MATAYO 1 - Chasu New Testament 1967

Lukolo lwakwe Yesu Kristo

¹ Kitabu cha lukolo lwakwe Yesu Kristo, mwana Davidi, mwana Abrahamu.

² Abrahamu emmoghie Isaki, Isaki akammogha Yakobo, Yakobo akammogha Yuda na vajinawe;

³ Yuda he Tamari akammogha Peresi ne Zera; Peresi akammogha Hesrom; Hesrom akammogha Aramu;

⁴ Aramu akammogha Aminadabu; Aminadabu akammogha Nashon; Nashon akammogha Salmoni;

⁵ Salmoni he Rahabu akammogha Boazi; Boazi he Ruti akammogha Obedi; Obedi akammogha Yese;

⁶ Yese akammogha mfumwa Davidi. Davidi ula mche wakwe Uria akammogha Salomoni;

⁷ Salomoni akammogha Rehabeamu; Rehabeamu akammogha Abia; Abia akammogha Asa;

⁸ Asa akammogha Yosafati; Yosafati akammogha Yoramu; Yoramu akammogha Uzia;

⁹ Uzia akammogha Yotamu; Yotamu akammogha Ahazi; Ahazi akammogha Hezekia;

¹⁰ Hezekia akammogha Manase; Manase akammogha Amoni; Amoni akammogha Yosia;

¹¹ Yosia akammogha Yekonia na vajinawe, lila igheri la kusamijwa noko Babeli.

¹² Nyuma ya kusamijwa noko Babeli, Yekonia akammogha Shaltieli; Shaltieli akammogha Zerubabeli;

¹³ Zerubabeli akammogha Abihudi; Abihudi akammogha Eliakimu; Eliakimu akammogha Azori;

¹⁴ Azori akammogha Sadoki; Sadoki akammogha Akimu; Akimu akammogha Eliudi;

¹⁵ Eliudi akammogha Eleazari; Eleazari akammogha Matani; Matani akammogha Yakobo;

¹⁶ Yakobo akammogha Yosefu mghosiwe Maria eye emmoghie Yesu eitangwa Kristo.

¹⁷ Heicho, malukolo ose kuvokia Abrahamu mhaka Davidi ni malukolo ikumi na mane; na kuvokia Davidi mhaka kusamijwa noko Babeli ni malukolo ikumi na mane; na kuvokia kusamijwa noko Babeli mhaka Kristo ni malukolo ikumi na mane.

Kumoghwa kwakwe Yesu Kristo

¹⁸ Na kumoghwa kwakwe Yesu Kristo kweokie huvu: Maria mlala wavo eho ezangiwe ni Yosefu, vesinafikiana akavoneka iti ena ndeni kwa nzinya ya Mpeho Wedi.

¹⁹ Na Yosefu m’bwange wakwe, kila e mntu wedi asikunde kumheija, akadunganya kumshigha kwa mpiso.

²⁰ Aho ekidunganya huvo, niho malaika wa Mfumwa akamzia he ndoto, akamti: “Yosefu mwana Davidi, usifoleke kumghuha mwai wako eye Maria, ambu ndeni etikie ni kwa nzinya ya Mpeho Wedi.

²¹ Naye enemogha mwana wa kibwange, unemwitanga, Yesu; ambu niye enekija vantu vakwe he mabanu avo.”

²² Ivyo vyose vyeokie huvo, nesa kila kiteto cha Mfumwa chetetiwe ni mroti kikoloke, ekiti,

²³ “Rereha m’bora hiryo enetika ndeni, Naye enemogha mwana wa kibwange; Na izina lakwe eneitangwa Imanueli;” ni sa kuti, “Mrungu e hamwe na uswi.”

²⁴ Yosefu ekinavuke he lughohe, akaketa sa vuntu eazerwe ni malaika wa Mfumwa, akamghuha mwai wakwe;

²⁵ asimfikie neri, mhaka ekikenja kumogha mwana wa kibwange, akamwitanga YESU.