MATAYO 13 - Chasu New Testament 1967

Mfwanano wa mhandi

¹ Msi ula Yesu akafuma he nyumba, akaikaa si mbaimbai ya bahari.

² Vantu vajinki vakamvungania, mhaka akaingia he ngilawa, akaikaa si, na ala mavungano a vantu akaimuka mbaimbai ya bahari.

³ Akavavwira mburi nyingi kwa mifwanano, ekiti, “Mhandi efumie kurahanda mbeu jakwe.

⁴ Aho ekihanda mbeu kumwe jikagwa mbaimbai ya nzia, ndeghe jikaza jikajila.

⁵ Jingi jikagwa he mrarabwe, hantu hesina msau mungi: jikamea fia, kila hesina msau weseie.

⁶ Izuva lekinavae jikanyaruka, kila jesina miji jikaoma.

⁷ Jingi jikagwa he mivwa; na ila mivwa ikaeha, ikajibandanya.

⁸ Jingi jikagwa he msau wedi, jikagera ntunda, mwe ighana, ingi makumi mtandatu, na ingi makumi matatu.

⁹ Mwenye masikio nasikie.”

Cheshigha echeja kwa mfwanano

¹⁰ Varateri vakwe vakamzia, vakamti, “Hanini weteta navo kwa mifwanano?”

¹¹ Akagharusha, akavati, “Unywi mweinkiwe kumanya mpiso ja vufumwa vwa uko wanga, mira vo teveinkiwe.

¹² Ambu ula ena kintu eneinkwa, naye eneongejijwa fa; mira ula esina, hata kila ena nacho eneghumbwa.

¹³ Heicho niteta navo kwa mifwanano; kila vekirereha tevevona, na vekisikija tevesikia, neri kutwarija.

¹⁴ Na kiteto cha mroti Yesaya kikoloka hevo, cheti, Kusikia munesikia, mira temukatwarije; Kurereha munerereha, mira temukavone.

¹⁵ Ambu ngoro ja ava vantu jagirisima, Na masikio avo teesikia nezo, Na meso avo veshinjije; Nesa vasirevona kwa meso avo, Vakasikia na masikio avo, Vakatwarija na ngoro javo, Vakagharuka, nikavakija.

¹⁶ Mira vwedi ni vwa meso enyu, kila evona; na masikio enyu kila esikia.

¹⁷ Ambu, kididi nimutio, Varoti vajinki na venye kitea veendie mno kuvona ivi unywi mwevona, vasivivone; na kusikia ivi unywi mwesikia, vasivisikie.”

Mhererejo wa mfwanano wa mhandi

¹⁸ “Ana unywi sikijeni mfwanano wa mhandi;

¹⁹ Kila mntu esikia kiteto cha vufumwa asikitwarije, ula mvivi eza apekule kila chehandiwe he ngoro yakwe; uo niye ahandiwe hafuhi na nzia.

²⁰ Na ula ehandiwe he mrarabwe, uo niye ula esikia kiteto, akakighuhia hala indi na kuizihirwa;

²¹ mira heye tehena miji, ekiikaa du kakenda; hekiza igheri la mavwasi kana kurierishwa vuntu vwa icho kiteto, egwa hala indi.

²² Na ula ehandiwe he mivwa, uo ni ula esikia icho kiteto mira mabinuko a si ii, na kuishwa ni mari vebandanya icho kiteto, kisigere.

²³ Na ula ehandiwe he msau wedi, uo ni ula esikia icho kiteto akakitwarija; uo niye egera ntunda, mmwe ighana, ungi makumi mtandatu, ungi makumi matatu.”

Mfwanano wa mani

²⁴ Akavafunyija mfwanano ungi, ekiti, “Vufumwa vwa uko wanga vwefwanane na mntu ehandie mbeu jedi he mghunda wakwe.

²⁵ Mira vantu vekinashinjie, hakaza mzo wakwe, akahanda mbeu ya mani ghati he ngano, mani nao ukavoneka.

²⁶ Uko nyuma ngano yekieha na kugera, ala mani nao akavoneka.

²⁷ Niho vandima va ula mwenye nyumba vakatonga vakamti, ‘Mfumwa, tuhandie mbeu yedi he mghunda wako? Hama mani afumahi hewo?’

²⁸ Akavati, ‘Ni munzo eketie huvo’ Vandima vakamti, ‘Uenda tutonge tureavunganya?’

²⁹ Akavati, ‘Hai, musirevunganya mani, hangi mukajutanya hamwe na ngano.

³⁰ Shighani viehijanye mhaka igheri la lufindiki; na igheri la lufundiki ninevati varechwa: Rongavunganyani mani muachunge miagho, muashote; mira ngano ivunganyeni he gu yangu.’”

