LUKA 23 - Chasu New Testament 1967

Yesu mozya hakwe Pilato mlao wa Kiroma

¹ Luvungano lwose vakavuka, vakamtonja kwa Pilato.

² Vakavoka kumsitaki vekiti, “Twemvonie uu ekikombosha mbari yetu, na kuvasuja vantu vasimunke Kaisari kodi, ekiti iti ye mwenye niye Kristo Mfumwa.”

³ Pilato akamvwija ekiti, “We niwe mfumwa wa Vayuda?” Akagharusha akamti, “Sa vuntu wati.”

⁴ Pilato akavati vabaha va vatasi na luvungano, “Mi sivona kintu kivivi he uu mntu.”

⁵ Navo vakazikatetisha, vekiti, “Esembeka vantu, ekicheja Yudea hose, kuvokia Galilaya mhaka aha.”

Yesu mozya hakwe Herode

⁶ Pilato ekinasikie ivyo, akavwija iti uu ni mntu wa Galilaya.

⁷ Ekinamanye iti eho he kifumwa chakwe Herode, akamwinkija hakwe Herode, kila naye ekireho kula Yerusalemu misi ila.

⁸ Niho Herode ekinamvone Yesu akaizihirwa mno, ambu ekiendisha too misi mingi kumvona, ambu esikie mburi jamwe, akaarira kuvona luvengo lwerongwa niye.

⁹ Akamvwija viteto vijinki, mira ye asimgharushe neri.

¹⁰ Vabaha va vatasi na vaandiki vakavuka, vakamsitaka haiwa.

¹¹ Herode hamwe na vasikari vakwe vakamfalaja, vakamsola na kumjika suke jedi; vekikenja vakamhundua hakwe Pilato.

¹² Niho msi ula ula Herode ne Pilato vakasikijanya na kuoka vambwie, ambu aho kuvoka vekina nzo venye kwa venye.

Pilato, Baraba ne Yesu

¹³ Pilato naye akazomanya vabaha va vatasi, na vabaha na vantu,

¹⁴ akavati, “Uu mntu mwemwetie hangu iti ekombosha vantu, rereha, nami namlaha mozya he unywi, mira sivonie kivivi heye neri, he ivyo mwemsitake.

¹⁵ Neri Herode, ambu amhundua hetu, heicho, rereha, tehena neri kivivi chochose eketie chemtara kufwa.

¹⁶ Heicho ninem’bigha, nimchungue.” [

¹⁷ Kila chemtara kuvachunguia mnkore mmwe he igheri la msi m’baha.]

¹⁸ Vakalonza vose hamwe, vekiti, “Mvushe uu, utuchunguie Baraba.”

¹⁹ Naye neki mntu ekichungiwe vuntu vwa ivoo levoneke he muzi, na kwa kukoma.

²⁰ Pilato akateta navo ka keri, kila ekienda kumchungua Yesu.

²¹ Mira vakalonza, vekiti, “Mvambe he msalaba, mvambe he msalaba!”

²² Akavavwira ka katatu, “Hanini? Ni kivivi ani uu eketie? Sivonie heye kintu chemtara kufwa; mira nekikenja kum’bigha, ninemchungua.”

²³ Mira vakazikateta na izii ibaha, vekienda avambwe he msalaba; kilonzo chavo kikavota.

²⁴ Pilato akachwa iti mikundire yavo ikoloke.

²⁵ Akamchungua ula ekichungiwe vuntu vwa mavoo na kukoma, eye vemwendie; akamwinkija Yesu vamketie sa vuntu vekunda.

²⁶ Aho vekimvusha hala, vakamgura mntu mmwe, Simioni Mkirene. Naye ekifumie he mighunda, vakamtwisha msalaba, autike aze nyuma he Yesu.

Yesu evambwa he msalaba

²⁷ Luvungano lubaha lwa vantu vakamratera, na vantu va kiche vekimwelila na kukubigha mpafu.

²⁸ Yesu akavagharukia, akati, “Unywi vana va kiche va Yerusalemu, musiniie mi, mira kuiieni unywi venye na vana venyu.

²⁹ Ambu rereha, heneza misi, eyo veneti, ‘Varela vwedi ni vala e migumba, na ndeni jesijitoha, na mavee esiamwisha.’

