MATAYO 23 - Chasu New Testament 1967

Yesu evasua vaandiki na Vafarisayo

¹ Niho Yesu akavavwira mavungano na varateri vakwe ekiti,

² “Vaandiki na Vafarisayo veikaiye kichumbi chakwe Mose.

³ Vyose venemuvwira, vigureni na kuviketa; mira musiraterije mirongire yavo; ambu vo veteta mira teveketa.

⁴ Vo vechunga mijigho yeemea na kuvavikia vantu he vituro vyavo, mira vo venye tevekunda neri kuikunta na kichaa chavo.

⁵ Kangi ndima javo jose veronga nesa vavonwe ni vantu, ambu vearamija mpingu javo na kuongeja maeso avo;

⁶ vekunda vichumbi vya mozya he kula mbao, na kuikaa mozya he masinagogi,

⁷ na kukeziwa uko he viete, na kuitangwa ni vantu, ‘Rabi!’

⁸ Mira unywi musiitangwe, ‘Rabi;’ ambu mcheji wenyu ni mmwe, na unywi vose mu vandughu.

⁹ Neri musimwitange mntu vava aha he masanga, ambu Vava wenyu ni mmwe e wa uko wanga.

¹⁰ Neri musiitangwe varongori, ambu mrongori wenyu ni mmwe, eye Kristo.

¹¹ Na ula e m’baha wenyu, eneoka mndima wenyu.

¹² Na ula ekughosha m’baha ye mwenye, eneduishwa; na ula ekuduisha, eneghoshwa m’baha.

¹³ “Vwasi vwenyu vaandiki na Vafarisayo, valung’ong’o! ambu mufingia vantu vufumwa vwa uko wanga; unywi venye temuingia hevwo, na vala veenda kuingia temuvakundija kuingia. [

¹⁴ “Vwasi vwenyu vaandiki na Vafarisayo, valung’ong’o! ambu muheleja nyumba ja vache vefwiiwe ni vome, na he vuntu vwa lung’ong’o muomba lunde; heicho muneketa masa mabaha kukela.]

¹⁵ “Vwasi vwenyu vaandiki na Vafarisayo, valung’ong’o, ambu muanga he bahari na he isanga ijomu, nesa mumghoshe mntu mmwe kuoka mrateri; na ekinagharuka mumghosha mwana wa gehena kumukela kantu keri.

¹⁶ “Vwasi vwenyu varongori matuntu, unywi mweti, Mntu ekikurigha na nyumba ya mtaso si kintu, mira mntu eikikurigha na dhahabu ya nyumba ya mtaso, akuchunga na kirigho.

¹⁷ Unywi virundu na matuntu; kibaha ni kihi? ni dhahabu kana ni nyumba ya mtaso yezerija iyo dhahabu?

¹⁸ Kangi muti, Ula ekurigha na meza ya mtaso, si kintu; mira ula ekurigha na itasi leho wanga heyo, akuchunga na kirigho.

¹⁹ Unywi mumatuntu, ambu kibaha ni kihi, ni itasi kana ni meza ya mtaso eyo yezerija itasi?

²⁰ Heicho, ula ekurigha na meza ya mtaso, ekurigha nayo na he vila vyeho wanga heyo vyose.

²¹ Na ula ekurigha na nyumba ya mtaso, ekurigha nayo na he ula eikaa heyo.

²² Na ula ekurigha na uko wanga, ekurigha na kichumbi cha Mrungu cha kifumwa na he ula ekiikaie.

²³ “Vwasi vwenyu vaandiki na Vafarisayo, valung’ong’o! ambu mufunya ifungu la ikumi la mburuja na mpirimpiri na bizari, mira mushigha vila vintu vibaha vya he myomongwa, evyo singisirya, mbonea na mwitikijo! Ivyo nivyo vyemutara kuviketa, mira na vila vingi musivishighe.

²⁴ Unywi varongori matuntu, mweerereja sirori na kumija ngamia.

²⁵ “Vwasi vwenyu vaandiki na Vafarisayo, valung’ong’o! ambu muoja vikombe na sahani nze, mira uko ndeni heizue vintu vya kibonda, na kusaketa kiringanyo.

²⁶ We Mfarisayo ituntu, ronga oja he kikombe na sahani ndeni, nesa kive iti nze naho haele.

²⁷ “Vwasi vwenyu vaandiki na Vafarisayo, valung’ong’o! ambu mwefwanane na mbira jeharishwe chokaa, kunu nze jivoneke iti ni jedi, mira uko ndeni jeizue mavindi a vefwie na mavoje ose.

²⁸ Na unywi nirevwo, kunu nze muvoneka he vantu iti mu venye kitea, mira uko ndeni mweizue lung’ong’o na lubero.

²⁹ “Vwasi vwenyu vaandiki na Vafarisayo, valung’ong’o! ambu mujenga mbira ja varoti na kuhamba jila ja venye kitea,

³⁰ na kuti, ‘Nanga uswi twekiho igheri la vazima vetu, twesekisankana navo he kugura sakame ya varoti.’

³¹ Huvo mukutetia vuonwa venye iti mu vana va vala vevakomie varoti.

³² Izujani ra kiringanyo cha vazima venyu.

³³ Unywi nyoka, vana va majoka! muneaha ze ala masa a gehena?

³⁴ Heicho, rerehani, nimutumia varoti na venye viugho na vaandiki; va kumwe hevo munevakoma na kuvavamba he msalaba, na kumwe munevabighia he sinagogi jenyu, na kuvarieriesha he mizi yose;

³⁵ nesa sakame yose yesina nzune yeitike he isanga, imuhundukie, kuvokia sakame yakwe Abeli, ula mwenye kitea, mhaka sakame yakwe Zakaria mwana Barakia, ula mwemkomiie ghati ya hala hantu hezerire na meza ya mtaso.

³⁶ Kididi nimutio, ‘Ivyo vyose vinezia ulu lukolo.’”

Kuiia Yerusalemu

³⁷ “Ee Yerusalemu, Yerusalemu! we mrekoma varoti na kuvabigha na mabwe vala vetumiwe hako! Ni kantu kangahi nanaenda kuvunganya vana vako hantu hamwe, sa vuntu nkuku yevunganya vusio vwayo he mazaghu ayo, neri musikunde.

³⁸ Rerehani, nyumba yenyu yashighwa isamo.

³⁹ Ambu nimutio, Kuvokia yoo temukanivone kangi neri, mhaka mwekineti, ‘Mwenye lutelwedi ni ula eza he izina la Mfumwa.’”