MATAYO 12 - Chasu New Testament 1967

Kugimbika Sabato

¹ Igheri lila Yesu akavecha he mighunda msi wa sabato; varateri vakwe vakasikia nza, vakavoka kumurura vilengele vya ngano, vakala.

² Vafarisayo vekivona huvo, vakamti, “Rereha! varateri vako veketa kila chesikundijwa msi wa sabato.

³ Akavati, “Temusomie kila Davidi eketie hala esikie nza ye hamwe na vaghenji vakwe?

⁴ Vuntu eingie he nyumba ya Mrungu, akala ila mikate ya luvonyesho esechedi kuliwa niye neri vala vaghenji vakwe, esire vatasi du?

⁵ Kana temusomie he myomongwa iti, msi wa sabato, vatasi he nyumba ya mtaso vekonda sabato, neri chesioka nzune?

⁶ Mira nimutio, Aha hena ye m’baha kukela nyumba ya mtaso.

⁷ Mira nanga mwetwarije viteto ivi vyeti, ‘Cho neenda ni mbonea, neri si itasi,’ temwekivalaha vala vesina nzune.

⁸ Ambu Mwana wa Mntu niye Mfumwa wa sabato.”

Kubanja muntu ena mkono weholoje

⁹ Akavuka aho, akaingia he sinagogi yavo.

¹⁰ Na aho hena mntu ena mkono weholoje. Vakamvwija vekiti, “Ni chedi kubanja mntu msi wa sabato?” nesa vavone cha kumkolila masa.

¹¹ Naye akavati, “Ni ani he unywi ena igonji imwe, lekigwa he ikongo msi wa sabato, esikaligure akalikweja?

¹² Hamao, mntu ekelile igonji kantu ako? Heicho kikundijwa kuketa chedi msi wa sabato.”

¹³ Niho akamti ula mntu, “Ronga mkono wako!” Akauronga; ukabanda, ukaoka wedi sa ula ungi.

¹⁴ Mira vala Vafarisayo vakafuma, vakateta njama vuntu venemkoma.

Mndima esaghurwe

¹⁵ Mira Yesu ekiramanya akahafuma. Vantu vajinki vakamratera, vakabanjwa vose.

¹⁶ Akavakokontia iti vasiremghamba,

¹⁷ nesa kila chetetiwe ni mroti Yesaya kikoloke ekiti,

¹⁸ Rereha, uu ni mndima wangu nemsaghure, Mkunde wangu eye nemwizihirwe; Ninegera Mpeho wangu heye, Naye enebirikira Vakiisanga mburi ya mlaho.

¹⁹ Tekakete nkani, neri tekalonze, Neri mntu tekasikie izii lakwe uko nzieni;

²⁰ Mjungu wenyanyaruke tekaubae, Na ikumbi lefuka tekalijimije, Mhaka ekineete mlaho wekivota;

²¹ Kangi izina lakwe Vakiisanga venelivikia ikuji.”

Yesu ekana iti tekinya mpepo kwa nzinya yakwe Belzebuli

²² Igheri lila akaetiwe mntu mwenye mpepo, ituntu kangi esiidimateta; akam’banja; niho ula esiidimateta akateta na kuvona.

²³ Mavungano akamaka, vekiti, “Uu si mwana Davidi?”

²⁴ Mira Vafarisayo vekisikia, vo vakati, “Uu tefunya mpepo, esire kwa Belzebuli m’baha wa mpepo.”

²⁵ Yesu ekimanya madunganyo avo, akavati, “Kila vufumwa vwekikuomanya vujenye, vukondika; na kila muzi kana nyumba yekikuomanya njenye, yesikaimuke.

²⁶ Kakicha Shetani emfunya Shetani, ekuomanya ye mwenye, na vufumwa vwakwe vuneimuka ze?

²⁷ Nami nekifunya mpepo kwa Belzebuli, hama vana venyu vefunya kwa izina lakweni? Heicho, avo nivo venemulaha.

²⁸ Mira mi nekifunya mpepo kwa Mpeho wa Mrungu, aho vufumwa vwa Mrungu vwamuzia.

