MARIKO 5 - Chasu New Testament 1967

Kubanjwa Mgerasi ena mpepo

¹ Vakafika sela ila ya bahari mhaka isanga la Vagerasi.

² Ekinafume he ngilawa, hala indi akazana na mntu efuma he mbira, ena mpepo mbivi;

³ hantu etue nekire he jila mbira; tehena mntu neri mmwe eidime kumchunga wa, neri kwa mnyororo;

⁴ ambu kantu kajinki ekichungiwe na pingu na minyororo, mia akachwa ila minyororo na kubaabaa jila pingu; neri tehena mntu emwidime.

⁵ Na misi yose, kio na msi ekiikaa he mbira na he ntuvi, ekilonza na kukuchwachwa na mabwe.

⁶ Ekiamvone Yesu ereho hae, akamsarira, akamdunkutia;

⁷ akatetisha na izii ibaha ekiti, “Nina ni nawe Yesu Mwana wa Mrungu eho uko wanga? Nikurighia he Mrungu usinirishe vwasi.”

⁸ Ni kila emtie, “We mpepo mbivi, fuma he uu mntu!”

⁹ Akamvwija, “Niwe ani?” Akamti, “Izina langu nimi Legoini, ambu tu vajinki.”

¹⁰ Ikamsembisha iti asijifunye he lila isanga.

¹¹ Na aho he ntuvi hekina ifio ibaha la nguve jekila.

¹² Mpepo jose jikamsemba jekiti, “Tutume he jila nguve, tuingie jeho.”

¹³ Akajikundija. Jila mpepo mbivi jikafuma, jikangia he nguve, ifio lose likajinka, likasea he kijevu, jikangia he bahari, najo ne sa viku viri, jikafwia he bahari.

¹⁴ Varisha vajo vakaaha, vakateta iyo mburi ikaghisha kula he muzi na he isanga; vantu vakafuma kurereha icho cheketike.

¹⁵ Vakamswia Yesu, vakamvona ula mwenye mpepo, eikae si edokie suke, ena icha, naye niye ekina na legioni; vakafoleka.

¹⁶ Na vala vevonie vakavagaiya jila mburi jevonekie ula mwenye mpepo, na mburi ya jila nguve.

¹⁷ Vakavoka kumsemba iti avuke he mihaka yavo.

¹⁸ Aho ekiingia he ngilawa, ula ekina mpepo akamsemba iti aikae naye.

¹⁹ Mira temkundije, akamti, “Ghotoka na kaa hako, he vantu va henyu, erebirikira iti ni vintu vibaha Mfumwa ekuketiie, na sa vuntu ekuvoneie.”

²⁰ Akatonga, akavoka kubirikira uko Dekapoli, iyo mburi mbaha Yesu emketiie; vantu vose vakamaka.

Mwana wa kiche wakwe Yairo na mche mwaji wa kugavukana

²¹ Yesu ekinahunduke wa noko sela na ila ngilawa, vakamvungania luvungano lubaha, naye ekiho mbaimbai ya bahari.

²² Hakaza mntu e mmwe he vabaha va sinagogi, eitangwa Yairo; ekinamvone akagwa he maghu akwe,

²³ ekisembisha haiwa, ekiti, “Mwanangu mdori wa kibora eho efwa; nikusemba uze uremvikia mkono, nesa abande, akalame.”

²⁴ Akatonga hamwe naye; luvungano lubaha vakamratera vekimsisima.

²⁵ Na mche mmwe ekigavukana miaka ikumi na miri,

²⁶ ekirishwa vwasi mno ni vaghanga vajinki, akainkija vyose ena navyo, kisimghenje neri hadori, esire kuzikiwa.

²⁷ Ekinasikie mburi jakwe Yesu, akaza nyuma heye ghati he lula luvungano, akakunta suke yakwe;

²⁸ ambu etie, “Nekikunta du suke yakwe, ninebanda.”

²⁹ Hala indi kisima cha sakame yakwe kikaoma; akamanya he mwiri wakwe iti abanda he vula vwasi.

³⁰ Hala indi Yesu ekimanya iti nzinya jamfuma, akagharuka ghati he luvungano, akati, “Ni ani akunta suke jangu?”

³¹ Varateri vakamti, “Uvona vuntu mavungano ekusisima, kangi uti, ‘Ni ani anikunta?’”

³² Akarereha myondo yose nesa avone ula eketie huvo.

³³ Ula mche akasikia fole na kuzingiza, ekimanya kila chemwokiie, akaza, akamdunkutia, akamvwirira vyose cha idi.

³⁴ Akamti, “We mwana wa kiche, mwitikijo wako wakubanja; tonga na mporere, ubande vwasi vwako vusikuhundukie wa.”

³⁵ Echeri teta, hakaza vantu kufuma he ula m’baha wa sinagogi, vekiti, “Mwanao akenja kufwa; umrishija ni Mcheji vwasi?”

³⁶ Mira Yesu ekisikia icho kiteto chekitetwa, akamti ula m’baha wa sinagogi, “Usifoleke, itikija du!”

³⁷ Neri tekundije mntu kumratera, esire Petro ne Yakobo ne Yohane mjinawe Yakobo.

³⁸ Vakafika kaa ha ula m’baha wa sinagogi; akavona mvulunghiko, vantu vekiia, na kuwela kubaha.

³⁹ Ekinaingie akavati, “Hanini mwewela na kuia? Uu mwana tefwie, eteshinjia.”

⁴⁰ Vakamseka haiwa. Naye ekinakenje kuvafunya na nze vose, akamghuha vavee ula mwana na mlala wavo na vala vena naye, akaingia hala hantu ula mwana eho;

⁴¹ akamgura ula mwana mkono, akamti, “Talita kumi!” ni sa kuti, “M’bora, nakuti vuka!”

⁴² Hala indi ula mwana akaimuka, akatonga, naye efishije miaka ikumi na miri. Vantu vakamaka haiwa.

⁴³ Akavakokontia mno iti hasikete mntu emanya iyo mburi; akaazera iti ainkwe kijo.