³⁰ Niho venevoka kuvwira kuvwira ntuvi, ‘Tugwieni,’ na vidunda, ‘Tushiieni.’

³¹ Ambu kakicha veketa huvo he mti mvisi, kineoka ze he ula weomie?”

³² Hakatikwa na vangi veri vabanu, varekomwa hamwe naye.

³³ Vekinafike hala hantu heitangwa he mtwi, vakamvamba he msalaba aho, hamwe na vala vabanu, mmwe mondo wa kume na mmwe mondo wa kumoso.

³⁴ Yesu akati, “Vava, uvashighie, ambu tevemanyije icho veketa.” Vakaghava suke jakwe kwa kushotana manga.

³⁵ Vantu vakaimuka vekirerehia. Vala vabaha navo vakamsola, vekiti, “Ekijije vangi, nakukije se ye mwenye, kakicha niye Kristo wa Mrungu esaghurwe niye.”

³⁶ Vala vasikari navo vakaremsola, vekimswia na kumunka siki,

³⁷ kangi vekiti, “Kari we niwe mfumwa wa Vayuda, ukukije we mwenye.”

³⁸ Na wanga heye hekina kivonyesho, “UU NIYE MFUMWA WA VAYUDA.”

³⁹ Na mmwe wa vala varekonda vevambiwe he msalaba akamrara, ekiti, “H’ii, siwe Kristo? Kukije se we mwenye hamwe na uswi.”

⁴⁰ Mira ula wa keri akamgharusha, akam’bohija, ekiti, “Nawe wa tumfoleka neri Mrungu, uko nawe ureho he mlaho uo uo?

⁴¹ Nawo, he uswi ni wa singisirya, ambu tuinkwa mhako wa kiringanyo cha mihiro yetu; mira uu tehena cho kivivi eketie.”

⁴² Ekikenja, akati, “E, Yesu, unanikumbuke wekiingia he vufumwa vwako.”

⁴³ Yesu akamti, Kididi nikutio, “Yoo ili uneikaa hamwe nami he Paradiso.”

Kifwa chakwe Yesu

⁴⁴ Aho neki sa igheri la saa mtandatu, hakagwa kija he isanga lose mhaka saa kenda,

⁴⁵ kianga cha izuva kikafwirira; na ila pazia yeghavie nyumba ya mtaso ikabajika ghati.

⁴⁶ Yesu akaiagha na izii ibaha, ekiti, “E, Vava, nivika ngoro yangu he mikono yako.”

⁴⁷ Ekikenja kuteta huvo, akachika moo. Ula akida ekivona vila vyeketike, akamkaza Mrungu, ekiti, “Kididi uu mntu neki mkitea.”

⁴⁸ Mavungano ose a vantu evo vekizomane kurereha ivyo vyeketike, vekinavone vila vyeketike, vakaghotoka na kaa havo vekikubigha-bigha mpafu.

⁴⁹ Na vose vala vemanyane naye, na vache vala vekitonjanya naye kufuma Galilaya, vakaimuka hae vekirereha ivyo.

Kujikwa kwakwe Yesu

⁵⁰ Niho hakavoneka mntu mmwe, eitangwa Yosefu, e mntu wa chila, mntu wedi, mkitea;

⁵¹ (esekundie mburi javo na icho veketie,) naye neki mntu wa Arimatia, muzi mmwe wa Vayuda, naye ekiinda vufumwa vwa Mrungu;

⁵² uo mntu akatonga hakwe Pilato, akaenda kuinkwa mwiri wakwe Yesu.

⁵³ Akauseja, akauvunga na shanda ya suke nyewa, akauvika he mbira yetungiwe he mrarabwe, hesinayajwa mntu heyo neri.

⁵⁴ Na uo msi neki wa kuringanyija sabato, nayo ikavoka.

⁵⁵ Na vala vache vezie naye kufuma Galilaya vakaratera, vakavona mbira, na sa vuntu mwiri wakwe wevikiwe.

⁵⁶ Vakahunduka, vakaringanya vintu vyepupuntika, na mafuta. Vakahema msi wa sabato sa vuntu cheamorwe.