MATAYO 22 - Chasu New Testament 1967

Mfwanano wa ngasu ya mlondolo

¹ Yesu akagharusha, akavavwira kangi kwa mifwanano, ekiti,

² “Vufumwa vwa uko wanga vwefwanane na mfumwa emharehie mwanawe mlondolo.

³ Akatuma vazoro vakwe kuraitanga vala verarikwe he mlondolo; navo vakasua kuza.

⁴ Akatuma wa vazoro vangi ekiti, ‘Vavwireni vala verarikwe, Rereha, nahareha mbao yangu, nzao jangu na vila vyenorire vyakenja kukomwa, vyose vyaharehwa; nzoni ra he mlondolo.’

⁵ Mira vo vasighoshe iti ni kintu, vakakutongira, mmwe mghunda wakwe, ungi he zora jakwe.

⁶ Na vala veshele vakagura vazoro vakwe vakavaketia tiri, na kuvakoma.

⁷ Ula mfumwa akakwewa ni oro mbaha, akatuma nkondo ikabaja vala varekoma na kushota muzi wavo.

⁸ Ekikenja, akavati vala vazoro vakwe, ‘Mlondolo waringanana, mira vala verarikwe tawavatara.

⁹ Heicho tongani he nzia mbaha ja matano, na vose mwenevavona, muvaitange vaze he mlondolo.

¹⁰ Vala vazoro vakafuma, vakatonga uko he nzia mbaha, vakavunganya vala vevavonie vose, vavivi na vedi; nyumba ikaizua vagheni.

¹¹ Mira ula mfumwa ekiingia kuvarereha vagheni vakwe, akavona mntu mmwe esidokie suke ya mlondolo.

¹² Akamti, ‘Mbwiaa! weingie ze aha wesidokie suke ya mlondolo?’ Naye akasova chateta.

¹³ Niho mfumwa akavati vabwange vakwe, ‘Mchungeni maghu na mikono, mtikeni mremtagha he kija cha uko nze, niho heneketa kuwela na kukereresa majegho.’

¹⁴ Ambu veitangwe ni vajinki, mira vesaghurwe ni vaghere.”

Ivwijo la kodi

¹⁵ Niho Vafarisayo vakatonga vakateta njama sa vuntu venemtegha kwa viteto.

¹⁶ Vakamtumia varateri vavo vena na vantu vakwe Herode, vakati, “Mcheji, twemanyije iti we u mntu wa idi, na nzia ya Mrungu uicheja he idi, tufoleka vubaha vwa mntu neri mmwe, ambu turereha vituho vya vantu.

¹⁷ Tuvwire ki iti, We uvona ze, Ni chedi kumunka Kaisari kodi kanaze?”

¹⁸ Mira Yesu akamanya vuvivi vwavo, akati, “Hanini mwenighesha unywi valung’ong’o?

¹⁹ Nivonyani fedha ya kodi.” Navo vakamwetie dinari.

²⁰ Akavati, “Ii sanamu ni yakweni, na aa maandiko?”

²¹ Vakamti, “Ni vyakwe Kaisari.” Niho akavati, “Munkeni Kaisari vila e vyakwe Kaisari, na Mrungu vila e vyakwe Mrungu.”

²² Vekisikia huvo, vakamaka, vakamshigha, vakatonga.

Ivwijo la kuvuka he vefwie

²³ Msi ula ula Vasadukayo, evo veti tehena kuvuka kwa vefwie, vakamswia, vakamvwija,

²⁴ vekiti, “Mcheji, Mose etie, Mntu ekifwa naye esishighie vana, mjinawe ampale mche wakwe, nesa amketie mjinawe mbari.

²⁵ Hetu hekina vandughu mfungate vemoghanywa. Ula wa kuvoka akaghuha mche, akafwa; kila esina vana akamshighia mjinawe mche.

²⁶ Nirehuvo na ula wa keri na wa katatu mhaka vose mfungate.

²⁷ He msirikijo wa vose ula mche naye akafwa.

²⁸ Ana uko he kuvuka kwa vefwie, eneoka mche wakweni he avo mfungate? Ambu vose vekina naye.”

²⁹ Yesu akagharusha, akavati, “Mwetekwa, ambu temumanyije maandiko neri nzinya ya Mrungu.

³⁰ Ambu he kuvuka kwa vefwie, teveghuha neri teveghuhwa, mira veoka sa vamalaika va uko wanga.

³¹ Kana mburi ya kuvuka kwa vefwie, temunasoma kila mwevwirirwe ni Mrungu, ekiti,

³² ‘Mi nimi Mrungu wakwe Abrahamu, na Mrungu wakwe Isaki, na Mrungu wakwe Yakobo? Mrungu si Mrungu wa vefwie, mira ni Mrungu wa veho moo.”

³³ Mavungano vekisikia huvo, vakakugha michejire yakwe.

Ivwijo la iamoro ibaha

³⁴ Vafarisayo vekisikia iti avajiva vala Vasadukayo momo, vakavungana hamwe,

³⁵ mmwe wavo e mremanya myomongwa, akamvwija kwa kumghesha, ekiti,

³⁶ “Mcheji, iamoro ibaha he myomongwa ni lihi?”

³⁷ Akamti, ‘Mkunde Mfumwa Mrungu wako kwa moo wako wose, na kwa ngoro yako yose, na kwa kucha kwako kwose.’

³⁸ Ilo nilo iamoro ibaha kangi e la kuvoka.

³⁹ Na la keri lefwanane nalo ni ili, ‘Mkunde mghenji wako sa vuntu wekukundie we mwenye.’

⁴⁰ He ao maamoro meri, niho hantu myomongwa yose na varoti vyechumbaghie.”

Ivwijo he Kristo

⁴¹ Na Vafarisayo vekinavungane, Yesu akavavwija,

⁴² ekiti, “Muti ze mburi yakwe Kristo, ni mwanaani?” Vakamti, “Ni mwana Davidi.”

⁴³ Akavavwija, “Hama cheikee ze, kila Davidi he kimpeho emwitanga Mfumwa, ekiti,

⁴⁴ ‘MFUMWA emvwirire Mfumwa wangu: Ikaa mkono wangu wa kume, Mhaka nivike vanzo vako, kijusi he maghu ako?’

⁴⁵ Iki, aho Davidi emwitanga Mfumwa, eokaze wa mwanawe?”

⁴⁶ Tehena mntu eidime kumgharusha kintu; kurafuma uo msi, tehena mntu eidime kumvwija kintu kangi.