MARIKO 6 - Chasu New Testament 1967

Yesu esuwa Nazareti

¹ Akafuma uko akafika he isanga la havo; varateri vakwe vakamratera.

² Msi wa sabato wekinafike, akavoka kucheja he sinagogi; vajinki vakamaka, vekiti, “Uu evonie hi ivi? Kangi, ni kiugho ani iki uu einkiwe? Na ni kini, ivi virumo vibaha vyeketwa ni mikono yakwe?

³ Uu si ula mseremala mwana Maria, mjinawe Yakobo ne Yose ne Yuda ne Simoni? na varumburye teverewaha hetu?” Vakamvihiwa.

⁴ Yesu akavati, “Mroti tesova shima esire he isanga lavo na he ndughu jakwe na kaa havo.”

⁵ Teidime kuketa kirumo neri kimwe uko, esire vawaji vaghere evavikiie mikono, akavabanja.

⁶ Akamaka vuntu vwa kusaitikija kwavo. Akajunguluka he vula vumuzi ekicheja.

Ndima ya ntume ikumi na veri

⁷ Akavaitanga vala ikumi na veri, akavoka kuvatuma veri veri, akavainka nzinya he mpepo mbivi;

⁸ akavaamora iti vasitike kintu cha nzieni, neri kijo, neri ibene, neri pesa he mfuko, esire nzata du;

⁹ mira vadoke viratu; akati, “Musidoke nkanzu mbiri.”

¹⁰ Akavati, “Kila hantu mwengia he nyumba, ikaani ho mhaka mwekinehafuma.

¹¹ Na kila hantu vesimughuhia neri kumusikija, mwekifuma aho, kukuntani teri yeho he maghu enyu, kioke vuonwa hevo.”

¹² Vakafuma, vakabirikira iti vantu vachwe mti,

¹³ vakafunya mpepo nyingi, vakavira vawaji mafuta, vakabanja.

Kifwa ahakwe Yohane M’batizi

¹⁴ Na Mfumwa Herade akasikia ijo mburi; ambu izina lakwe lekimanyike hose, akati, “Yohane M’batizi avuka he vefwie, heicho nzinya ijo jironga ndima heye.”

¹⁵ Vangi vakati, “Ni Elia.” Vangi vakati, “Uu ni mroti, kana ni sa mmwe he varoti.”

¹⁶ Mira Herode ekisikia, akavati, “Yohane ula nemchwie singo, avuka he vefwie.”

¹⁷ Ambu Herode mwenye ekitumie vantu vakamgura Yohane, akamchunga vuntu vwakwe Herodia, mche wakwe Filipo mjinawe, kila emghuhie;

¹⁸ ambu Yohane ekimvwirire Herode, “Tekikundijwa kuikaa na mche wa mjinao.

¹⁹ Nino Herodia akamvikia idifiko, akaenda mimkomire, asivone,

²⁰ ambu Herode emfoleke Yohane, kila emanyije iti ni mntu mwenye kitea ezerire, akamrinda; na ekinamsikije, akaketa matatanyi haiwa; mira ekinamsikija na kuizihirwa.

²¹ Igheri hekinavoneke msi weve, wa kumoghwa kwakwe Herode, akavaharehia venye nguma na maakida na vantu vabaha va Galilaya mbao.

²² Niho mwana Herodia wa kibora, ekinaingie akavina, akamwizihija Herode na vala veikae si naye he ila mbao. Mfumwa akamti ula mbora, “Niomba chochose wekunda, ninekunka.”

²³ Akakurigha heye iti, “Cho weneniomba ninekunka, na ere kibaje cha vufumwa vwangu.”

²⁴ Niho akafuma, akremvwija malala wavo, “Niombe ni?” Akamti, “Mtwi wakwe Yohane M’batizi.”

²⁵ Hala indi akaingia fia he mfumwa, akaomba ekiti, “Nienda uninke iki huvu mtwi wakwe Yohane M’batizi aha he sahani.”

²⁶ Mfumwa akasikia vwasi haiwa, mira vuntu vwa kukurigha kwakwe, na vuntu vwa vala veikae si aho he mbao, asikunde kumwima.

²⁷ Hala indi mfumwa akatuma msikari, akaazera kuete mtwi wakwe.

