LUKA 22 - Chasu New Testament 1967

Irenge lakwe Yuda

¹ Msi m’baha wa mikate yesigerirwe chachu, ewo weitangwa, Msi m’baha wa Pasaka, ukafika hafuhi.

² Vabaha va vatasi na vaandiki vekienda nzia ya kumkomia; ambu vekifoleka vantu.

³ Shetani akamwingia Yuda, eitangwa Iskarioti; naye ni mmwe wa vala ikumi na veri.

⁴ Akavuka akatonga kuratera na vanaha va vatasi na vabaha va vasikari, vuntu eneidima kumwinkija he mikono yavo.

⁵ Vakaizihirwa, vakaaghana naye kumunka fedha.

⁶ Akakunda, akaenda nzia vuntu enemwinkija hevo hantu hesina luvungano.

Kuringanyika kijo cha msirikijo

⁷ Msi wa mikate yesigerwa chachu ukafika ewo wetara kukoma Pasaka.

⁸ Akavatuma Petro ne Yohane, ekiti, “Tongani muturinganyije Pasaka, nesa tuile.”

⁹ Vakamti, “Uenda tuiringanyije hio?”

¹⁰ Akavati, “Rereha, mwekiingia he muzi, munezomana na mntu wa kiume etikie sangu ya mpombe; mratereni, muingie he nyumba ye eneingia.

¹¹ Mumti uo mwenye nyumba Mcheji ekuti, ‘Chumba cha vagheni kiohi, nesa nilie hi Pasaka hamwe na varateri vangu?’

¹² Naye enemuvonya chumba kibaha uko gu, chekenjije kuhambwa; ringanyijani aho.”

¹³ Vakatonga, vakavona sa vuntu evavwirire, vakaringanya Pasaka.

Kijo cha msirikijo

¹⁴ Saa ikinafike, akaikaa si halia kijo, ye hamwe na ntume.

¹⁵ Akavati, “Nesikie nkwina mno kula ii Pasaka hamwe na unywi aho nesinarishwa vwasi;

¹⁶ ambu nimutio, Sikareila wa, mhaka yenekoloshwa he vufumwa vwa Mrungu.”

¹⁷ Akaghuha kikombe, akaanjela, akati, “Koni iki mughaviane;

¹⁸ ambu nimutio, Kuvokia iki sikarenwa cha ntunda ja mizabibu, mhaka vufumwa vwa Mrungu vwekineza.”

¹⁹ Akaghuha mkate, akaanjela, akaubendua, akavainka, ekiti, “Uu niwo mwiri wangu weinkijwa vuntu vwenyu; ketani huvo kwa kunikumbuka.”

²⁰ Na kikombe nirehuvo, vekikenja kula; ekiti, “Kikombe iki ni kiaghano kishaa he sakame yangu yeitwa vuntu vwenyu.

²¹ Mira rereha, mkono wa ula enirengeha uho hamwe nami aha he meza.

²² Ambu Mwana wa Mntu etonga sa vuntu cherekerwe; mira vwasi vwa mntu ula enemrengeha.”

²³ Vakavoka kuvwijana venye na venye, “Ni ani eneketa icho.”

Vubaha vwa idi

²⁴ Vakaketa nkani ghati hevo, kuti ni ani chemtara kuoka m’baha.

²⁵ Akavati, “Vafumwa va Vakiisanga vemutetia, na vala vena nzinya hevo veitangwa vedi;

²⁶ mira he unywi kisioke huvo, esire ula e m’baha he unywi, naoke sa e mdori; na ula e mrongori aoke sa mrepipirikia.

²⁷ Kanao, m’baha ni uhi, ni ula eikae si he kijo kana ni ula epipirikia.

²⁸ Ni unywi mweikae nami he mighesho yangu.

²⁹ Nami nimuvikia unywi vufumwa, sa vuntu Vava wangu enivikiie mi;

³⁰ nesa muidime kula na kunwa he meza yangu uko he vufumwa vwangu; na kuikaa he vichumbi vya kifumwa, na mwekilaha mbari ikumi na mbiri ja Israeli.”

Kukana kwakwe Petro kwerotiwe

³¹ Akati, “Simoni, Simoni, rereha, Shetani emuenda unywi amuhete sa ngano;

³² mira nekuombiie iti mwitikijo wako usiduike; nawe wekinegharuka uvadindije vandughu vako.”

³³ Akamti, “Mfumwa, neho hamwe nawe nekuringanye kutonga he kichungo kana na ere he kifwa.”

³⁴ Akati, “Petro, nikutio, Yoo nkuruvi teikaambe, wesinanikana kantu katatu iti tunimanyije.”

³⁵ Akavavwija, “Hala nekimutumie mwesina mfuko neri ibene, neri viratu, mwekisovekiwe ni kintu?” Vakati, “Hai!”

³⁶ Akavati, “Mira iki, ena mfuko nautike, nirehuvo hata ibene; na ula esina mhandwi, nataghe ijoho lakwe auzore.

