MATAYO 17 - Chasu New Testament 1967

Kukoranyika fwani

¹ Hekivecha misi mtandatu, Yesu akavaghuha Petro ne Yakobo ne Yohane mjinawe; akatonga navo he ntuvi ndeza vo venye.

² Akakoranyika fwani yakwe mozya hevo, vusho vwakwe vukamekenisa sa izuva, na suke jakwe jikaoka nyewa chwe sa kianga.

³ Niho Mose ne Elia vakavafumia, vakagaya naye.

⁴ Petro akagharusha, akamti Yesu, “Mfumwa, ni chedi uswi kuikaa aha! Kakicha wekikunda, ninejenga aha vujumba vutatu, kako kamwe, na kakwe Mose kamwe, kamwe kakwe Elia.”

⁵ Echeri teta, ijumbi ijewa likavagushija mvuri, na izii likafuma he lila ijumbi lekiti, “Uu ni Mwanangu mkunde wangu nemwizihirwe, msikijeni ye.”

⁶ Vala varateri vekisikia huvo, vakagwa vakasoma vusho si, vakafoleka mno.

⁷ Yesu akaza, akavakunta ekiti, “Vukani, musifoleke!”

⁸ Vekivusha meso avo, tevevonie mntu ungi, esire Yesu mwenye.

⁹ Vekisea he ntuvi, Yesu akavakokontia ekiti, “Musiremvwira mntu icho mwavonyeshwa, mhaka Mwana wa Mntu ekinevuka he vefwie.”

¹⁰ Varateri vakwe vakamvwija vekiti, “Cheikee ze hala vaandiki veti, kimtara Elia arongeza?”

¹¹ Akagharusha, akavati, “Kididi Elia enerongaza, naye enehareha vyose.

¹² Mira nimutio, ‘Elia akenja kuza,’ vasimtwarije, mira vakamketia vyose sa vuntu veenda. Nirevwo vuntu Mwana wa Mntu naye etonga kurarishwa vwasi hevo”

¹³ Niho varateri vakatwarija iti eteta navo mburi yakwe Yohane M’batizi.

Kubanjwa kwa m’bwange ena mpepo ya kisa

¹⁴ Vekinafikie luvungano, mntu mmwe akamzia, akamdunkutia ekiti,

¹⁵ “Mfumwa, umvoneiye mwana wangu, ambu egwa kisa, na kula vwasi haiwa. Anagwa he moto na he mpombe kantu kajinki.

¹⁶ Nikamwete he varateri vako, vasiidime kum’banja.”

¹⁷ Yesu akagharusha, akati, “Unywi lukolo lwesina mwitikijo, lwehotoke; niikajanye na unywi mhaka rini? Nimugumirijije mhaka rini? Mweteni aha hemi.”

¹⁸ Yesu akabohija ila mpepo, nayo ikafuma heye; ula m’bwange akabanda kuvokia saa ila ila.

¹⁹ Niho varateri vakwe vakamswia mpiso, vakammti, “Hanini uswi twekisaidima kuifunya”

²⁰ Yesu akavati, “Ni vuntu vwa kuduikiwa mwitikijo kwenyu. Ambu, kididi nimutio, Mwekiketa mwitikijo weringane na ntembe ya haradali, munevwira ntuvi ii, ‘Vuka aha utonge na kula, nayo inevuka,’ neri tehekakete kintu chehera he unywi. [

²¹ Mira mbare ii teifuma, esire he kuomba na kukuima.”]

Yesu erota ka keri mburi ya kifwa chakwe

²² Navo aho veho uko Galilaya, Yesu akavati, “Mwana wa Mntu etonga kurainkijwa he mikono ya vantu;

²³ navo venemkoma, mira msi wa katatu enevuka he vefwie.” Vakasononoya mno.

Eiha kodi ya Hekalu

²⁴ Vekinafike Kapernaumu varesanga nusu shekeli vakamswia Petro, vakati, “Mcheji wenyu ye teinkija nusu shekeli?”

²⁵ Akati, “Einkija.” Ekiingia he nyumba Yesu akarongamvwija, ekiti, “Simoni, we utize? Vafumwa va isanga veghuha kodi kana msango he vantu vahi, he vana vavo kana he vagheni?”

²⁶ Niho Petro akamti, “Kakicha ni huvo, vana tekivatara.

²⁷ Mira, nesa tusivavihije, tonga he bahari ugere ndoana, iyo samaki yeneronga kwea uighuhe; wekiiasamija momo wayo unevona shekeli; uighuhe, uvainke hantu hangu na hako.”