LUKA 8 - Chasu New Testament 1967

Vache vekimpipirikia

¹ Ekikenaja akajunguluka he mizi na vumuzi, ekibirikira na kuamberija Mburi Yedi ya vufumwa vwa Mrungu; na vala ikumi na veri vekiho hamwe naye

² Na vache vasiku vekina mpepo mbivi na mawaji, vakabanjwa. Navo ni Maria Magdalena, efumiwe ni mpepo mfungate,

³ ne Yoana mche wakwe Kuza mnjama wakwe Herode, ne Susana, na vangi vajinki, vekimpipirikia na mari javo.

Mfwanano wa mhandi

⁴ Luvungano lubaha lwekinazomane, na vala vefuma he kila muzi vekimzia, akateta kwa mifwanano,

⁵ “Mhandi efumie kutonga kurahanda mbeu jakwe, naye aho ekijihanda, ja kumwe jikagwa hafuhi na nzia, jikavatwa na madeghe a wanga akajila.

⁶ Jingi jikagwa he mrarabwe; jekivoka kueha jikaoma, kwa kusova mdusunya.

⁷ Jingi jikagwa ghati he mivwa, na mivwa ikaehijanya najo, ikkajibandanya.

⁸ Jingi jikagwa he msau wedi, jikaeha, jikagera ighana ighana.” Aho ekiteta ivyo, akavusha izii na wanga, ekiti, “Ye ena masikio a kusikiia, nasikie.”

Mhererejo wa mfwanano wa mhandi

⁹ Varateri vakwe vakamvwija, “Uo mfwanano, nikwo kuti ze?”

¹⁰ Akati, “Unywi mweinkiwe kumanya mpiso ja vufumwa vwa Mrungu, mira vangi ni kwa mifwanano, nesa vekirereha vasivone, na vekisikia vasitwarije.

¹¹ Uo mfwanano nikwo kuti huvu: Mbeu ni kiteto cha Mrungu.

¹² Vala veho nzieni ni vala vesikie, vekikenja, Shetani akaza akavusha icho kiteto he ngoro javo, vasireitikija vakakia.

¹³ Na vala veho he mrarabwe, ni vala vekisikia, veghuhia icho kiteto na kuizihirwa; navo vesina miji, veitikija ikenda idori, na igheri la kugheshwa, vesongera.

¹⁴ Na jila jegwie he mivwa, ni vala vesikie, na he mitongire yavo vakabandanywa ni mabinuko a mari, na luizihiro lwa kimwiri, vasikuje kintu neri.

¹⁵ Na jila ja he msau wedi, ni vala vesikia kiteto na ngoro jedi jerongeke, vakakigurisha; niho vakagera ntunda kwa kugumirija.

Ifundisho la taa

¹⁶ “Tehena mntu easha taa, ekikenja akaifinikira na kintu, kana kuivika vwisini; mira eivika wanga he kivandiko, nesa vala veingia vavone kianga chayo.

¹⁷ Ambu tehena kintu chevesike chesikarefunukurwa; neri chevisiwe chesikaremanyika na kufumirira boo.

¹⁸ Rerehishani ra sa vuntu mwesikia; ambu ula ena kintu eneinkwa, na ula esina kintu, eneghumbwa hata kila edunganya iti ena.”

Vundughu vwa idi

¹⁹ Mlala wavo na vandughu vakwe valamswia, vasiidime kumfikia vuntu vwa luvungano.

²⁰ Akaukulilwa iyo mburi, akatiwa, “Mlala wenyu na vandughu vako veimuke uko nze, veenda kuvonana nawe.”

²¹ Akavagharusha, akati, “Mlala wetu na vajinawa, ni ava vesikia kiteto cha Mrungu na kukironga vwo.”

Yesu ebohia nkungu

²² Msi mmwe he misi ila, akaingia he ngilawa, ye hamwe na varateri vakwe, akati, “Natukelanye sela ila yya bahari.” Vakakweja matanga.

²³ Aho vekitonga, akashinjia lughohe. Hakaza nkungu mbaha he bahari, ngilawa ikavoka kuizua mpombe, vakafikiwa ni mpwasi.

²⁴ Vakamswia, vakamvusha, vekiti, “Mfumwa, Mfumwa! YTuho he kutetka!” Akavuka, akabohia nkungu na mkushiko wa mpombe, vikahuja, hakahoa do.

²⁵ Akavati, “Mwitikijo wenyu uohi?” Vakafoleka, vakamaka, vekiteta vo venye na venye, “Ni ani uu, etetia nkungu na mpombe vimsikie?”

Kubanjwa Mgerasi ena mpepo

²⁶ Vakafika mbaimbai ya isanga la Vagerasi, heyoyane na Galilaya.

²⁷ Aho ekisea he ngilawa, akazana na mntu mmwe wa ula muzi, ena mpepo; misi mingi tekidoka suke, neri teikaa kaa, esire uko he mbira.

