MARIKO 3 - Chasu New Testament 1967

Kubanja mntu ena mkono wesingale

¹ Akaingia kangi he sinagogi, aho hekina mntu ena mkono wesingale;

² vakamtegha nesa vavone iti enem’banja msi wa sabato, nesa vavone cha kumrengekia.

³ Akamti ula mntu ena mkono wesingale, “Imuka aha ghati!”

⁴ Akavavwija, “Kikundijwa msi wa sabato kuronga vyedi kana kuronga vivivi, kukija ngoro kana kuikoma?” Vakahuja.

⁵ Akavarerehisha myondo yose kwa oro na kushinirwa vuntu vwa vukuji vwa ngoro javo; akamti ula mntu, “Ronga mkono wako!” Akauronga; mkono wakwe ukabanda.

⁶ Hala indi vala Vafarisayo vakafuma, vakachila hamwe na va kwa Herode, sa vuntu venemkoma.

Vajinki vebanjwa

⁷ Yesu naye akatana navo, ye na varateri vakwe; akatonga he bahari. Luvungano lubaha vakamratera, vefuma Galilaya na Yudea,

⁸ na Yerusalemu na Idumaya, na sela ila ya Yordani, na myondo ya Tiro na Sidoni; mzomano m’baha vekinasikie mburi ya vintu vyose vila eketie, vakamswia.

⁹ Akavati varateri vakwe iti kangilawa kadori kaikae hafuhi naye, vuntu vwa mzomano nesa vasiremsisima.

¹⁰ Ambu ebandije vajinki; hata vose vena mavwasi vakamjinkia vaidime kumkunta.

¹¹ Na mpepo mbivi kila hantu jemvona jikamgwia hala si jekiiagha, jekiti, “We niwe Mwana wa Mrungu.”

¹² Akajikokontia mno iti jisimfunyirije.

Ntume ikumi na veri

¹³ Akakwea he ntuvi, akaitanga vala ye mwenye evaenda, navo vakamswia.

¹⁴ Akavika vantu ikumi na veri iti vaikae naye, nesa avatume kubirikira,

¹⁵ kangi vakete nzinya ya kufunya mpepo.

¹⁶ Akavavika vala ikumi na veri; na Simoni akamchwia izina iti niye Petro;

¹⁷ ne Yakobo mwana Zebedayo ne Yohane mjinawe Yakobo, akavachwia izina: Boanerge, ni sa kuti, “Vana mrurumo;”

¹⁸ ne Andrea, ne Filipo, ne Bartolomayo, ne Matayo, ne Toma, ne Yakobo mwana Alfayo, ne Tadayo, ne Simoni Mkanani,

¹⁹ ne Yuda Iskarioti, niye emrengehe.

Yesu ekana iti tekinya mpepo kwa nzinya yakwe Belzebuli

²⁰ Kangi akaingia he nyumba. Hakavungana wa mazomano, neri asivone halia kijo.

²¹ Vandughu vakwe vekisikia iyo mburi vakafuma, vakatonga kumgura, ambu veti aghuruka.

²² Na vaandiki vala vezie kufuma Yerusalemu vakati, “Ena Belzebuli, na, kwa nzinya ya m’baha wa mpepo efunya mpepo.

²³ Akavaitanga, akavavwira kwa mifwanano, “Shetani eidimaze kumfunya Shetani?

²⁴ Vufumwa vwekilingana vo vujenye, uvo vufumwa tevuidima kudinda.

²⁵ Na nyumba yekilingana yo njenye, iyo nyumba teiidima kudinda.

²⁶ Na kakicha Shetani ekikuomanya ye mwenye na kukulinganya, teidima kudinda, mira enehakana.

²⁷ Mntu teidima kuingia he nyumba ya mwenye nzinya na kutaha vintu vyakwe, esinarongamchunga ula mwenye nzinya; niho enehorera nyumba yakwe.

²⁸ Kididi nimutio, ‘Mabanu ose na falaja jose vana va vantu venefalaja, veneshighiwa;

²⁹ mira mntu emfalaja Mpeho Wedi tekashighiwe narini, eneoka mnzune kae na kae.’

³⁰ Ni kila vetie, ‘Ena mpepo mbivi.’”

Vundughu vwa idi

³¹ Mlala wavo na vajinawe vakaza, vakaimuka nze, vakatuma mntu kumwitanga.

³² Na mavungano vekiikae si vemjunguluke, vakamti, “Rereha, mlala wenyu na vajinao vewaho nze, vekuenda.”

³³ Akavagharusha ekiti, “Mlala wetu na vajinawa ni vani?”

³⁴ Akavarereha vala veikae si vemjunnguluke myondo yose, akati, “Rereha, mlala wetu na vajinawa!

³⁵ Ambu mntu wose eneronga vila Mrungu ekunda, uo niye mjinawa, na rumburya, na mlala wetu.”