²⁹ Kana mntu eidimaze kuingia he nyumba ya mntu mwenye nzinya na kutaha ntanu jakwe, esinaronga mchunga ula mwenye nzinya? niho eneidima kutaha vya nyumba hakwe.

³⁰ “Mntu esiho nami ni mnzo wangu; na mntu esivunganya hamwe nami ezarazara.

³¹ Heicho nimutio, Kiia ibanu na kila kiteto cha falaja, vantu veneshighiwa, esire he kumfalaja Mpeho Wedi tevekashighiwe.

³² Na kila mntu enemteta Mwana wa Mntu kintu, eneshighiwa, mira ula emteta Mpeho Wedi tekashighiwe ye, neri he si ii neri he ila ingi yeneza.

³³ Ughosheni mti kuoka wedi, na ntunda jawo jioke jedi; kana ughosheni mti kuoka mvivi, na ntunda jawo jioke mbivi. Ambu mti umanyikia he ntunda jawo.

³⁴ Unywi lukolo lwa nyoka mwe vavivi, muidimaze kuketa vyedi? Ambu vila vyeizue he ngoro nivyo momo weteta.

³⁵ Mntu wedi he kila chedi ena efunya vintu vyedi; na mntu mvivi, he kila kivivi ena, efunya vivivi.

³⁶ Kila kiteto vantu vekiteta chesina nzia, venekivwijwa he msi wa mlaho.

³⁷ Ambu he viteto vyako, unetarirwa kitea, kangi he viteto vyako unelahwa.”

Esua kuronga luvengo

³⁸ Niho va kumwe he vaandiki na Vafarisayo vakamgharusha, vakiti, “Mcheji, tuenda utuvonyeshe luvengo.”

³⁹ Naye akagharusha, akavati, “Lukolo luvivi, kangi lweshinda, luenda luvengo; telukainkwe luvengo, esire lula luvengo lwa mroti Yona.

⁴⁰ Ambu sa vuntu Yohana eikae he ndeni ya nyangumi misi mitatu na vio vitatu, nirehuvo, Mwana wa Mntu eneikaa ndeni he msau misi mitatu na vio vitatu.

⁴¹ Msi wa mlaho vantu va Ninive veneimuka hantu hamwe na lukolo ulu, navo venelulaha; ambu vo vekinabirikirwe ni Yona, vachwa mti. Na aha hena m’baha kumvecha Yohana.

⁴² Ula msi wa mlaho mfumwa wa kiche wa isanga la mondo wa ishi, eneimuka hantu hamwe na lukolo ulu, alulahe; ambu ye efumie uko hantu masanga ehakane, akaza kusikija kiugho chakwe Salomoni; na aha hena m’baha kumvecha Salomoni.

Mpwasi he miikarire yesikoloke

⁴³ “Mpepo mbivi yekifuma he mntu, ivecha uko hantu hesina mpombe yekienda hantu ha kuhema, isivone.

⁴⁴ Nyuma iti, ‘Ninehunduka he nyumba yangu hantu nefumie,’ yekiza ikicha ireho vula, yehaghiwe na kuhambwa.

⁴⁵ Hala indi itonga kuonja mpepo jingi mfungate, mbivi kuivecha; jiingia na kuikaa ho, na miikarire ya ula mntu ya uko nyuma, ioka mivivi kuvecha ila ya kuvoka. Nivwo vuntu cheneokia ulu lukolo e luvivi.”

Vundughu vwa idi

⁴⁶ Aho ekiteta na luvungano, mlala wavo na vajinawe vakaza, vakaimuka nze, vekienda kuteta naye.

⁴⁷ Mntu mmwe akamti, “Rereha, mlala wenyu na vajinao veimuke nze, veenda kuteta nawe.”

⁴⁸ Akamgharusha ula emvwirire, akamti, “Mlala wetu ni ani, na vajinawa ni vahi”?

⁴⁹ Akavarongia varateri vakwe mkono, akati, “Rereha mlala wetu na vajinawa!

⁵⁰ Ambu ula eronga kila Vava wangu wa uko wanga ekunda, uo niye mjinawa na rumburya na mlala wetu.”