MATAYO 24 - Chasu New Testament 1967

Yesu erota kukondika kwa nyumba ya mtaso na mkengelejo wa si ii

¹ Yesu akafuma he nyumba ya mtaso, akatonga; varateri vakamswia, nesa vamvonyeshe majengo a nyumba ya mtaso.

² Naye akagharusha, akavati, “Temuvona ivi vyose? Kididi nimutio, Aha tehekashighwe ibwe wanga he ibwe, lesikagomowe.”

³ Aho eikae si he ntuvi ya Mizeituni, varateri vakwe vakamswia mpiso, vekiti, “Tuvwire ki iti ivyo vineoka rini, na luvengo lwa kuza kwako, na lwa mkengelejo wa masanga nini?”

⁴ Yesu akagharusha, akavati, “Rerehani, mntu asimuishe.

⁵ Ambu vajinki veneza he izina langu, vekiti, ‘Nimi Kristo;’ navo veneisha vajinki.

⁶ Na unywi munesikia mburi ja nkondo na mbike ja nkondo; rerehani, musiitushwe; ambu ivyo vyose nire sari vize; mira uo mkengelejo teunate.

⁷ Ambu mbari na mbari jineomana, vufumwa na vufumwa vuneomana; heneketa nzota na vididimo uko na uko.

⁸ Ivyo vyose ni kivokio cha mavwasi.

⁹ Ilo igheri venemuinkija murishwe vwasi na kukomwa; na unywi muneoka vantu va kushinwa ni vaisanga vose vuntu vwa izina langu.

¹⁰ Niho vajinki venekuhosha, veneliana marenge na kudaana.

¹¹ Henevuka varoti vajinki va mongo, veneisha vajinki.

¹² He vuntu vwa kuzika kwa lubero, lukundo lwa vajinki lunehoa.

¹³ Mira ula enegumirija mhaka msio niye enekia.

¹⁴ Kangi Mburi Yedi ya vufumwa inebirikirwa he si jose, ioke vuonwa he vaisanga vose; aho niho ula mkengelejo weneza.

¹⁵ “Aho mwekinevona kila kivihijo cha kukonda, kila chetetiwe ni mroti Danieli cheimuke hala hantu hezerire (ula esoma natwarije),

¹⁶ aho vala veho Yudea vaahe na he ntuvi;

¹⁷ na ula eho wanga he nyumba asisee kyuraghuha vintu vyeho nyumba hakwe,

¹⁸ neeri ula eho he mghunda asihunduke kaa kuraghuha suke yakwe.

¹⁹ Vwasi vwa vala vena ndeni na veamwisha he iyo misi.

²⁰ Mira ombani nesa kuaha kwenyu kusizane na igheri la kiho kana msi wa sabato.

²¹ Ambu ilo igheri heneketa mavwasi mabaha esinavoneka too kuvoka kwa masanga mhaka iki, neri esikarevoneka huvo narini.

²² Nanga iyo misi yesekitaduishwa, hesekina ye ekikia; mira he vuntu vwa vala vesaghurwe, iyo misi ineduishwa.

²³ Ilo igheri mntu ekimuti, ‘Rereha, Kristo ewaha,’ kana, ‘Eho kula,’ musiitikije.

²⁴ Ambu heneketa Makristo a mongo na varoti va mongo, navo veneketa maluvengo mabaha na vimako, nesa vavateshe hata vala vesaghurwe kakicha kiidimika.

²⁵ Rereha, narongora kumuvwira.

²⁶ Heicho vekinemuti, ‘Eho uko nyika,’ musifume, kana, ‘Eho nyumba,’ musiitikije.

²⁷ Ambu sa vuntu kiimiko chefuma kibuka izuva, kikavoneka mhaka kigwa izuva, huvo nivwo vuntu kuza kwa Mwana wa Mntu kweneoka.

²⁸ Ambu hantu hena kimba, niho hantu mitonyi yenevungana.

²⁹ “Mira hala indi nyumba ya mavwasi a misi ila, izuva linegerwa kija, na mweji teukafunye kianga chawo, ntondo uko wanga jinegwa, na nzinya ja uko wanga jinekushika.

³⁰ Niho luvengo lwa Mwana wa Mntu lwenevoneka uko wanga; niho mbari jose ja masanga jenewela; navo venemvona Mwana wa Mntu ekiza wanga he majumbi a uko wanga, ena na nzinya na ngazo mbaha.

³¹ Naye enetuma vamalaika vakwe na izii ibaha la lugunda; navo venevavunganya vala vakwe vesaghurwe, kufuma myondo mine ya nkungu, kuvokia hantu wanga yehakane mondo uu mhaka hantu yehakane mondo ungi.

Kukucheia

³² “Heicho kuchejeni mwekifwanyanyija he mkuu, matambi awo ekinavunga na kushosha, mumanya kuti vuri yazengelela.

³³ Na unywi nirehuvo, mwekivona ivyo vyose, manyani kuti azengelela mpengeni.

³⁴ Kididi nimutio, Lukolo ulu telukaveche ivi vyose vyesinakoloka.

³⁵ Wanga na si vinevecha, mira viteto vyangu tevikaveche narini.

³⁶ “Mira mburi ya msi ula na saa ila, tehena eimanya, neri vamalaika veho uko wanga, neri Mwana, esire Vava mwenye.

³⁷ Ambu sa vuntu chekiikee he ila misi yakwe Noa, nirevwo vuntu cheneoka hata he kuza kwa Mwana wa Mntu.

³⁸ Ambu sa vuntu chekiikee he ila misi yerongorire mghubiko wa mpombe, vantu vekila na kunwa, vekilondola na kulondolwa, mhaka ula msi Noa ekiingia he safina,

³⁹ vasitwarije, mhaka mghubiko wa mpombe ukaza ukakenja vyose; nirevwo vuntu cheneoka he kuza kwa Mwana wa Mntu.

⁴⁰ Ilo igheri vantu veri veho he mghunda, mmwe eneghuhwa, ungi eneshighwa.

⁴¹ Vache veri veshagha, mmwe eneghuhwa, ungi eneshighwa.

⁴² “Yaeni ra kiavi, ambu temumanyije iti ni msi uhi Mfumwa wenyu eneza.

⁴³ Mira manyeni icho kuti, Nanga mwenye nyumba ekimanya lila igheri mkea enezia, ekiyaa kiavi, neri esekishigha nyumba yakwe ibawe.

⁴⁴ Heicho na unywi, kuringanyeni ra, ambu Mwana wa Mntu eneza he saa mwesiiarire.”

Mfwanano wa mzoro wedi na mvivi

⁴⁵ “Niani ra mzoro mkitengo, echee, eye mzuri emvikie he kaa yakwe, iti aghavie vazoro vaghenji kijo igheri letara?

⁴⁶ Mrela vwedi ni mzoro ula eye mzuri wakwe ekiza enemkicha ekiraketa huvo.

⁴⁷ Kididi nimutio, Enemghosha m’baha wa vintu vyakwe vyose.

⁴⁸ Mira mzoro ula mvivi ekidunganya he ngoro iti, ‘Mzuri wangu aikaisha,’

⁴⁹ akavoka kubigha vaghenji vakwe, na kula na kunwa hamwe na vaghenji;

⁵⁰ mzuri wa uo mzoro eneza msi esiarire na igheri esimanyije,

⁵¹ enemtema vihindi viri, na kumsankanya na valung’ong’o. Niho heneketa kuwela na kukereresa majegho.”