MARIKO 10 - Chasu New Testament 1967

Ivwijo la kushighana

¹ Akavuka aho, akafika he mihaka ya Yudea, na sela ila ya Yordani, mavungano majinki vakavungana wa, vakamswia; akavacheja kangi sa vuntu emanyere.

² Vafarisayo vakamswia, vakamvwija kwa kumghesha, “Ngeao, kikundijwa mntu kumshigha mche wakwe?”

³ Naye akagharusha akavati, “Mose emuazere ni?”

⁴ Vakati, “Mose ekundije kuandika talaka na kumshigha.”

⁵ Yesu akavati, “Kwa vukuji vwa ngoro jenyu nicho cheshigha ekimuandikia ili iazero.

⁶ Mira too kuvoka masanga ekirumbwa, erumbie mme na mche.

⁷ Heicho mntu enemshigha vavee na mlala wavo, enegurana na mche wakwe;

⁸ na avo veri veneoka mwiri mmwe, neri si veri kangi, mira ni mwiri mmwe.

⁹ Heicho, kila cheguranywe ni Mrungu, mntu asikitanye!”

¹⁰ Na uko nyumba wa varateri vakamvwija cha iyo mburi.

¹¹ Akavati, “Kila mntu enemshigha mche, akaghuha ungi, ashinda heye.

¹² Na mche ekimshigha mghosiwe, akighuhwa ni ungi, ashinda.”

Yesu einka vana vadori lutelwedi

¹³ Igheri vakamwetia vana vadori iti avakunte; varateri vakwe vakavabohia.

¹⁴ Mira Yesu ekivona akavihiwa mno, akavati, “Shighani vana vadori vaze hemi, musivakinde; ambu vana sa ava vufumwa vwa Mrungu ni vwavo.

¹⁵ Kididi nimutio, Ye esighuhia vufumwa vwa Mrungu sa mwana mdori, tekaingie hevwo neri.”

¹⁶ Akavashashata, akavavikia mikono, akavainka lutelwedi.

M’bwange mzuri eenda nkalamo ya kae na kae

¹⁷ Aho ekifuma na nzieni, mntu mmwe akamsarira, akamdunkutia, akamvwija, “Mcheji wedi, nikete ze nesa nipale nkalamo ya kae na kae?”

¹⁸ Yesu akamti, “Hanini weniitanga wedi? Tehena e wedi, esire mmwe, eye Mrungu.

¹⁹ Wemanyije maamoro: Usikome, Usishinde, Usiive, Usitete vuonwa vwa mongo, Usizinde, Vikia vaveo na mlala wenyu shima.”

²⁰ Akamti, “Mcheji, ivi vyose nevigurishe too nere mwana.”

²¹ Yesu akamrerehisha, akamkunda, akamti, “Weimije kintu kimwe. Tonga utaghe vyose wena navyo, uvainke vakiva, uneketa ndungu uko wanga; wekikenja uze uniratere.”

²² Mira ye akajingija vusho vuntu vwa icho kiteto, akatonga eshinirwe, ambu ekina mari nyingi.

Mpwasi ya vuzuri

²³ Yesu akarereha myondo yose, akavavwira varateri vakwe: “Tehena vwasi vweringane sa vwa venye mari, kuingia he vufumwa vwa Mrungu!”

²⁴ Varateri vakamaka he ivyo viteto vyakwe. Yesu akagharusha kangi, akavati, “Vana, ni kizinya, vala vevikie ikuji he mari kuingia he vufumwa vwa Mrungu!

²⁵ Ngamia kuingia he ivoro la singano, ni kijangu kukela mzuri kuingia he vufumwa vwa Mrungu.”

²⁶ Navo vakamaka haiwa, vekimti, “Ni ani ra eidima kukia?”

²⁷ Yesu akavarerehisha, akati, “He vantu tekive, mira he Mrungu sivwo, ambu vyose viidimika he Mrungu.

²⁸ Petro akavoka kumti, “Rereha, uswi tweshighie vyose, tukakuratera we.”

