MATAYO 16 - Chasu New Testament 1967

Yesu esua kuronga luvengo

¹ Vafarisayo na Vasadukayo vakaza kumghesha; vakamsemba avavonyeshe luvengo lwefuma uko wanga.

² Akagharusha, akati, [Hekiswa muti, “Yavo heneangaa, ambu majumbi erotome,”

³ na chaheyavo muti, “Yoo heneketa kiryanzoni, ambu wanga herotome kangi hejiririte.” Unywi valung’ong’o, muidima kutwarija fwanyanyi ya isanga, hama maluvengo a igheri ili temuidima kuamanya?]

⁴ Lukolo luvivi lweshinda, luenda luvengo; telukainkwe luvengo neri, esire lula lwakwe Yona. Akavashigha akatonga.

Yesu ebohia kusatwarija kwa varateri

⁵ Varateri vakwe vakatonga sela ila, vakaivaa kutika mikate.

⁶ Yesu akavati, “Rerehani, kurindeni he chachu ya Vafarisayo na Vasadukayo!”

⁷ Vakakanana venye na venye, vekiti, “Nikila twasatika mikate.”

⁸ Yesu akamanya, akavati, “Unywi venye mwitikijo mghere, hanini mwekanana venye na venye iti ni kila mwasatika mikate?

⁹ Temunatwarija, neri temukumbuka ila mikate misano he vala viku visano; na vikapu mwetotole ne vingahi?

¹⁰ Neri ila mikate mfungate he vala viku vine, na vikapu mwetotole neki vingahi?

¹¹ Cheikee ze mwekisatwarija iti si vuntu vwa mikate, aho nekumuti, ‘Kurindeni he chachu ya Vafarisayo na Vasadukayo?’”

¹² Niho vakajughukiwa iti tetetie cha kukurinda he chachu ya mikate, esire he michejire ya Vafarisayo na Vasadukayo.

Petro evonyesha iti Yesu ni Kristo

¹³ Yesu akatonga mondo wa Kaisaria Filipo, akavavwija varateri vakwe, akati, “Vantu veti Mwana wa Mntu ni muni?”

¹⁴ Vakati, “Kumwe veti u Yohane M’batizi, kumwe u Elia, na vakumwe, u Yeremia kana mmwe wa he varoti.”

¹⁵ Akavati, “Na unywi muniti mi ni muni?”

¹⁶ Niho Simoni Petro akagharusha, akati, “We u Kristo Mwana wa Mrungu mwenye moo.”

¹⁷ Yesu akagharusha, akati, “U mrela vwedi Simoni mwana Yona; ambu si mwiri na sakame vyekufunukurire huvo, esire Vava wangu wa uko wanga.

¹⁸ Nami nimutio, ‘We niwe Petro, na he ili ikamba ninejenga ho kanisa yangu, neri mpenge ja uko he nkoma tejikalizime.’

¹⁹ Nami ninekunka funguo ja vufumwa vwa uko wanga, kila wenechunga kunu he masanga, hata uko wanga charechungwe, na kila wenechungua kunu he masanga, hata uko wanga charechunguwe.”

²⁰ Niho akakokontia varateri vakwe iti vasiremvwire mntu kuti ye niye Kristo.

Yesu erota kifwa chakwe na kuvuka he vefwie

²¹ Kuvokia ilo igheri, Yesu akavoka kuvavonya varateri vakwe iti kimtara kutonga Yerusalemu, arishwe mavwasi mangi ni vaghosi na vabaha va vatasi na vaandiki, na kukomwa, msi wa katatu avuke he vefwie.

²² Petro akamtika njama, akavoka kum’bohija ekiti, “Icho hai Mfumwa, ivyo vyesikakufikie!”

²³ Mira ye akagharuka, akamti Petro, “Vuka nyuma hemi, Shetani, unihosha ambu turirikana vya ki Mrungu, esire vya ki vantu.”

Mwitango wa kukukana

²⁴ Niho Yesu akavati varateri vakwe, “Mntu eenda kuniratera, akukane ye mwenye, atike msalaba wakwe, aniratere.

²⁵ Ambu ula eenda kukija moo wakwe eneutesha, na ula enetesha moo vuntu vwangu, eneuvona.

²⁶ Hena lumazo ani, mntu ekivona mari ya masanga ose, mira ekitesha moo wakwe? Kana mntu enefunyani hantu ha moo wakwe?

²⁷ Ambu Mwana wa Mntu eneza na vamalaika vakwe, ena na ngazo ya Vavee, niho enemriha kila mntu kiringanyo cha mirongire yakwe.

²⁸ Kididi nimutio, ‘Hena ava veimuke aha vakumwe vesikasaghe kifwa, mhaka vavone Mwana wa Mntu ekiza he vufumwa vwakwe.’”