MATAYO 11 - Chasu New Testament 1967

¹ Ingeri aho Yesu ekinakenje kuvaazera varateri vakwe ikumi na veri, akavuka ho akatonga kucheja na kubirikira he mizi yavo.

Yohane M’batizi

² Niho Yohane uko he kichungo, ekinasikie ndima jakwe Kristo, akatuma varateri vakwe kumvwija,

³ “We niwe ula eza, kana tuinde ungi?”

⁴ Yesu akavagharusha akati, “Tongani mumvwire Yohane vila mwesikia na vila mwevona:

⁵ Matuntu vevona, veholoje vetonga, veumbuka vezerijwa, vefwie masikio vesikia, vefwie vevushwa, na vakiva vebirikirwa Mburi Yedi.

⁶ Mrela vwedi ni ula esinivihiwa.”

⁷ Avo vekinatonge, Yesu akavoka kuvwira mavungano mburi jakwe Yohane, kuti, “Mwetongie uko nyika kurarereha ni? Ni ibura lekikushwa ni nkungu?

⁸ Mira mwetongie kurereha ni? Ni mntu edokie suke jenyutume? Rereha, vala vedokie suke jenyutume veho he nyumba ja vafumwa.

⁹ Mira hanini mwekitonga? Ni kuvona mroti? Yee, nimutio, ‘Kuvecha mroti.’”

¹⁰ “Uu niye eandikwe ivi, ‘Rereha, nituma ntume wangu Mozya he kizango chako, Enekuharehia nzia yako mozya hako.’

¹¹ Kididi nimutio, ‘Tehenavuka mntu he vala vemoghiwe ni vache, e m’baha kuvecha Yohane M’batizi; mira ula e mdori he vufumwa vwa uko wanga, ni m’baha kumvecha.’

¹² Kuvokia he misi yakwe Yohane M’batizi mhaka iki, vufumwa vwa wanga vuingiwa kwa nzinya, na venye nzinya nivo vevutaha kwa nzinya.

¹³ Ambu varoti vose na myomongwa verotie mhaka igheri lakwe Yohane.

¹⁴ Na kakicha muenda kuitikija, ye niye Elia ula eneza.

¹⁵ Mwenye masikio esikia nasikie!”

¹⁶ “Mira ulu lukolo nilufwanyanya nani? lwefwanane na vana veho kiete, veitanga vaghenji vavo vekiti,

¹⁷ ‘Twemubighiie mitoriro, mira temuvinie, tukawela neri musiie.’

¹⁸ Ambu Yohane ezie, esila neri esinwa, vakati, ‘Ena mpepo.’

¹⁹ Mwana wa Mntu akaza ekila na kunwa, vakati, ‘Uu ni mreliisha na mwengeji, ni mmbwie wa vareghuha kodi na venye mabanu.’ Heicho kiugho chainkwa kitea ni ndima jacho.”

Vwasi vwa misi yesiitikije

²⁰ Niho akavoka kushagha ila mizi, eyo heyo heketike virumo vyakwe vijinki, kila yesichwie mti.

²¹ “Vwasi vwako Korazini! Vwasi vwako we Betsaida! Ambu, nanga vila virumo vyeketike henyu, vyeketike uko Tiro na Sidoni, vanachwa mti uko kae na kudoka magunia na maivu.

²² Mira nimutio, ‘Kineoka kijangu Tiro na Sidoni kugurumija mabigho a ula msi wa mlaho kukela unywi.’

²³ Nawe Kapernaumu, ngea unekwejwa mhaka uko wanga? Unesejwa mhaka uko si he nkoma. Ambu vila virumo vyeketike hako, nanga vyeketike uko Sodoma, wekireho na yoo ili.

²⁴ Mira nimutio, Kineoka kijangu isanga la Sodoma kugumirija mabigho a ula msi wa mlaho kukela we.’”

Kuoka sa mwana mdori

²⁵ Igheri lila Yesu akagharusha akati, “Nikuanjela Vava, Mfumwa wa uko wanga na wa ii si, nikila ivyo wevavisie vala vena viugho na vechee, mira ukavafunukuriria vana vadori.

²⁶ Yee Vava, ambu icho nicho chekuizihira we.”

Ndima yakwe Yesu

²⁷ “Neinkiwe vyose ni Vava wangu; neri tehena mntu emmanya Mwana, esire Vava, neri tehena mntu emmanya Vava esire Mwana, na kila mntu wose Mwana ekunda kumfunukurira.

²⁸ Nzoni hangu unywi vose mwebinuka na veemewe ni mijigho, ninemutundanya.

²⁹ Kugereni igogolo langu, mukuchejije hemi, ambu mi ni mhoo, kangi nekuduishe he ngoro; niho mwenevona kuizihirwa he ngoro jenyu.

³⁰ Ambu igogolo langu lenyutume, na mjigho wangu wehayame.”