²⁹ Yesu akati, “Kididi nimutio, Tehena mntu eshighie nyumba, kana mjinawe, kana vana, kana mighunda he vuntu vwangu na vuntu vwa Mburi Yedi,

³⁰ esikainkwe kantu ighana he igheri ili: nyumba, na mjinawe, na varumburye, na mlala wavo, na vana, na mighunda, hamwe na mavwasi; na nkalamo ya kae na kae he isanga leneza.

³¹ Mira vajinki e vakuvoka veneoka va nyuma, na va nyuma veneoka va kuvoka.”

Yesu erota ka katatu mburi ya kifwa chakwe

³² Navo vekiho nzieni, vekikwea noko Yerusalemu; Yesu ekivarongorire; vakamaka, vakamratera vefoleke. Akaghuha wa vala ikumi na veri, akavoka kuvavwirira vila vyenemfikia,

³³ ekiti, “Rerehani, tukwea noko Yerusalemu, na Mwana wa Mntu eneinkijwa he mikono ya vabaha na vatasi na vaandiki, navo venemchwia iti afwe, venemwinkija he mikono ya Vakiisanga,

³⁴ navo venemsola, na kumtufia mate, na kum’bigha viboko, na kumkoma; na misi mitatu yekivecha enevuka he vefwie.

Mitanjije ya kuenda shima ya ili isanga

³⁵ Yakobo ne Yohane, vana Zebedayo vakamswia, vakamti, “Mcheji, tuenda, chochose twenekuomba utuketie.”

³⁶ Akavati, “Muenda nimuketie ni?”

³⁷ Vakamti, “Uko he ngazo yako, utuinke uswi kuikaa, mmwe mkono wako wa kume na ungi mkono wako wa kumoso.”

³⁸ Yesu akavati, “Temumanyije cho mweomba; miudima kunwia kikombe kila mi nenenwia, kana kubatizwa m’batizo ula mi nenebatizwa?”

³⁹ Vakamti, “Tuidima.” Yesu akavati, “Kikombe kila nenekinwia mi munekinwia, na kubatizwa ula m’batizo nenebatizwa nawo;

⁴⁰ mira cha kuikaa mkono wangu wa kume kana mkono wa kumoso, si changu kumuinka, esire veneinkwa vala veringanyijwe.”

Vubaha vwa idi

⁴¹ Niho vala ikumi vekisikia, vakavoka kuvavihiwa Yakobo ne Yohane.

⁴² Yesu akavaitanga, akavati, “Mwemanyije iti vala vetarwa iti ni vabaha va Vakiisanga, vevatetia kwa nzinya, na vabaha vavo vevabinusha.

⁴³ Mira he unywi chesikaoke huvo; esire iti ula eenda kuoka m’baha wenyu eneoka mndima wenyu.

⁴⁴ Na mntu eenda kuoka wa kuvoka he unywi, eneoka mzoro wa vose.

⁴⁵ Ambu Mwana wa Mntu naye tezie kutumikiwa, esire kutumika na kuinkija moo wakwe uoke irivi la vajinki.”

Yesu ebanja ituntu

⁴⁶ Vakafika Yeriko; aho ekifuma Yeriko hamwe na varateri vakwe, na luvungano lubaha, Bartimayo mwana Timayo, ula e ituntu mretanja, ekiikae si mbaimbai nzieni;

⁴⁷ naye ekisikia iti ni Yesu Mnazareti, akavoka kuitanga na izii ibaha, ekiti, “Yesu, Mwana Davidi, univoneie.”

⁴⁸ Vajinki vakam’bohija iti ahuje, mira ye akazikaitanga, “Mwana Davidi, univoneie.”

⁴⁹ Yesu akaimuka, akati, “Mwitangeni.” Vakamwitanga ula ituntu vakamti, “Tundana ngoro; imuka, ekuitanga.”

⁵⁰ Akatagha suke yakwe, akaingia fia, akamswia Yesu.

⁵¹ Yesu akamgharusha, akamti, “Uenda nikuketie ni?” Ula ituntu akamti, “Mcheji wangu, nienda niidime kuvona.”

⁵² Yesu akamti, “Kutongire, mwitikijo wako wakukija.” Hala indi akaidima kuvona, akamratera nzieni.