MATAYO 15 - Chasu New Testament 1967

Yesu egharusha ishagho la kusagura menda

¹ Niho Vafarisayo na vaandiki vefuma Yerusalemu vakamswia Yesu, vekiti,

² “Hanini varateri vako vekonda viziomo vya vazima? Ambu vekila kijo teveoja mikono.”

³ Akagharusha, akavati, “Hanini na unywi mwekonda iamoro la Mrungu vuntu vwa menda enyu?

⁴ Mrungu eazere kuti, ‘Vikia vaveo na mlala wenyu shima, na, Enemrara vavee kana mlala wavo nafwe.’

⁵ Mira unywi muti, Mntu ekimti vavee kana mlala wavo kuti, ‘Kila chekitara kukughenja, chaoka itasi,’

⁶ huvo kive asimvikiewa vavee na mlala wavo shima; mukavusha kiteto cha Mrungu vuntu vwa viziomo vya vazima venyu.

⁷ Unywi valung’ong’o, ni chedi kila Yesaya erotie he mburi yenyu, ekiti,

⁸ ‘Ava vantu venishimia na myomo; Mira ngoro javo jiho hae nami;

⁹ Navo venitasa sutwa, Vekicheja michejire ya maazero a kivantu.’”

¹⁰ Akaitanga mavungano, akavati, “Sikijeni, mutwarije!

¹¹ Kila cheingia he momo, sicho chemgera mntu kivivi, mira kila chefuma he momo, nicho chemgera mntu kivivi.”

¹² Niho varateri vakwe vakamswia, vakamti, “Wemanyije iti Vafarisayo vekinasikie kila kiteto, vavihiwa?”

¹³ Akagharusha, akavati, “Kila chesihandiwe ni Vava wangu wa uko wanga kinejutwa.

¹⁴ Vashigheni avo ni matuntu, verongorira matuntu vaghenji. Mira ituntu lekirongorira ituntu mghenji, vose veri venegwa he ikongo.”

¹⁵ Petro akagharusha, akamti, “Tuhererejije uo mfwanano.”

¹⁶ Yesu akavati, “Kave na unywi mhaka iki temunatwarija?

¹⁷ Temumanyije iti kila chevechija he momo kivechija he ndeni, na kutaghwa he choo?

¹⁸ Mira vila vyefuma he momo, vifuma he ngoro; ivyo nivyo vyemjiraja mntu.

¹⁹ Ambu he ngoro hefuma madunganyo mavivi: kukoma, kushinda, kushisha, kuiva, kuchungija mongo na viraro.

²⁰ Ivyo nivyo vyemjiraja mntu, mira kula na mikono yesiojijwe, tekumjiraja mntu.”

Kubanjwa kwa m’bora Mkanani

²¹ Yesu akavuka uko akatonga mondo wa Tiro na Sidoni.

²² Aho hekina mche wa Kikanani, efuma he mihaka ya lila isanga, akamzia, akamwiyaghia ekiti, “Mfumwa, mwana Davidi, univoneie! Mwana wangu wa kibora egurirwe ni mpepo.”

²³ Naye temgharushe ni. Varateri vakwe vakamswia, vakamsemba vekiti, “Mwaghanye ambu etukekesa aho nyuma.”

²⁴ Naye akagharusha, akati, “Situmiwe hangi mi esire he magonji a nyumba ya Israeli etekie.”

²⁵ Naye akaza, akamdunkutia ekiti, “Mfumwa, nighenja!”

²⁶ Mira ye akagharusha, akati, “Si chedi kughuha kijo cha vana uviritie maguro.”

²⁷ Akati, “Yee Mfumwa, mira hata maguro erala vibendo vila vyegwa hala si he meza ja vazuri vao.”

²⁸ Niho Yesu akagharusha, akamti, “Mcheku, mwitikijo wako ni m’baha, nakikuokie sa vuntu wekundie.” Mwana wakwe akabanda saa ila ila.

Vajinki vebanjwa

²⁹ Yesu akavuka uko, akafika mbaimbai ya bahari ya Galilaya; akakwea he ntuvi, akaikaa si.

³⁰ Mavungano mangi vakamswia: veholoje, matuntu, vesiidimateta, venye viema na vangi vajinki, vakavavika he maghu akwe Yesu, naye akavabanja;

³¹ niho lula luvungano lukamaka vekivona iti vesiidimateta veteta, venye viema vebanda, veholoje vetonga, na matuntu vevona; vakamkaza Mrungu wa Israeli.

Kuighushwa kwa vantu viku vine

³² Yesu akaitanga varateri vakwe, akati, “Niondia luvungano, ambu iki ni misi mitatu verena nami, neri vesina chala, nami sikunda kuvaaghanya vesinala, vakaresempukia nzieni.”

³³ Varateri vakwe vakamti, “Tuvonia hi mikate mijinki aha nyika, yekoloka kuighusha luvungano lubaha huvu?”

³⁴ Yesu akavati, “Muna mikate mingahi?” Vakati, “Mfungate na vusamaki vughere.”

³⁵ Akavaazera luvungano vaikae si.

³⁶ Akaghuha ila mikate mfungate na vula vusamaki, akaanjela, akavibendua, akavainka varateri vakwe, varateri navo vakainka mavungano.

³⁷ Vakala vose, vakaighuta; vakatoa vibendo vyeshele, vakaizuja vikapu mfungate.

³⁸ Na vala velie neki va kiume viku vine, kushigha vache na vana.

³⁹ Akavaaghanya mavungano, akaingia he ngilawa, akatonga mondo wa Magdala.