LUKA 9 - Chasu New Testament 1967

Ndima ya ntume ikumi na veri

¹ Akaitanga vala ikumi na veri, akavainkija nzinya ya kutetia mpepo jose na kubanja mawaji.

² Akavatuma kuraamberija vufumwa vwa Mrungu na kubanja vawaji.

³ Akavati, “Musitike kintu he ntambo yenyu, neri nazta, neri ibene, neri mkate, neri fedha, neri hasikete mmwe wenyu ena nkanzu mbiri.

⁴ Na nyumba yoyose mweneingia, ikaani aho mhaka mwenehafuma;

⁵ na vala vesimughuhia, mwekifuma he uo muzi, kukuntani hata teri yeho he maghu enyu, kuoka vuonwa hevo.”

⁶ Vakatonga, vakajunguluka he vumuzi vekibirikira Mburi Yedi na kubanja vantu kila hantu.

Kuambalala kwakwe Herode

⁷ Mfumwa Herode akasikia mburi jose jeketike, akamagarara, ambu vantu va kumwe vekiti iti Yohane avuka he vefwie,

⁸ na vangi veti Elia avoneka, na va kumwe veti, ni mmwe wa varoti va kae avuka he vefwie.

⁹ Mira Herode akati, “Yohane nemchwie mtwi, iki uo nesikia mburi jakwe ni ani?” Akaenda kumvona.

Kuighushwa kwa vantu viku visano

¹⁰ Niho ntume vala vekihunduka vakamwukulila vintu vyose veviketie; akavahguha, akavatika njama mhaka he muzi weitangwa Betsaida.

¹¹ Na mavungano vekinamanye, vakamratera; akavaghuhia, akateta navo mburi ja vufumwa vwa Mrungu, akavabanja vala veenda kubanjwa.

¹² Hekifika kuswa, vala ikumi na veri vakamswia, vakamti, “Aghanya luvungano, nesa vatonge he vumuzi na mighunda yeho mondo na mondo, nesa vavone hantu ha kushinjia na kijo, ambu aha hantu tweho ni nyika ntuhu.”

¹³ Akavati, “Vainkeni kijo engaunywi.” Vakati “Tetuna kintu, esire mikate misano na samaki mbiri, sari tutetonga kuvazorira ava vantu vose kijo.”

¹⁴ Ambu vantu va kiume vekiwaho ne sa viku visano. Akavati varateri vakwe, “Vaikajeni vantu si kilukamba, kila lukamba vantu makumi masano.”

¹⁵ Vakaketa huvo, vakavaikaja si vose.

¹⁶ Akaghuha ila mikate misano na jila samaki mbiri, akarereha na uko wanga, akaviinka lutelwedi, akavibendua, akavinka varateri vakwe nesa vaghavie luvungano.

¹⁷ Vakala vakaighuta vose; na he vila vibendo vyeimie, vakatoa vikapu ikumi na viri.

Petro evonyesha iti Yesu ni Kristo

¹⁸ Igheri aho ekiomba kwa mpiso, varateri vakwe vekiho hamwe naye, akavavwija, “Hamao, avo va mavungano veti mi ni muni?”

¹⁹ Vakamgharusha kuti, “Veti u Yohane M’batizi; mira va kumwe veti u Elia, vangi veti ni mmwe wa varoti va kae avuka he vefwie.”

²⁰ Akavati, “Ha unywi muti mi ni muni?” Petro akamgharusha, akati, “Niwe Kristo wa Mrungu.”

Yesu erota kifwa chakwe na kuvuka he vefwie

²¹ Akavakokontia, akavasuja vasimvwire mntu iyo mburi;

²² ekiti, “Chemvaie Mwana wa Mntu kuvona mavwasi mangi, na kusuwa ni vaghosie na vabaha va vatasi na vaandiki, na kukomwa, na kuvuka he vefwie msi wa katatu.”

Mwitango wa kukukana

²³ Akavavwira vose, “Kila mntu ekienda kuniratera, akudae ye mwenye, atike msalaba wakwe kila msi, aniratere.

²⁴ Ambu mntu eenda kukija moo wakwe, eneutesha, na mntu eenda kutesha moo wakwe vuntu vwangu, niyye eneukija.

²⁵ Ambu, hena lumazo ani mntu ekivona masanga ose, mira ekikutesha kana kukuhosha mwenye?

²⁶ Ambu ula enisikia soni, mi neri viteto vyangu, uo mntu, Mwana wa Mntu naye enemsikia soni, aho ekiza na ngazo yakwe na ya Vavee na ya vamalaika vezerire.

²⁷ Nami nimuvwira idi, hena vakumwe he ava veimuke aha, vesikasaghe kifwa neri, mhaka varongevona vufumwa vwa Mrungu.”

Kukoranyika fwani

²⁸ Nyuma ya viteto ivyo, hekivecha sa misi mnane huvu, akavaghuha Petro ne Yohane ne Yakobo, akakwea he ntuvi nesa areomba.

²⁹ Igheri aho ekiomba, fwani ya vusho vwakwe ikagharuka, suke jakwe jikaoka nyewa, jikamekenisa.

³⁰ Na rereha, hekina vantu veri vegaya naye, navo ni Mose ne Elia;

³¹ vevoneke he ngazo, vakateta mburi ja kufwa kwakwe, enekukolosha uko Yerusalemu.