Mfwanano wa mbeu ya haradali na chachu

³¹ Akavafunyija mfwanano ungi, ekiti, “Vufumwa vwa uko wanga vwefwanane na ntembe ya haradali, mntu eighuhie akaihanda he mghunda wakwe;

³² nayo ni ndori kukela mbeu jose, mira yekieha, ioka mbaha kukela mbogha jose, ioka mti, hata madeghe eza kujenga kashasha he matambi awo.”

³³ Akavavwira wa mfwanano ungi, “Vufumwa vwa uko wanga vwefwanane na chachu, mntu wa kiche eighuhie, akaisankanya na muchu ngero ntatu, muchu wose ukakararata.”

³⁴ Ivyo vyose Yesu evwirire mavungano kwa mifwanano, esire kwa mifwanano tevavwirire kintu,

³⁵ nesa kikoloke kila chetetiwe ni mroti, ekiti, Ninevushija momo wangu kwa mifwanano, Nineteta vila vyevisike too kurumbwa kwa masanga.

Mhererejo wa mfwanano wa mani

³⁶ Igheri Yesu akaaghanya mavungano, akaingia na nyumba. Varateri vakwe vakamswia, vakati, “Tufumbulie mfwanano wa ala mani a he mghunda.”

³⁷ Akagharusha akati, “Ula mrehanda mbeu jedi ni Mwana wa Mntu;

³⁸ ula mghunda ni si ii; jila mbeu jedi ni vana va kifumwa; na ala mani ni vana ula mvivi;

³⁹ ula mnzo ehandie, ni Shetani; lufindiki ni mkengelejo wa si ii, na vala vafindiki ni vamalaika.

⁴⁰ Heicho sa vuntu mani evunganywa na kushotwa he moto, nirevwo vuntu na he mkengelejo wa si ii cheneoka.

⁴¹ Mwana wa Mntu enetuma vamalaika vakwe, navo venevunganya mavihijo ose na vala vehira vivivi kuvafunya he vufumwa vwakwe,

⁴² na kuvafera he iziko la moto, niho heneketa kuwela na kukereresa majegho.

⁴³ Niho venye kitea veneangaa sa izuva uko he vufumwa vwa Vava wavo. Mwenye masikio nasikie.”

Mfwanano wa ndungu, lulu na lwavu

⁴⁴ “Kangi vufumwa vwa uko wanga vwefwanane na ndungu yevisike he mghunda, mntu ekinaivone akaishiia; kwa kuizihirwa, akatonga akatagha vyose ena, akazora ula mghunda.

⁴⁵ “Kangi vufumwa vwa uko wanga vwefwanane na msusuriji eenda lulu yedi;

⁴⁶ naye ekinavone lulu mwe ya zora mbaha, akatonga, akatagha vyose ena, akaizora.”

⁴⁷ “Kangi wa, vufumwa vwa uko wanga vweikee sa lwavu lwegerirwe he bahari, lukavunganya ja kila mbare.

⁴⁸ Lwekinaizue vakalutuja na nkandeni, vakaikaa si, vakavunganya jila jedi he ntanu, mira jila mbivi vakajitagha.

⁴⁹ Na he mkengelejo wa si ii, nievwo vuntu cheneoka; vamalaika venefuma, vaze kung’ola vavivi ghati he venye singisirya,

⁵⁰ vavataghe na he iziko la moto; niho heneketa kuwela na kukereresa majegho.”

⁵¹ Yesu akavavwija, “Ivyo vyose mwavitwarija?” Vakamti, “Yee!”

⁵² Niho akavati, “Kila mwandiki ena icha la vufumwa vwa uko wanga, efwanane na mwenye nyumba, eng’ola he ndungu yakwe vintu vishaa na vya kae.”

Yesu esuwa Nazareti

⁵³ Niho Yesu ekinakenje iyo mifwanano, akafuma, akatonga.

⁵⁴ Ekinafike he isanga lavo, akavacheja he sinagogi yavo; vakamaka, vakati, “Uu afunyahi kiugho na nzinya vyeringane huvu?

⁵⁵ Uu si mwana wa ula mseremala? Mlala wavo si ula eitangwa Maria? Na vajinawe si Yakobo ne Yose ne Simoni ne Yuda?

⁵⁶ Na varumburye vose tevewaha hetu? Hama uu avoniahi ivi vyose?”

⁵⁷ Vakamvihiwa. Yesu akavati, “Mroti tesova shima, esire he isanga lavo na kaa havo.”

⁵⁸ Neri uko teketie virumo vijinki, vuntu vwa kusaitikija kwavo.