati, ‘Mfumwa, Mfumwa, tujuvuie!’

¹² Akagharusha, akati, Kididi nimutio, Simumanyije unywi.’

¹³ Heicho yaeni kiavi, ambu temumanyije igheri neri saa.

Mfwanano wa talanta

¹⁴ “Ambu cheikee sa mntu eenda kuzoka, eitange vazoro vakwe akavika mari yakwe hevo;

¹⁵ mmwe akamunka talanta sano, ungi akamunka mbiri, na ungi akamunka mwe; kila mntu na kiringanyo cha miidimire yakwe; akazoka.

¹⁶ Hala indi ula einkiwe talanta sano, akatonga akasusurija najo, akamaza talanta jingi sano.

¹⁷ Nirehuvo, na ula einkiwe mbiri akashuma akamaza jingi mbiri.

¹⁸ Mira ula einkiwe mwe, akatonga akafora si, akavisa ho fedha ya mzuri wakwe.

¹⁹ Hekivecha misi mingi, mzuri wa vala vazoro akaza, akaenda itaro hevo.

²⁰ Hakaza ula einnkiwe talanta sano, ekiti, ‘Mfumwa, wevikie hemi talanta sano, rereha, namaza najo talanta jingi sano.’

²¹ Mzuri wakwe akamti, ‘Ni chedi, u mzoro wedi na mkitengo; werindie kitengo he vighere, ninekughosha m’baha he vijinki: ingia he kuizihirwa kwa mzuri wako.’

²² Ula einkiwe talanta mbiri naye akaza, akati, ‘Mfumwa, wevikie hemi talanta mbiri, rereha namaza najo talanta jingi mbiri.’

²³ Mzuri wakwe akamti, ‘ni chedi, u mzoro wedi na mkitengo; werindie kitengo he vighere, ninekughosha m’baha he vijinki; ingia he kuizihirwa kwa mzuri wako.’

²⁴ Na ula einkiwe talanta mwe naye akaza, akati, ‘Mfumwa, nemanyije iti we u mntu mtungulu, ufindika wesihandie, uvunganya wesisasaje;

²⁵ heicho nikafoleka, nikatonga nikavisa talanta yako he msau, rereha, kila e chako haiki.’

²⁶ Mzuri wakwe akagharusha, akamti, ‘We mzoro mvivi na mdai wekimanyije iti nifindika nesihandie, nivunganya nesisasaje?

²⁷ Chekikutara kuvika fedha yangu he vala veinkija na mnesha, nami nekiza nekivona ila yangu na mnesha wayo.

²⁸ Heicho, mghumbeni iyo talanta, munkeni ula ena jila kumi.

²⁹ Ambu ula ena kintu, eneinkwa na kuongejijwa fwa; mira ula esina kintu, hata kila ena eneghumbwa.

³⁰ Na mzoro ula esive, mtagheni noko hae he kija uko nze, niho heneketa kuwela na kukereresa majegho.’

Msi wa mlaho

³¹ “Aho Mwana wa Mntu ekineza na ngazo yakwe, hamwe na vamalaika vezerire vose, niho eneikaa he kichumbi cha ngazo yakwe;

³² na vaisanga vose venevungana mozya heye; naye enevatanya sa vuntu mrisha etanya magonji na mbuji.

³³ Magonji eneavika mkono wakwe wa kume, na mbuji mkono wakwe wa kumoso.

³⁴ Uko nyuma mfumwa enevavwira vala veho mkono wakwe wa kume, ‘Nzoni unywi mweinkiwe lutelwedi ni Vava wangu, palani vufumwa mwevikiiwe too masanga ekirumbwa!

³⁵ Ambu nesikie nza mukaninka chala; nesikie nkiri, mukaninka chanwa; neki mgheni, mukanighuhia;

³⁶ nekiho kituhu, mukanivusha; ne muwaji mukaza kuniyoa; nekiho he kichungo, mukanikusha.’

³⁷ Niho vala venye singirisya venemgharusha, vekiti, ‘Mfumwa, ni rini twekuvonie wesikie nza tukakuora, kana wesikie nkiru tukakunka chanwa?

³⁸ Kangi ni rini twekuvonie we mgheni, tukakughuhia, kana weho kituhu tukakuvusha?

³⁹ Kangi ni rini twekuvonie we muwaji kana weho kichungo tukakukusha?’

⁴⁰ Na mfumwa enegharusha, ekivati, ‘Kididi nimutio, Sa vuntu mwemketiie mmwe wa vala vandughu vangu vadori, nimi mweniketiie.’

⁴¹ Kangi enevavwira vala veho mkono wakwe wa kumoso, ‘Vukani aha hangu, unywi mwetufiwe, mutonge noko he moto wa kae na kae, wemringanyijiwe Shetani na vamalaika vakwe!

⁴² Ambu nesikie nza, musininke chala; nesikie nkiru, musininke chanwa;

⁴³ neki mgheni, musinighuhie; nekiho kituhu, musinivushe; ne muwaji kangi neho he kichungo, musize kuniyoa.’

⁴⁴ Niho avo navo venegharusha, vekiti, ‘Mfumwa, ni rini twekuvonie wesikie nza, kana nkiru, kana we mgheni, kana weho kituhu, kana we muwaji, kana weho he kichungo, tusikupipirikie?’

⁴⁵ Naye enevagharusha, ekiti, ‘Kididi nimutio, Sa vuntu mwesimketiie mmwe wa avo vadori, temuniketiie mi.’

⁴⁶ Avo venetonga kuraingia he ibigho la kae na kae, mira venye singirisya vo venetonga he nkalamo ya kae na kae.”