LUKA 7 - Chasu New Testament 1967

Mzoro wa akida ebanjwa

¹ Ekinakenje viteto vyakwe vyose he vala vekimsikija, akaingia Kapernaumu.

² Naho hena mzoro wa akida mmwe ekiwaa kifwa, naye ni mntu ekundiwe haiwa.

³ Ekinasikie mburi jakwe Yesu, akatuma vaghosi va Vayuda hakwe, kumsemba aze kum’banja mzoro wakwe.

⁴ Navo vekinafike hakwe Yesu, vakamsembisha, vekiti, “Uu kimtara umketie huvo;

⁵ ambu ekundishe mbari yetu, naye etujengie sinagogi.”

⁶ Yesu akatonga hamwe navo. Ekizengelela hafuhi na nyumba yakwe, ula akida akatuma mbwiae hakwe, akamti, “Mfumwa, usikurishe vwasi, ambu tekinifwenye, we uingie kijusi ya gu yangu;

⁷ nicho cheshigha nekikuvona iti tekinifwenye mi mwenye kuza hako; mira teta du kiteto, na mzoro wangu enebanda.

⁸ Ambu nami ni mntu neinkiwe nzinya, nena vasikari veho kijusi hangu; nekimti uu, ‘Tonga,’ etonga; na uu, ‘Nzo,’ eza; na mzoro wangu, ‘Keta huvu,’ eketa.”

⁹ Yesu ekisikia huvo, akamghuha, akagharukia lula luvungano lwemratere, akati, “Nimutio, Hata he Israeli sinavona mwitikijo m’baha sa uu.”

¹⁰ Na vala vetumiwe vekihunduka uko kaa, vakamkicha ula mzoro abanda.

Mwana wa nche mkiva evushwa he vefwie

¹¹ Nyuma hadori akatonga he muzi mmwe weitangwa Naini, na varateri vakwe vakatonjanya naye, hamwe na luvungano lubaha.

¹² Ekinazengelele he mvera wa muzi, aho hekina kimba chefunywa na nze, ni mwana eremmwe he mlala wavo, naye efwiiwe ni mghosiwe, na vantu vajinki va muzi vekina naye.

¹³ Mfumwa ekiramvona, akamfwa mbazi, akamti, “Usiie.”

¹⁴ Akaswi hafuhi, akakunta kitanda, vala vetikie vakaimuka. Akamti, “M’bwange, nikuti, ‘Vuka!’”

¹⁵ Ula efwie akavuka akaikaa si; akavoka kuteta. Akamwinkija he mlala wavo.

¹⁶ Fole ikavagura vose, vakamkaza Mrungu, vekiti, “Hetu havoneka mroti m’baha; na, Mrungu avazia vantu vakwe.”

¹⁷ Ii mburi yakwe ikagisha uko Yudea hose, na he masanga ose eho mondo na mondo.

Yohane M’batizi

¹⁸ Yohane akagaiwa iji mburi jose ni varateri vakwe.

¹⁹ Niho Yohane akaitanga veri va he varateri vakwe, akavatuma hakwe Yesu, ekivwija, “We niwe ula eza, kana tuinde ungi?”

²⁰ Navo vekinafike hakwe, vakati, “Yohane M’batizi etutumie hako, ekiti, ‘We niwe ula eza, kana tuinde ungi?’”

²¹ Na saa ila ila, akavabanja vajinki mawaji avo, na mavwasi, na mpepo mbivi; na matuntu vajinki vakainkwa kuvona.

²² Niho akagharusha, akavati, “Tongani mumwukulile Yohane ivyo mwavona na kusikia: matuntu veinkwa kuvona, veholoje vetonga, veumbuka vezerijwa, vefwie masikio vesikia, vefwie vevushwa, na vakiva vebirikirwa Mburi Yedi.

²³ Mrela vwedi ni mntu ula esikanivihiwe.”

²⁴ Vala vetumiwe ni Yohane vekinatonge, akavoka kuvavwira mavungano mburi jakwe Yohane, “Mwetongie uko nyika kurarereha ni? Ni ibura lekushwa ni nkungu?

²⁵ Kana mwetongie kurarereha ni? Ni mntu edokie suke jenyutume? Manyani iti, vantu vedokie suke jena ngazo, vela vwedi, veho he nyumba ja kifumwa.

