MATAYO 18 - Chasu New Testament 1967

Kuchejwa kukuduisha

¹ He saa ila, varateri vakamswia Yesu vekiti, “He vufumwa vwa uko wanga, m’baha ni uhi?”

² Akaitanga kajana akakavika ghati hevo,

³ akavati, “Kididi nimutio, Mwekisagharuka mukaoka sa vujana, temukaingie neri he vufumwa vwa uko wanga.

⁴ Heicho, ula ekuduisha ye mwenye sa aka kajana, niye m’baha he vufumwa vwa uko wanga.

⁵ Na ula eghuhia kajana kamwe sa aka vuntu vwa izina langu, nimi anighuhia.”

Irunge la ibigho la kuhosha vangi

⁶ “Mira ula emhosha mmwe wa ava vadori veniitikije, chemvaie achungwe loa lubaha he singo, na kunyirishwa he bahari hantu heseishe.

⁷ Vwasi vwa si ii he vuntu vwa vintu vyehosha; ambu vintu vyehosha tevikashighe kuza, mira vwasi vwa ula eneete kintu chehosha.

⁸ Kakicha mkono wako kana kughu kwako kwekikuhosha, kuchwe ukutaghe noko hae; ambu ni keba kuingia he nkalamo wesovekiwe ni mkono kana kughu, kukela wena mikono miri kana maghu meri wekitaghwa he moto wa kae.

⁹ Na kakicha iziso lako lekikuhosha, ling’ole, ulitaghe noko hae; ambu ni keba kuingia he nkalamo na iziso imwe, kukela wena meso meri wekitaghwa he gehena.”

¹⁰ “Rerehani, musibere mmwe wa ava vadori; ambu nimutio, Vamalaika vavo uko wanga misi yose verereha vusho vwa Vava wangu eho uko wanga.

¹¹ Ambu Mwana wa Mntu ezie kukania kila chekitekie.”

Mfwanano wa igonji letekie

¹² “Mutize? Mntu ena magonji ighana, imwe lekiteka tekashighe ala makumi kenda na kenda, akatonga he ntuvi kuraenda lila letekie?

¹³ Na ekinalivona, kididi nimutio, Eizihirwa vuntu vwalo kukela ala makumi kenda na kenda esitekie.

¹⁴ Nirehuvo, tekiiziha he Vava wenyu wa uko wanga iti mmwe wa ava vadori ateke.

Chetara kuvaketia vabanu

¹⁵ Na mndughu wako ekiteshanya hewe, tonga umchunde we naye mweho venye; ekikusikia, wamvona mndughu wako.

¹⁶ Kakicha takusikia, tikawa mntu mmwe kana veri hamwe nawe, nesa kila kiteto kikoloke kwa kutetiwa vuonwa ni vantu veri kana vatatu.

¹⁷ Ekisavasikia avo, vwira luvungano, na ekisasikia hata luvungano, naoke hewe sa mwiisanga na mreghuha kodi.

¹⁸ Kididi nimutio, Chose mwenechunga aha he masanga, hata uko wanga kinerachungwa; na chose mwenechungua aha he masanga, na uko wanga kinerachunguwa.

Kuomba kwa vumwe

¹⁹ “Kangi nimuvwira kuti, veri he unywi vekiaghana aha he masanga he kintu chochose vekiomba, venekiketiwa ni Vava wangu wa uko wanga.

²⁰ Ambu hantu veri kana vatatu vevungane vuntu vwa izina langu, nami nirewaho ghati hevo.

Kiringanyo cha kushighia na mfwanano wa mzoro mvivi

²¹ Niho Petro akamswia, akamti, “Mndughu wangu ekiniteshanyija, ninemshighia kantu kangahi? mhaka kantu kafungate.”

²² Yesu akamti, “Sikuvwira iti ni kantu kafungate, mira mfungate ka makumi mfungate.

²³ He vuntu uvwo, vufumwa vwa uko wanga vwefwanane na mfumwa eendie kuringanya itiro na vazoro vakwe.

²⁴ Aho ekivoka kutara, akaetiwe mntu mmwe eavwa talanta viku ikumi.

²⁵ Ekinasove cha kuiha, mzuri wakwe akaazera iti ataghwe ye na mche na vana vakwe na vyose ena navyo, nesa rando iihwe.

²⁶ Niho ula mzoro akagwa hala si, akamdunkutia, ekiti, ‘Mfumwa, nisikija ambu ninerakuiha vyose.’

²⁷ Mzuri wa ula mzoro akamwondia, akamchungua, akamshighia ila rando.

²⁸ Ula mzoro akafuma, akamvona mghenji emwava dinari ighana, akamgura akamdoma, akamti, ‘Niiha ila rando!’

²⁹ Niho ula mzoro mghenji akagwa he maghu akwe, akamsemba ekiti, ‘Nisikija ambu ninekuiha vyose.’

³⁰ Mira ye asikunde, akamtika akamgera he kichungo mhaka ekineiha ila rando.

³¹ Niho vazoro vaghenji vekivona vila vyeketike, vakawajwa mno; vakatonga he mzuri wavo, vakamvwirira vyose vyeketike.

³² Niho mzuri wakwe akamwitanga, akamti, ‘We mzoro mvivi, nekushighie we ila rando yose, ukananisembe;

³³ hama we techekuvaie kumwondia mzoro mghenji, sa vuntu mi nakuondia we?’

³⁴ Mzuri wakwe akakwewa ni oro, akamwinkija ha varerisha vwasi, mhaka ekineiha ila rando yose.

³⁵ Nirevwo vuntu Vava wangu wa uko wanga enemuketia unywi, mwekisashighiana kwa ngoro, kila mntu na mndughu wakwe.”