MARIKO 9 - Chasu New Testament 1967

¹ Akavati, “Kididi nimutio, Hena vakumwe he ava veimuke aha, vesikasaghe kifwa neri, mhaka vekinevona vufumwa vwa Mrungu vwaza na nzinya.”

Kukoranyika fwani

² Hekivecha misi mtandatu Yesu akavaghuha Petro ne Yakobo ne Yohane, akavakweja he ntuvi ndeza vo venye mpiso; akagharuka fwani yakwe mozya hevo;

³ suke jakwe jikamekenisa, nyewa chwe, kiringanyo mreoja suke wa kunu he masanga esiidima kujielija huvo.

⁴ Vakafumiwa ni Elia ne Mose, navo vekigaya ne Yesu.

⁵ Petro akagharusha, akamti Yesu, “Rabi, ni chedi uswi kuikaa aha; na tujenge vujumba vutatu, kamwe kako, kamwe kakwe Mose na kamwe kakwe Elia.”

⁶ Ni hala esivonie chateta, kila veingiwe ni fole mbaha.

⁷ Hakagwa ijumbi, likavagushija mvuri; izii likafuma he lila ijumbi, “Uu ni Mwanangu mkunde wangu, msikieni ye.”

⁸ Hala indi vekirereha uko vasivone wa mntu ena navo esire Yesu mwenye.

⁹ Aho vekisea he ntuvi, akavakokontia vasiremvwira mntu ivyo vevonie, mhaka Mwana wa Mntu ekinevuka he vefwie.

¹⁰ Vakagurisha icho kiteto, vekivwijana vo venye na venye, kuti, “Uko kuvuka he vefwie, ni kutize?”

¹¹ Vakamvwija, vekiti, “Hanini vaandiki veti kimtara Elia arongeza?”

¹² Akavagharusha, akavati, “Ni chaidi, Elia erongeza na kuhundua vyose vushaa; mira wa hamwe na icho, Mwana wa Mntu eandikiwe ze kuti enerishwa mavasi majinki na kuberwa?

¹³ Mira nimutio, Elia akenja kuza, vakamketia vyose veenda sa vuntu eandikiwe.”

Kubanjwa kwa m’bwange ena mpepo ya kisa

¹⁴ Ingeri vekivafikia varateri, vakavona luvungano lubaha lwevajunguluke, na vaandiki vekivwijana navo;

¹⁵ hala indi luvungano lwose vekimvona vakahomborera, vakamsarira, vakamkezya.

¹⁶ Akavavwija, “Muvwijana ni navo?”

¹⁷ Mntu mmwe he lula luvungano akamgharusha, “Mcheji, nemwetie mwanangu hako, ena mpepo yesiteta;

¹⁸ kila igheri yekimgura, imgusha si, akererese majegho, afunye mafuo na kunyonga; nikateta na varateri vako vaifunye, vasiidime.”

¹⁹ Akagharusha, akati, “Unywi lukolo lwesiitikija, niikajanye na unywi mhaka rini? Mweteni hemi.”

²⁰ Vakamwete heye; ekinamvone hala indi ila mpepo ikamgusha kisa, akagwa hala si, akaghangalika ekifumwa ni mafuo.

²¹ Akamvwija vavee, “Evokiwe too rini?” Akati, “Too ere mwana.

²² Na kantu kajinki yanamgusha he moto na he mpombe iti imtishe; mira wekiidima kintu chochose, utuvoneie na kutughenja.”

²³ Yesu akamti, “Wekiidima! Vyose viidimika he ula eitikija.”

²⁴ Hala indi vavee ula mwana akatetisha, akati, “Naitikija, nighenja he kusaitikija kwangu.”

²⁵ Yesu ekivona iti luvungano lusara kuvungana, akabohija ila mpepo mbivi, akaiti, “We mpepo wesiteta na wesisikia, Mi nikuamora: Fuma he uu, neri usireingia wa heye.”

²⁶ Ikaagha, ikamgusha kisa mno, ikamfuma; naye akaikaa sa efwie; va kumwe vakati, “Afwa.”

²⁷ Mira Yesu akamgura mkono, akamvushija; naye akaimuka.

²⁸ Ekinaingie na nyumba varateri vakwe vakamvwija mpiso, “Hanini uswi twekisaidima kuifunya?”

²⁹ Akavati, “Mbare ii teiidima kufuma kwa nzia yoyose, esire kwa kuomba.”

Yesu erota ka keri mburi ya kifwa chakwe

³⁰ Vakafuma uko, vakavecha ghati ya Galilaya; naye teendie hakete mntu emanya.

³¹ Ambu ekivacheja varateri vakwe, akavati, “Mwana wa Mntu etonga kurainkijwa he mikono ya vantu, navo venemkoma, hekivecha misi mitatu, enevuka he vefwie.”

³² Mira vo tevetwarije icho kiteto, vakafoleka kumvwija.

Kuchejwa kukuduisha

³³ Vakafika Kapernaumu; aho eho he nyumba, akavavwija, “Mwekikanana ni uko nzieni?”

³⁴ Vakahuja; ambu kula nzieni vekikanana vo kuti m’baha ni ani.

³⁵ Akaikaa si, akavaitanga vala ikumi na veri, akavati, “Mntu eenda kuoka wa kuvoka, eneoka wa msirikijo he vose, na mndima wa vose.”

³⁶ Akaghuha kajana, akakavika ghati hevo; akakashashata, akavati,

³⁷ “Mntu ekimghuhia mwana mmwe sa uu vuntu vwa izina langu, nimi anighuhia; mntu ekinighuhia mi, simi enighuhia, mira ni ula enitumie.”

Kuchejwa kugumirija

³⁸ Yohane akamgarusha, akamti, “Mcheji, twevonie mntu ekifunya mpepo he izina lako, naye esitonjanya na uswi, tukamsuja kila esitonjanya na uswi.”

³⁹ Yesu akavati, “Musimsuje; ambu tehena mntu eidima kuvusha kirumo he izina langu, kangi hala indi akaidima kuniteta uvivi.

⁴⁰ Ambu ula esituomanya, eho mondo wetu.

⁴¹ Ambu mntu wowose enemuinka unywi kikombe cha mpombe kila mwe vakwe Kristo, kididi nimutio, tekasove kitumulilo chakwe.”

Irunge la ibigho la kuhosha vangi

⁴² “Na ula wowose enemhasha mmwe wa ava vadori veniitikije, keba achungiwe loa lwa he singo yakwe, na kuviritwa he bahari.

⁴³ Na mkono wako wekikuhosha, uchwe; ni keba kuingia he nkalamo wena ihindi, kukela wena mikono miri na kutonga gehena, he moto wesifwa; [

⁴⁴ eho hantu mbunyo yavo yesifwa, neri moto wesifwa.]

⁴⁵ Na kughu kwako kwekikuhosha, kuchwe ambu ni keba kuingia he nkalamo wena kiema, kukela wena maghu meri wekiviritwa he gehena; [

⁴⁶ eho hantu mbunyo yavo yesifwa, neri moto wesifwa.]

⁴⁷ Na iziso lako lekikuhosha, ling’ole, ulitaghe, ambu ni keba kuingia he vufumwa vwa Mrungu na iziso imwe, kukela wena meso meri wekiviritwa na he gehena;

⁴⁸ eho hantu mbunyo yavo yesifwa, neri moto wesifwa.

⁴⁹ Ambu kila mntu enegerwa munyu kwa moto.

⁵⁰ Munyu ni wedi; mira munyu wekisuha muneugerani nesa uoke? Mukete munyu ndeni he unywi, muikae na mporere unywi venye kwa venye.”