³⁷ Ambu nimutio, Ivyo vyeandikwe nire sari vikoloshijwe he mi; iti, ‘Etarirwe hamwe na vabanu.’ Ambu vila vyenitara vina mhaka wavyo.”

³⁸ Vakamti, “Mfumwa, rereha aha hena mihandwi miri.” Akavati, “Ikoloka.”

Getsemane

³⁹ Akafuma akatonga he ntuvi ya Mizeituni, sa vuntu emanyere; varateri vakwe vakatonjanya naye.

⁴⁰ Ekinafike aho hantu, akavati, “Ombani, nesa musireingia he mighesho.”

⁴¹ Ye mwenye akatana navo sa kiringanyo cha kuvirita ibwe, akadunkuta, akaomba, ekiti,

⁴² “E, Vava, wekikunda, univushije iki kikombe; mira si sa vuntu nekunda, esire kikundire chako kikoloke.”

⁴³ Malaika efuma uko wanga akamzia, akamdindija.

⁴⁴ Naye kila eho he vwasi, akazika kuomba mno; isenuko lakwe likaoka sa madofe a sakame ekidofa aho si.

⁴⁵ Ekikenja kuomba akavazia varateri vakwe, akavakicha vashinjia lughohe vuntu vwa lusoyoyo.

⁴⁶ Akavati, “Hanini mweshinjia lughohe? Vukani muombe, musireingia he mighesho.”

Kugurwa kwakwe Yesu

⁴⁷ Aho echeriteta, nziilo irivati la vantu na ula eitangwa Yuda, mmwe wa vala ikumi na veri, evarongorire, akamzia Yesu hafuhi nesa am’bwite.

⁴⁸ Yesu akamti, “Yuda, umrengeha Mwana wa Mntu kwa kum’bwita?”

⁴⁹ Na vala veho hafuhi naye vekivona icho cheketika, vakati, “Mfumwa, tuvateme na mhandwi?”

⁵⁰ Mmwe wavo akamtema mzoro wa mtasi m’baha, akamchwa isikio la kume.

⁵¹ Yesu akagharusha, akati, “Kushighireni du.” Akamkunta isikio, akam’banja.

⁵² Yesu akavati vabaha va vatasi na vabaha va nyumba ya mtaso na vaghosie vezie vuntu vwakwe, “Mwezie na mihandwi na marungu sa mweragura mkibonda.

⁵³ Misi yose nekiho na unywi he nyumba ya mtaso, temunirongiie mkono, mira ii niyo saa yenyu ya nzinya ya kija.”

Petro emkana Yesu

⁵⁴ Vakamgura, vakamtonja, vakatonga naye he nyumba ya mtasi m’baha. Petro naye akamratera eho cha hae.

⁵⁵ Vekinafute moto hala ghati he iboho, vakaikaa si hantu hamwe, Petro naye akaikaa ghati hevo.

⁵⁶ Niho mgitu mmwe akamvona eikae si he kianga, akamrerehisha, akati, “Na uu ekina naye.”

⁵⁷ Akakana, akati, “We mche, simmanyije.”

⁵⁸ Kakenda kadori mntu ungi akamvona, akati, “We nawe ure mmwe wavo.” Petro akati, “We mntu, esimi.”

⁵⁹ Saa mwe yekivecha, mntu mmwe akazikateta, “Ni cha idi, na uu ekirena naye, ambu naye nire Mgalilaya.”

⁶⁰ Petro akati, “We mntu, simanyije iti uteta ni.” Na aho echeriteta, nkuruvi ikaamba.

⁶¹ Petro akakumbuka kila kiteto cha Mfumwa vuntu emvwirire, “Yoo nkuruvi yesinaamba unenikana kantu katatu.”

⁶² Akafuma na nze, akaia kwa lusulumiro.

⁶³ Na vala vantu vemgurire Yesu vakamsola, vakam’bigha.

⁶⁴ Vakamfinikira meso, vekikenja vakamvwijavwija, vekiti, “Rota, ni ani ekubighie?”

⁶⁵ Vakamteta na viteto vingi vijinki vya kumrara.

Yesu mozya ya vatasi vabaha

⁶⁶ Igheri hekinache, hakavungana mvungano wa vaghosi na vabaha va vatasi, na vaandiki, vakamwete he chila yavo, vekiti,

⁶⁷ “Kakicha niwe Kristo tuvwire.” Akavati, “Nanikatemuvwira, temukaitikije neri.

⁶⁸ Kangi nekimuvwija, temukagharushe.

⁶⁹ Mira kuvokia iki, Mwana wa Mntu eneikaa mondo wa kume wa Mrungu Mwenyenzinya.”

⁷⁰ Vakateta vose, “Iki we niwe Mwana wa Mrungu?” Akavati, “Ni unywi mwati iti mi niye.”

⁷¹ Vakati, “Iki tuendiani wa vuonwa? Ambu uswi venye twasikia viteto vya momo wakwe.”