MATAYO 20 - Chasu New Testament 1967

Mfwanano wa vaimi he mghunda wa mizabibu

¹ “Ambu vufumwa vwa uko wanga vwefwanane na mwenye kaa, erokie chaheyavo kere kuraenda vaimi, avatonje he mghunda wakwe wa mizabibu.

² Ekinaaghane na vala vaimi iti msi mwonzi enevainka dinari mwe, akavatuma he mghunda wakwe wa mizabibu.

³ Akafuma kangi sa igheri la saa ntatu, akavona vangi veimuke he kiete vesina ndima,

⁴ avo navo akarevati, ‘Tongani na unywi he mghunda wangu wa mizabibu, ninemuinka kiringanyo chenyu.’ Vakatonga.

⁵ Akafuma wa sa igheri la saa mtandatu na saa kenda ekiraketa huvo.

⁶ Akafuma kangi sa igheri la saa ikumi na mwe, akavona vangi veimuke, akavati, “Hanini mwereimuka msi di mwesina ndima?”

⁷ Vakamti, ‘Ni kila hesina mntu etuendie.’ Akavati, ‘Tongani na unywi he mghunda wa mizabibu.’

⁸ Hekinaswe, mwenye mghunda wa mizabibu akamti ula mreimukia, ‘Itanga vaimi uvaghavie mhako wavo; uvokie vala va nyuma mhaka ufike vala va kuvoka.’

⁹ Vala va saa ikumi na mwe vakaza, kila mntu akainkwa dinari.

¹⁰ Vala va kuvoka vekiza, vakadunganya iti vo veneinkwa kukela: mira hata vo vakareinkwa kila mntu dinari.

¹¹ Vekinainkwe, vakamdengeretia ula mwenye kaa,

¹² vekiti, ‘Ava va nyuma verongie ndima saa mwezu du, nawe ukarevaringanya na uswi twelie vwasi na kusenuka msi wose di.’

¹³ Naye akagharusha, akamti mmwe wavo, ‘Mbwiaa, sikuishije; tetuaghane dinari?

¹⁴ Ghuha kila e chako utonge; natakunda kumunka uu wa nyuma cheringane na chako.

¹⁵ Kana tekinitara kuketa na mari yangu sa vuntu nekunda? Kana iziso lako lina kiru kila mi ne wedi?’

¹⁶ Nirehuvo, va msirikijo veneoka va kuvoka, na vaa kuvoka veneoka va msirikijo.”

Yesu erota ka katatu mburi ya kifwa chakwe

¹⁷ Aho Yesu ekikwea noko Yerusalemu, ahi nzieni akavatika vala varateri ikumi na veri njama, akavati,

¹⁸ “Rerehani, tukwea noko Yerusalemu, na Mwana wa Mntu eneinkijwa he vabaha va vatasi na vaandiki, navo venemchwia mburi ya kufwa;

¹⁹ kangi venemwinkija he Vakiisanga, vamsole na kum’bigha viboko na kumvamba he msalaba, mira msi wa katatu enevuka he vefwie.”

Mitanjije ya kuenda shima ya ili isanga

²⁰ Niho mlala wavo vana Zebedayo, akamswia hamwe na vanawe, akamdunkutia na kumtanja kintu.

²¹ Akamti, “Uendani?” Akamti, “Azera iti ava vana vangu veri, uko he vufumwa vwako, mmwe aikae mkono wako wa kume, na ungi mkono wa kumoso.”

²² Yesu akagharusha, akati, “Temumanyije cho mwetanja. Muidima kunwia kikombe kila nenenwia? Vakamti, “Tuidima.”

²³ Akavati, “Kididi munenwia kikombe changu, mira kuikaa mkono wangu wa kume kana wa kumoso, siidima kumuinka, esire vala veringanyijwe ni Vava wangu.”

Vubaha vwa idi

²⁴ Niho vala ikumi vekisikia huvo, vakavavihiwa vala vandughu veri.

²⁵ Mira Yesu akavaitanga, akati, “Mwemanyije iti vabaha va Vakiisanga vevatetia kwa nzinya, na vabaha vavo vevabinusha.

²⁶ Mira unywi si huvo! esire ula eenda kuoka m’baha wenyu aoke mndima wenyu;

²⁷ na kila mntu eenda kuoka mrongori wenyu, aoke mzoro wenyu;

²⁸ ambu ni sa vuntu Mwana wa Nntu esizie kutumikiwa, esire kutumikia, na kuinkija moo wakwe uoke irivi la vajinki.”

Matuntu veri veinkwa kuvona

²⁹ Aho ekifuma uko Yeriko, luvungano lubaha vakamratera.

³⁰ Hekina matuntu veri veikee si mbaimbai he nzia; vekisikia iti Yesu evecha, vakaitanga na izii ibaha vekiti, “Mfumwa, Mwana Davidi, utuvoneie!”

³¹ Luvungano vakavabohija iti vahuje. Mira vo vakazika lonza, vekiti, “E, Mfumwa, Mwana Davidi, utuvoneie!”

³² Yesu akaimuka, akavaitanga, akati, “Muenda nimuketieni?”

³³ Vakamti, “Mfumwa, tuenda iti meso etu atambarujwe.”

³⁴ Yesu akavaondia, akakunta meso avo. Hala indi vakavona, vakamratera.