LUKA 5 - Chasu New Testament 1967

Mwitango wa varateri va kuvoka

¹ Aho mavungano vekimsisima iti vasikije kiteto cha Mrungu, ye ekiimuke mbaimbai ya ipe la Genesareti;

² akavona ngilawa mbiri jeho nkandeni ya ipe, mira vazaloa vafuma, veoja nyavu javo.

³ Akaingia he ngilawa mwe yakwe Simioni, akamti aisongeje na cha hae hadori, ivuke kula nkandeni. Akaikaa si, akacheja ala mavungano eho he ngilawa.

⁴ Ekikenja kuteta, akamti Simoni, “Itonje mhaka hala hantu heseishe, mugere nyavu jenyu, muloe samaki.”

⁵ Simioni akagharusha, akamti, “Mfumwa, twerongie ndima kio chose, tetuvonie kintu; mira kwa kiteto chako ninegera nyavu.”

⁶ Vekinakete huvo, vakagura samaki nyingi mno, nyavu javo jikaenda kuchika.

⁷ Vakakonya vaghenji vavo veho he ngilawa ya keri, vaze kuvaghenja; vakaza, vakaizuja ngilawa jose mbiri, jikaenda kudidimira.

⁸ Simioni Petro ekivona ivyo, akamdunkutia Yesu, ekiti, “Vuka hemi Mfumwa, ambu mi ni mntu mwenye mabanu.”

⁹ Ambu agurwa ni kimako, ye na vose vekina naye, he mburi ya samaki nyingi vevonie;

¹⁰ nirehuvo hata Yakobo ne Yohane, vana Zebedayo, vala eki vaghenji vakwe Simioni. Yesu akamti Simioni, “Usifoleke, kuvokia iki uneoka mzaloa vantu.”

¹¹ Vekikenja kutwekeja ngilawa javo, vakashigha vyose, vakamratera.

Kubanjwa kwa mreumbuka

¹² Aho eho he muzi mmwe wa ila mizi, hekina mntu eumbuka mwiri wose; naye ekiramvona Yesu, akakugusha, akasoma vusho si, akamsemba ekiti, “Mfumwa, wekikunda uidima kunizerija.”

¹³ Naye akaronga mkono wakwe, akamkunta ekiti, “Nakunda, zera.” Hala indi kuumbuka kwakwe kukamshigha.

¹⁴ Akamsuja asimvwire mntu, esire, “Tonga urekuvonyesha he mtasi; he vuntu vwa kuzera kwako, uinkije sa vuntu Mose eazere, kivaokie vuonwa.”

¹⁵ Mira mburi jakwe jikazika kugisha, mavungano majinki vakavungana vamsikije na kubanjwa mawaji avo.

¹⁶ Mira ye akakunegha na mondo, akatonga hantu hesina vantu, akaomba.

Muntu eholoje ebanjwa

¹⁷ Niho msi mmwe wa misi ila, ekiho echeja, Vafarisayo na vacheji va myomongwa, vefuma he kila kamuzi ka Galilaya na Yudea na Yerusalemu, vekiikae si aho. Na nzinya ja Mfumwa jekina naye, aidime kubanja.

¹⁸ Hakaza vantu vetikie mntu na kitanda, eholoje; vakaenda kumwingija na kumvika hala hantu eho.

¹⁹ Vekinasove kapengere ka kumwingijija, vuntu vwa vala vantu vajinki, vakakwea wanga he gu, vakamwingijija he matufari, vakamseja na kitanda chakwe hala hantu Yesu eho.

²⁰ Naye ekinavone mwitikijo wavo, akamti, “Mbwiaa, washighiwa mabanu ako.”

²¹ Niho vala vaandiki na Vafarisayo vakavoka kuvwijana vekiti, “Ni ani uu eteta viteto vya falaja? Ni ani eidima kushighia mabanu esire Mrungu mwenye?”

²² Yesu akamanya maririkano avo, akagharusha, akavati, “Muvwijana ni he ngoro jenyu?

²³ Kijangu ni kihi? ni kuti, ‘Washighiwa mabanu ako,’ kana ni kuti, ‘Vuka utonge?’

²⁴ Mira nesa mumanye iti Mwana wa Mntu ena nzinya aha he si ii ya kushighia mabanu,” akamti ula eholoje, “Nikutio, Vuka utike kitanda chako, ughotoke na kaa hako!”

²⁵ Hala indi akaimuka mozya hevo, akakutwisha kila ekiyaie, akaghotoka na kaa hakwe, ekimkaza Mrungu.

²⁶ Vose vakagurwa ni kimako, vakaamkaza Mrungu, vakagurwa ni fole, vekiti, “Yoo twavona mburi ja kumaka.”

Mwitango wakwe Levi

²⁷ Nyuma ya ivyo akafuma, akavona mreghuha kodi eitangwa Levi, ekiikae he nyumba ya kughuhia kodi, akamti, “Niratera!”

²⁸ Akavuka, akashigha vyose, akamratera.

²⁹ Levi akamharehia mbao mbaha he nyumba yakwe; hekina mzomano m’baha wa vareghuha kodi na vantu vangi veikae si he kijo hamwe navo.

³⁰ Vafarisayo hamwe na vaandiki vavo vakadughunyikia varateri vakwe, vekiti, “Hanini mwela na kunwa hamwe na vareghuha kodi na vabanu?”

³¹ Yesu akagharusha, akavati, “Vala vesiwaa teveenda mghanga, esire vala vewaa.

³² Sizie kuvaitanga venye kitea, esire vabanu, nesa vaidime kuchwa mti.”

Ivwijo la kukuima

³³ Navo vakamti, “Varateri vakwe Yohane vechunga kantu kajinki na kuomba maombi; na varateri va Vafarisayo nirevwo; mira varateri vako vo vela na kunwa!”

³⁴ Mira Yesu akavati, “hamao, vala verarikwe he mlomdolo muidima kuvati vachunge, aho verena na mralondola?

³⁵ Mira heneza msi mralondola enevushwa hevo, misi iyo niho venekuima.”

³⁶ Akavavwira na kisoma, “Tehena ye echwa ndame ya suke shaa na kiugera he suke yesake; kakicha eketa huvo, enechwa ila shaa, na ila ndame ya suke shaa teiringane na ila suke yesakae.

³⁷ Neri tehena mntu egera luhwa he mbuta jesakae; na kakicha ekigera, lula luhwa lunebaja jila mbuta, mawa eneitika, na mbuta jinekondika.

³⁸ Mira luhwa kitara lugerwe he mbuta shaa.

³⁹ Neri tehena enwa mawa echikie akaenda wa luhwa, ambu eti ala echikie nio e edi.”