MATAYO 10 - Chasu New Testament 1967

Varateri ikumi na veri veinkwa nzinya, na mazina avo

¹ Akaitanga varateri vakwe ikumi na veri, akavainka nzinya ya kufunya mpepo mbivi, na kubanja kila vuwaji na vusoka vwa kila mbare.

² Na mazina a ntume ikumi na veri ni aa: Wa kuvoka ni Simoni eitangwa Petro ne Andrea mjinawe; Yakobo mwana Zebedayo ne Yohane mjinawe;

³ Filipo ne Bartolomayo; Toma ne Matayo mreghuha kodi; Yakobo mwana Alfayo ne Tadayo;

⁴ Simoni Mkanani ne Yuda Iskarioti, naye niye emliie irenge.

Ndima yavo

⁵ Ava ikumi na veri Yesu evatumie, akavakokontia, ekiti, “He nzia ya Vakiisanga musiretonge, neri he muzi wa Vasamaria musiingie neri mmwe.

⁶ Keba tongani he magonji a nyumba ya Israeli etekie.

⁷ Na he kutonga kwenyu birikirani mwekiti, ‘Vufumwa vwa uko wanga vwazengelela!’

⁸ Bandijani vawaji, vushani vefwie, zerijani veumbuka, funyani mpepo, mweinkiwe sutwa, inkijani sutwa.

⁹ Musitike dhahabu neri fedha neri senti he mifuko yenyu;

¹⁰ neri ibene la kuzokia, neri nkanzu mbiri, neri viratu neri nzata, ambu mndima kuntara ainkwe kijo chakwe.

¹¹ Na muzi wowose kana kamuzi kokose mweneingia, endani iti ni mntu ani aho eve kumughuhia; muikae hakwe mhaka mwekinefuma ho.

¹² Mwekiingia he nyumba ikezyeni.

¹³ Kakicha iyo nyumba cheifwenye, mporere yenyu iikae; kakicha tekiifwenye, mporere yenyu imuhundukie.

¹⁴ Mntu ekisamughuhia neri kusikia viteto vyenyu, mwekifuma he iyo nyumba kana he uo muzi, kukuntani teri yeho he maghu enyu.

¹⁵ Kididi nimutio, ‘Kineoka kijangu, isanga la Sodoma na Gomora kugumirija mabigho a ula msi wa mlaho kukela uo muzi.”

Kurishwa vwasi

¹⁶ “Rereha, nimutuma sa magonji ghati he maghinga; heicho ketani icha sa nyoka, na kuoka vahoo sa nziva.

¹⁷ Kucheini he vantu, ambu venemutonja he vitala, hata kumubighia he sinagogi javo;

¹⁸ kangi, munetikwa mozya he valao na he vafumwa vuntu vwangu, nesa kioke vuonwa hevo na he vaisanga.

¹⁹ Mira aho vekinemutonja kisiremurishe vwasi kudunganya sa vuntu mweneteta, ambu saa iyo muneinkwa cho mweneteta.

²⁰ Ambu si unywi mweteta, esire Mpeho wa Vava wenyu eteta he unywi.

²¹ Na mndughu enemrengeha mjinawe iti akomwe, na vava enemrengeha mwanawe, na vana veneomanya vamoghi vavo iti vavakome.

²² Na unywi munevihiwa ni vantu vose vuntu vwa izina langu. Mira ula enegurumija mhaka msio niye enekia.

²³ Mira vekinemukinya he muzi uu, ahani na he ungi. Kididi nimutio, ‘Temukakenje mizi yose ya Israeli, Mwana wa Mntu esinaza.’”

²⁴ “Mrechejwa temkela mcheji wakwe, neri mzoro temkela mzuri wakwe.

²⁵ Kikoloka mrechejwa ekioka sa mcheji wakwe, na mzoro ekioka sa mzuri wakwe. Ukinakiche vamwitanga mwenye nyumba Belzebuli, va kaa hakwe tevekaitangwe huvo na kukela?”

Etara kufolekwa

²⁶ “Heicho musivafoleke; ambu tehena chevisike chesikarefunukurwa, neri chevisiwe chesikaremanyika.

²⁷ Kila nemuvwirira he kija, kitetieni he kianga, na kila mwesikia kwa kuwewesiwa, kibirikireni wanga he nyumba.

²⁸ Musivafoleke vala vekoma mwiri, vesiidima kukoma na ngoro; keba mfolekeni ula eidima kutesha mwiri hantu hamwe na ngoro he gehena.”

²⁹ “Vuntoronto vwiri tevutaghwa kwa senti mwe? Mira neri kamwezu tekegwa si Vava wenyu esimanyije.

³⁰ Mira unywi, hata nywii ja mitwi yenyu jeretarwa jose.

³¹ Heicho ra, musifoleke; ambu unywi mwekelile vuntoronto vujinki.

³² Ana, kila mntu enizumira he vantu, nami ninemzumira he Vava wangu wa uko wanga.

³³ Mira kila mntu enikana he vantu, nami ninemkana he Vava wangu eho uko wanga.”

Kusaghura chena vwasi na mhako wacho

³⁴ “Musiti nezie kuete mporere he si ii, neri! si zie kuete mporere esire mhandwi.

³⁵ Ambu nezie kulinganya mntu na vavee, na mwana wa kibora na mlala wavo, na mntu na mkwewe.

³⁶ Na vanzo va mntu ni vala va kaa hakwe.

³⁷ Ula emkunda vavee kana mlala wavo kukela mi, tenifwenye; na ula emkunda mwanawe wa kibwange kana wa kibora kukela mi, tenifwenye.

³⁸ Na mntu esitika msalaba wakwe akaniratera, tenifwenye.

³⁹ Ula evona moo wakwe eneutesha, na ula etesha moo wakwe vuntu vwangu eneuvona.”

⁴⁰ Ula emughuhia unywi, enighuhia mi; na ula enighuhia mi, emghuhia ula enitumie.

⁴¹ Ula emghuhia mroti kwa kuti ni mroti, enevona kitumulilo cha mroti; na ula emghuhia mwenye kitea kwa kuti ni mwenye kitea, enevona kitumulilo cha mwenye kitea.

⁴² Na mntu wowose emunka mmwe wa ava vadori na ere kikombe cha mpombe yehoie kwa kuti ni mrateri, kididi nimutio, tekasove kitumulilo chakwe.”