²⁸ Akatonga akamchwa singo kula he kichungo akaete mtwi wakwe he sahani, akamunka ula m’bora, na ula m’bora akamunka mlala wavo.

²⁹ Varateri vakwe vekinasikie, vakaza, vakaghuha kiimba chakwe, vakaremjika he mbira.

Kuighushwa kwa vantu viku visano

³⁰ Ntume vakavungana hakwe Yesu; vakamvwirira mburi jose verongie, na vyose vechejije.

³¹ Akavati, Nzoni unywi venye hantu ha mpiso hesina vantu, muheme hadori.” Ambu hekina vantu vajinki, veza na vetonga; neri hasikete halia kijo.

³² Vakatonga mpiso noko he ngilawa hantu hesina vantu.

³³ Vantu vakavavona vekitonga; vajinki vakamanya, vakafuma he mizi yose, vakatonga na maghu, vakasara fia vakarongafika.

³⁴ Naye ekisea he ngilawa, akavona luvungano lubaha; akavasikia vwasi, ambu vekiikee sa magonji esina mrisha; akavoka kuvacheja mburi nyingi.

³⁵ Niho hekinaveche saa nyingi ja he msi, varateri vakwe vakamswia, vakati, “Aha ni nyika ntuhu, na iki heswa;

³⁶ vaaghanye ava vantu, nesa vatonge he mighunda na he mizi yeho mondo na mondo, varezora kijo.”

³⁷ Akagharusha akavati, “Vainkeni kijo engaunywi.” Vakamti, “Ngea tutonge turezora mikate ya dinari maghana meri nesa tuvainke vale?”

³⁸ Akavati, “Muna mikate mingahi? Tongani murerehe!” Vekinamanye vakati, “Misano na samaki mbiri.”

³⁹ Akavaazera vavaikaje si vose, marimbi marimbi he mani mavisi.

⁴⁰ Vakaikaa si kilugerere, aha ighana, aha makumi masano.

⁴¹ Akaghuha ila mikate misano na samaki mbiri, akarereha wanga, akainka lutelwedi, akaibendua-bendua, akavainka varateri vakwe iti vavainke; akarevaghavia na jila samaki mbiri vose.

⁴² Vakala vose vakaighuta.

⁴³ Vakatotola vibendo vyebenduke hamwe na vya samaki, vyekoloka sa vikapu ikumi na viri.

⁴⁴ Na vala velie ila mikate ne sa viku visano va kiume.

Yesu evata wanga he bahari

⁴⁵ Hala indi akavatitikija varateri vakwe vaingie he ngilawa, varongore noko sela Betsaida, aho ye ekiaghanya luvungano.

⁴⁶ Igheri ekinavaaghanye akatonga he ntuvi kuraomba.

⁴⁷ Hekinaoke chahemagheri ngilawa yekiho ghati he bahari, naye ekireho mwenye he isanga ijomu.

⁴⁸ Akavavona vekila vwasi he kutonja ngilawa, ambu nkungu yekivafuma na mozya. Hekifika lughojo lwa kane lwa kio akavaswia ekivata wanga he bahari; akaenda kuvavecha.

⁴⁹ Navo vekimvona ekivata wanga he bahari, vakati hangi ni kivuri, vakagera nkunga,

⁵⁰ kila vose vemvonie vakaituka. Hala indi akateta navo, akavati, “Tundanani; nimi, msifoleke!”

⁵¹ Akaingia he ila ngilawa hantu veho, nkungu ikahuja. Vakamaka haiwa he ngoro javo;

⁵² kila vesitwarije mburi ya ila mikate, ambu ngoro javo jeokie nkuji.

Kubanja vantu uko Genesareti

⁵³ Vekinakelanye, vakafika he isanga la Genesareti, vakamukija ngilawa.

⁵⁴ Navo vekinafume he ngilawa, hala indi vantu vakammanya,

⁵⁵ vakasara, vakajunguluka he lila isanga lose, vakavoka kuvatika na vitanda vala vewaa, na kutonga kila hantu vesikia iti niho hantu eho.

⁵⁶ Na kila hantu etongie, ekiingia he vumuzi, kana he mizi kana he mighunda, vakavika vawaji he viete, vakamsemba vakunte na ere mlingo wa suke yakwe. Na vose vala vemkuntie, vakabanda.