³² Petro hamwe na vala vekina naye, vekifikiwe ni lughohe; mira vekinaavije, vakavona ngazo yakwe, na vala veri veimuke hamwe naye.

³³ Niho, aho avo vekitana naye, Petro akamti Yesu, “Mfumwa, ni chedi uswi kuikaa aha; natujenge vujumba vutatu, kamwe kako, na kamwe kakwe Mose, na kamwe kakwe Elia; ni kusamanya cho eteta.

³⁴ Echeriteta huvo, hakaza ijumbi, likavagera mvuri, vakafoleka vekinaingie he ilo ijumbi.

³⁵ Izii likafuma he ilo ijumbi, lekiti, “Uu ni Mwanangu esaghurwe nimi, msikieni ye.”

³⁶ Na ilo izii likinaveche, Yesu akavonwa ereho mwenye. Navo vakahuja, misi ila vesiukule he mntu cho vevonie.

Kubanjwa kwa m’bwange ena mpepo

³⁷ Hala yavo hakwe, vekisea he ntuvi, luvungano lubaha lukazana naye.

³⁸ Rereha, mntu mmwe he lula luvungano akatetisha na wanga, ekiti, “Mcheji, nikusemba, umrerehe mwanangu, ambu sina ungi.

³⁹ Rereha, mpepo imgura, naye hala indi elonzisha, kangi imgusha kisa afunye mafuo, neri teimshigha, esire kumrisha vwasi, yekimshumurashumura.

⁴⁰ Nikavasemba varateri vako iti vaifunye, vasiidime.”

⁴¹ Yesu akagharusha, akati, “Unywi mbari yesina mwitikijo, yehotoke, nineikaa na unywi na kumugumirija mhaka rini? Mwete mwanao na aha.”

⁴² Aho ekimswia, mpepo ikamgusha, ikamgera kisa. Yesu kabohija ila mpepo mbivi, akabanja ula mwana, akamhunduia vavee.

⁴³ Vose vakamagarara, vekivona vubaha vwa Mrungu. Navo vecherimaka vila vyose evirongie, akavati varateri vakwe,

Yesu erota kifwa chakwe ka keri

⁴⁴ “Viteto ivi vigurisheni he masikio enyu, ambu Mwana wa Mntu etonga kurainkijwa he mikono yya vantu.”

⁴⁵ Mira tevetwarije icho kiteto, kikavisika hevo, vasikimanye; vakafoleka kumvwija iti icho kiteto ni kuti ze.

Kukuduisha na kugumirija

⁴⁶ Vakavoka kuvwijana iti hevo eneoka m’baha ni uhi.

⁴⁷ Yesu ekimanya madunganyo a ngoro javo, akaghuha mwana mdori akamvika hafuhi naye, akavati,

⁴⁸ “Ye enemghuhia uu mwana he izina langu, anighuhia mi; na ula enenighuhia mi, amghuhia ula enitumie. Ambu ula e mdori he unywi vose, uo niye m’baha.”

⁴⁹ Yohane akagharusha, akamti, “Mfumwa, twevonie mntu efunya mpepo he izina lako; tukamsuja, ambu tetonjanya na uswi.”

⁵⁰ Yesu akamti, “Musimsuje, ambu ula esimugharuka, eho mondo wenyu.”

Yesu etonga Yerusalemu; Vasamaria vesina kise

⁵¹ Niho misi yakwe ya kukwejwa noko wanga yezengelele kukoloka, akarongaja vusho vwakwe kutonga Yerusalemu.

⁵² Akatuma ntume iti vamrongorire, vakatonga, vakaingia he kamuzi kamwe ka Vasamaria, nesa vamharehie vantu.

⁵³ Mira venye va aho tevemghuhie, kila erongaje vusho vwakwe kutonga Yerusalemu.

⁵⁴ Varateri vakwe, Yakobo ne Yohane vekivona huvo, vakati, “Mfumwa, ukunda tuazerije moto usee kufuma uko wanga, uvakeje, (sa vuntu Elia eketie?)

⁵⁵ Akavagharukia, akavakanya, [akati, “Temumanyije iti ni mpeho wa mbare ihi mwena naye. Ambu Mwana wa Mntu tezie kubunta ngoro ja vantu, esire kujikija.”]

⁵⁶ Vakavuka, vakatonga he kamuzi kangi.

Mighesho itara he vala veneoka varateri

⁵⁷ Navo aho vekitonga nzieni, mntu mmwe akamti, “Ninekuratera hantu hose wetonga.”

⁵⁸ Yesu akamti, “Vibarwe vina makongo, na madeghe a wanga ena mashasha, mira Mwana wa Mntu tena ha kuyaja mtwi wakwe.”

⁵⁹ Akamti ungi, “Niratera!” Akamti, “Mfumwa, ronganikundija nitonge niremjika vava.”

⁶⁰ Akamti, “Vashighe vefwie vajike vefwie vavo, mira we tonga urebirikira vufumwa vwa Mrungu.”

⁶¹ Mntu ungi wa akamti, “Mfumwa, ninekuratera, mira ronganikundija nireaghanya va kaa hangu.”

⁶² Yesu akamti, “Ye evushija mkono, akagura ighembe kuima, kangi akarereha nyuma, teve he vufumwa vwa Mrungu.”