LUKA 21 - Chasu New Testament 1967

Ka senti ka mche mkiva

¹ Akavusha meso akwe, akavona vazuri vekigera matasi avo he sanduku ya ndungu.

² Akamvona mche mmwe mkiva efwiiwe ni mme, ekigera ho senti mbiri.

³ Akati, “Kididi nimutio, “Uu mche mkiva efwiiwe ni mme, egerire vajinki kukela vose;

⁴ ambu avo vose vetasie vila vyeshele he mari javo, mira uu he vukiva vakwe, egerire vyose ena navyo.”

Yesu erota kukondika kwa Yerusalemu na mkengelejo wa si ii

⁵ Vantu vasiku aho vekigaya mburi ya nyumba ya mtaso, sa vuntu yehambiwe na mabwe edi ni matasi a vantu; akati,

⁶ “Ivyo mwevirereha, hena misi yeneza, eyo hesikashighwe ibwe wanga he ibwe, lesibomowe.”

⁷ Vakamvwija vekiti, “Mcheji, ivyo vineoka rini’ Kangi, ni luvengo ani lwa ivyo iti vi hafuhi kuoka?”

⁸ Akati, “Rerehani, musireishwa, ambu vajinki veneza he izina langu, vekiti, ‘Mi niye;’ kangi: ‘Igheri lazengelela.’ Musivaratere avo.

⁹ Na unywi mwekinasikia mburi ya nkondo na marenge, musiitushwe; ambu ivyo vyose niresari virongeza, mira ula mkengelejo teunate.”

¹⁰ Ekikenja, akavati, “Mbaari inevuka kuomana na mbari, na vufumwa kuomana na vufumwa;

¹¹ heneketa vididimo vibaha he isanga; na nzota na mahumpa hose hose; vintu vyeitusha na maluvengo mabaha efuma uko wanga.

¹² Mira ivyo vyose vyesinaoka, venemugura na kumuweriwerisha, venemutonja he masinagogi na kumugera he nyumba ja vichungo, mutonjwe he vafumwa na valao vuntu vwa izina langu.

¹³ Na ivyo vineoka vuomwa he unywi.

¹⁴ He icho, dindwani ni ngoro, na kusadunganya cho mwenegharusha;

¹⁵ ambu mi ninemuinka momo na viugho, evyo vala vemurisha vwasi vose vesikaidime navyo neri kuvikinda.

¹⁶ Na unywi munerengehwa ni vamoghi venyu na vandughu venyu, na va lukolo lwenyu, na vambwie venyu, navo venekoma va kumwe venyu.

¹⁷ Na unywi munevihiwa ni vantu vose vuntu vwa izina langu.

¹⁸ Mira neri lujwii lumwe he mitwi yenyu telukateke.

¹⁹ Na he kugumirija kwenyu, munekija ngoro jenyu.

²⁰ Mira aho mwekinevona muzi wa Yerusalemu wajungulukwe ni vankondo, aho manyani iti kukondika kwawo kwazengelela.

²¹ Niho veho Yudea vaahe na he ntuvi, na veho ndeni hewo, vaahe na nze, na veho he mighunda, vasireuingia.

²² Ambu misi iyo niyo ya mabigho, nesa vyose vyeandikwe vikoloshwe.

²³ Vwasi vwa vala vena ndeni na veamwisha iyo misi! Ambu heneketa mavwasi majinki he isanga, na oro inegwia ii mbari.

²⁴ Venenyajwa kwa mhandwi wekehe, kangi venetahwa na kutikwa nkore he mbari jose; na Yerusalemu unevatwa ni Vakiisanga, mhaka igheri la Vakiisanga lenekoloka.

²⁵ Kangi, henevoneka maluvengo he izuva, na he mweji, na he ntondo; na isanga heneketa vwasi vwa vaisanga, vekihomborera he vuntu vwa mrurumo wa bahari na mkushiko wayo;

²⁶ vantu venechuchuntika vuntu vwa fole na kuinda vila vyenezia si ii; ambu nzinya ja uko wanga jineyungayunga.

²⁷ Aho niho venemvona Mwana wa Mntu ekiza kwa ijumbi, hamwe na nzinya na ngazo mbahisha.

²⁸ Aho ivyo vintu vyekivoka kuvoneka, shangalalwani, muvushije mitwi yenyu, ambu vukomboli vwenyu vwazengelela.”

Kukucheia

²⁹ Akavavwira mfwanano, “Rerehani mkuu na miti ingi yose.

³⁰ Igheri yeshoshuja, muvona na kumanya venye iti magheri a lufindiki zaengelela.

³¹ Na unywi nirehuvo, mwekivona ivyo vyekivoka kuvoneka, manyani iti vufumwa vwa Mrungu vwazengelela.

³² Kididi nimutio, Lukolo ulu telukaveche, mhaka ivyo vyose vikoloke.

³³ Wanga na si vinevecha, mira viteto vyangu tevikaveche neri.

³⁴ Heicho, kurindeni, ngoro jenyu jisiresindwiiwa ni kuliisha na vuengeji, na mabinuko a moo uu; ula msi ukaremuputukija, sa vuntu mtegho wegurija;

³⁵ ambu nivwo vuntu wenezia vantu vose veikaa he vusho vwa si ii yose.

³⁶ Heicho, yaeni kiavi magheri ose mwekiomba, nesa muidime kuikaa he ivyo vyose vyenevoneka, na kuimuka mozya ya Mwana wa Mntu.”

³⁷ Heicho, kila msi ekicheja he nyumba ya mtaso, na kio ekitonga kushinjia he ntuvi ya Mizeituni.

³⁸ Na vantu vose vekiroka chaheyavo kere kutonga he nyumba ya mtaso, nesa vamsikije.