²⁸ Ekinamvone Yesu, akalonza, akagwa si mozya heye, akateta na izii ibaha, ‘Nina ni nawe Yesu Mwana wa Mrungu eho uko wanga? Nikusemba, usinirishe vwasi.”

²⁹ Ni hala eazere ila mpepo mbivi ifume he ula mntu, ambu egurirwe niyo kantu kajinki, kangi ekirindwa he kichungo, echungiwe na minyororo na pingu, akachwa vila vichungo; nzinya ya ila mpepo ikamdindisha noko nyika.

³⁰ Yesu akamvwija, “Izina lako niwe ani?” Akamti, “Izina langu nimi Legioni;” ambu eingiwe ni mpepo nyingi.

³¹ Jikamsemba iti asijiazere kufuma na kutonga uko he nkoma.

³² Hekina ifio la nguve nyingi jekila he ntuvi; jikamsemba iti ajikundije jiingie hejo. Akajikundija.

³³ Mpepo jikafuma he ula mntu, jikaingia he nguve. Lila ifio likahurumuka he kijevu, likaingia he bahari, jikafwa kwa mpombe.

³⁴ Varisha vekivona icho cheketike, vakatonja ila mburi ikagisha he mizi na he mighunda.

³⁵ Vantu vakafuma, vakatonga kurarereha icho chevoneke, vakamswia Yesu, vakamvona ula mntu efumiwe ni mpepo eikae si he maghu akwe Yesu, edokie suke, ena na kucha; vakafoleka.

³⁶ Na vala vevivonie, vakavagaiya vuntu ula egurirwe ni mpepo ebanjijwe.

³⁷ Luvungano lwa vantu va isanga la Vagerasi leho mondo na mondo, vakamsemba iti avuke havo, ambu vagurwa ni kipea; niho akakwea he ngilawa, akahunduka.

³⁸ Ula mntu efumiwe ni mpepo akamsemba iti amkundije vatonjanye naye; mira ye akamwaghanya ekiti,

³⁹ “Hunduka na kaa hako, urebirikira he muzi wose, vila vibaha eketiwe ni Yesu.”

Mwana wa kibora wakwe Yairo evushwa he vefwie, kubanjwa kwa mche egavuka

⁴⁰ Yesu ekinahunduke, luvungano lukamghuhia na kuizihirwa, ambu vose vekimwinda.

⁴¹ Rereha, hakaza mntu mmwe eitangwa Yairo, naye ne m’baha wa sinagogi, akagwa he maghu akwe Yesu, akamsemba iti aingie he nyumba yakwe;

⁴² ambu mwanawe wa kibora ere mmwe, ena miaka ikumi na miri, eho efwa. Na hala ekitonga, mavungano vakamsisima.

⁴³ Na mche mmwe ekigavukana hantu ha miaka ikumi na miri, [ekenjije mari yakwe yose he kuvainka vaghanga,] asivone mntu eidime kum’banja,

⁴⁴ akamzia nyuma, akakunta mlingo wa suke yakwe; hala indi kugavukana kwakwe kukahakana.

⁴⁵ Yesu akati, “Ni ani anikunta?” Vantu vose vekinakane, Petro hamwe na vala vena naye, akamti, “Mfumwa, ni ulu luvungano lwekujunguluke ne kukusisima.”

⁴⁶ Yesu akati, “Hena mntu enikuntie, ambu navona iti nzinya janifuma.”

⁴⁷ Ula mche akivona iti teidima kukuvisa, akaza ekizingiza, akagwa mozya hakwe, mozya he vantu vose, akamgaiya cheshighie ekimkunta, na sa vuntu ebanjijwe hala indi.

⁴⁸ Akamti, “We mwana wa kiche, mwitikijo wako wakukija; tonga na mporere.”

⁴⁹ Echeriteta huvo, hakaza mntu efuma he kaa ya ula m’baha wa sinagogi, akamti, “Mwama wako wa kibora akenja kufwa; usimrishe Mcheji vwasi.”

⁵⁰ Mira Yesu ekinasikie huvo, akamgharusha, “Usifoleke, itikija du, naye enebanjwa.”

⁵¹ Ekinafike he ila nyumba tekundije mntu kuingia hamwe naye, esire Petro ne Yohane ne Yakobo, na vavee ula mwana na mlala wavo.

⁵² Na vantu vose vekiia na kumwelila; akati “Musiie, uu mwana tefwie, eteshinjia lughohe du.”

⁵³ Vakamseka haiwa, ambu vemanyije iti akenja kufwa.

⁵⁴ Akamgura mkono, akateta na izii ibaha, ekiti, “We m’bora, vuka!”

⁵⁵ Muho wakwe ukamhundukia, akaimuka hala indi; akaazera ainkwe kijo.

⁵⁶ Vamoghi vakwe vakamaka haiwa, mira akavasuja iti vasiremvwire mntu icho cheketike.