²⁶ Kana mwetongie kuvona ni? Ni mroti? Yee, nimutio, ekelile mroti.

²⁷ Uo niye eandikiwe ivi, ‘Rereha, nituma ntume wangu Mozya he kizango chako, Enekuharehia nzia yako mozya hako.’”

²⁸ Nami nimutio, “He vala vemoghiwe ni vache, tehena e m’baha kumvecha Yohane; mira ula e mdori he vufumwa vwa Mrungu ni m’baha kumvecha.”

²⁹ Na vantu vose na vareghuha kodi vekinasikie ivyo, vakaitikija kitea cha Mrungu, ambu vebatizwe m’batizo wakwe Yohane.

³⁰ Mira Vafarisayo navaremanya myomongwa vakakukindia mburi ya Mrungu vo venye, ni kila vesibatizwe niye.

³¹ Mfumwa akati, “Vantu va lukolo ulu nivafwanyanye nani? Vefwanane na kini?

³² Vefwanane na vana veikae si he kiete, vekiitangana, vekiti, ‘Twemubighiie mitoriro, neri musivine, tukawela, neri musiie.’

³³ Ambu Yohane M’batizi ezie, esila mkate, neri esinwa mvinyo, mukati, ‘Ena mpepo.’

³⁴ Mwana wa Mntu akaza, ela na kunwa; na unywi muti, ‘Rereha uu mraliisha na kunwiisha mvinyo, mmbwie wa vareghuha kodi na vabanu.’

³⁵ Na kuigho chamanyika iti kina kitea he vana vose.”

Yesu evirwa mafuta he maghu na mfwanano wa varando veri

³⁶ Mntu mmwe wa Vafarisayo emrarike iti ale kijo hakwe; akaingia he nyumba ya ula Mfarisayo, akaikaa he kula kijo.

³⁷ Rereha, mche mmwe wa he ula muzi, eki m’banu, ekinasikie iti eikae si kila kijo he nyumba ya ula Mfarisayo, akaete chupa kemekenisa, kena mafuta epupuntika nezo.

³⁸ Akaimuka nyuma hafuhi na maghu akwe, akaia, akavoka kumdofija masoji he maghu akwe, na kuahanguja na nywii ja mtwi wakwe, akabwita maghu akwe na kuavira ala mafuta.

³⁹ Ula mfarisayo emrarike ekivona vula, akateta he ngoro yakwe, “Uu mntu nanga ne mroti, ekimanya uu emkunta iti ni ani, na iti ye ni m’banu.”

⁴⁰ Yesu akagharusha, akamti, “Simioni! Hena cho neenda kukuvwira.” Akati “Mcheji, teta.”

⁴¹ Akati, “Mntu mmwe eambalwe ni vaando veri, mmwe emwava dinari maghana masano, na wa keri makumi masano.

⁴² Navo vekinasove cha kumwiha, akavashighia vose veri. He avo veri, ni uhi enemkunda kukela?”

⁴³ Simioni akagharusha akati, “Nidunganya, ni ula eshighiwe nyingi.” Akamti, “Wachwa kwa kitea.”

⁴⁴ Akamgharukia ula mche, akamti Simioni, “Wemyoye uu mche? Neingie he nyumba yako, tuninkie mpombe ya maghu angu, mira uu enidofije masoji he maghu angu na kuahanghuja kwa nywii ja mtwi wakwe.

⁴⁵ We tunibwitie, mira uu too neingie teshighie kunibwita mno maghu angu.

⁴⁶ Mtwi wangu tuuvirire mafuta, mira uu enivirire maghu angu mafuta epupuntika nezo.

⁴⁷ He vuntu vwa ivyo, nikutio, Ashighiwa mabanu akwe mangisha, kila ekeyie lukukndo lubaha; mira, ula eshighiwe kidori, na lukundo lwakwe nire ludori.”

⁴⁸ Ekikenja akamti ula mche, “Washighiwa mabanu ako.”

⁴⁹ Niho vala veikae he kijo hamwe naye, vakavoka kuteta he ngoro javo, “Uu ni ani, sheighia mabanu?”

⁵⁰ Akamti ula mche, “Mwitikijo wako wakukija, tonga na mporere.”