LUKA 2 - Chasu New Testament 1967

Kumoghwa kwakwe Yesu

¹ Misi ila hakafuma momo he Kaisari Augusto, iti mazina a vantu vose va isanga aandikwe.

² Uo niwo mwandiko wa kuvoka, weandikwe aho Kirenio e Mfumwa m’baha wa Sirya.

³ Vantu vose vakatonga kuraandikwa, kila mntu he muzi wavo.

⁴ Yosefu naye akavuka Galilaya, kufuma he muzi wa Nazareti, akakwea kutonga Yudea mhaka he muzi wakwe Davidi, weitangwa Betlehemu, kwa kuti ni mbari na lukolo lwakwe Davidi;

⁵ nesa aandikwe hamwe ne Maria mwai wakwe, eye emzangie, naye ena ndeni.

⁶ Igheri he igheri veho uko, misi yakwe ya kuchunguka ikafika,

⁷ akamogha mwana wakwe wa vwai, akamdoka suke ja kivwana, akamyaja he ibanti hantu ng’ombe jelia, ambu tevonie kiraro he nyumba ya vagheni.

⁸ Na he isanga lila hekina varisha ifio lavo kio uko shighati kwa kutarirana.

⁹ Malaika wa Mfumwa akavafumia pwasa, ngazo ya Mfumwa ikavaangaia myondo yose, vakaingiwa ni fole mbaha.

¹⁰ Malaika akavati, “Musifoleke! ambu nemuetie mburi yedi ya kuizihirwa kubahisha kwa vantu vose;

¹¹ ambu yoo mwemoghiiwe Mkija he muzi wakwe Davidi, niye Kristo Mfumwa.

¹² Na luvengo he unywi ni ulu; munefikia kajana kanyenke, kedokiwe suke ja kivwana, keshinjie he ibanti hantu ng’ombe jelia.

¹³ Hala indi hamwe na uo malaika, hakaketa irivati la vamalaika vajinki va uko wanga, vekim’bumija Mrungu, vekiti,

¹⁴ “Ngazo mbahisha ni ya Mrungu, Na mporere aha he si ii, he vantu egoie hevo.”

¹⁵ Igheri avo vamalaika vekinavuke vekighotoka uko wanga, vala varisha vakavwirana, “Herikoni tutonge mhaka Betlehemu, tureyoa icho cheketike, echo Mfumwa akitumanyisha.”

¹⁶ Vakatonga fia, vakamkicha Maria ne Yosefu na kala kajana kanyenke keshinjie he ibanti.

¹⁷ Vekinakavone vakaukula mburi vevwirirwe ya ako kajana.

¹⁸ Vose vekisikie vakamaka he ivyo vevwirirwe ni varisha.

¹⁹ Mira Maria akagura ivyo viteto vyose, ekividunganya he ngoro yakwe.

²⁰ Vala varisha vakahunduka vekimaza Mrungu na kum’bumija he vintu vyose vevisikie na kuvivona, sa vuntu verevwirwa.

²¹ Misi mnane ya kumtavana yekikoloka, akaitangwa izina lakwe, Yesu, sa vuntu ekilichwiiwe ni malaika hala esinajitohwa.

Yesu etwawa he nyumba ya mtaso

²² Igheri, misi ya kukuzerija kwavo ikinakoloke, sa vuntu cheikee he myomongwa yakwe Mose, vakatonga naye mhaka Yerusalemu, iti vamvike he Mfumwa,

²³ sa vuntu cheandikwe he myomongwa ya Mfumwa, “Kila mwana wa kiume wa vwai he mlala wavo, naitangwe, ‘Ezerire he Mfumwa,’”

²⁴ na kuinkija ntogolo sa vuntu chetetiwe he myomongwa ya Mfumwa, vihunguru viri kana vusio vwiri vwa nziva.

Simioni mkitea

²⁵ Na hala Yerusalemu hekina mntu eitangwa Simioni, naye ne mntu ena kitea, emfoleka Mrungu, ekiinda ituja la Israeli; na Mpeho Wedi ekina naye.

²⁶ Naye ekivonyeshwe ni Mpeho Wedi iti tekafwe esinamvona Kristo wa Mfumwa.

²⁷ He kutonjwa ni Mpeho, akaza he nyumba ya mtaso; na vala vamoghi vekinamwingije ula mwana Yesu nesa vamrongie sa vuntu chetara he myomongwa,

²⁸ ye mwenye akamghuha na he maghanza akwe, akamwanjela Mrungu ekiti,

²⁹ “Iki Mfumwa wamchungua mndima wako, Kwa mporere, sa vuntu wetetie;

³⁰ Ambu meso angu avona lukio lwako,

³¹ Weluringanye he meso a vantu vose;

³² Kianga cha kuvaangajija Vakiisanga, Kangi kioke ngazo ya vantu vako Israeli.”

³³ Vavee na mlala wavo vakamaka ivyo vyetetiwe heye.

³⁴ Simioni akavainka lutelwedi, akamti Maria mlala wavo, “Rereha, uu mwana evikiwe wa kugusha na kuvusha Vaisraeli vajinki, kangi aoke luvengo lwa mkanani.

³⁵ Nawe mwenye mhandwi unekuingia he ngoro yako, nesa madunganyo a ngoro ja vantu vajinki amanyike.”

Ana

³⁶ Hekina mroti wa kiche; eitangwa Ana, mwana Fanueli, wa mbari yakwe Asseri; he kuikaa kwakwe ekina miaka mingi, nyuma ya vubora vwakwe eikae na mme miaka mfungate.

³⁷ Eikae miaka makumi mnane na mine efwiiwe ni mme; esekivuka he nyumba ya mtaso, esire kutasa kio na hemsi, he kukuima na kuomba.

³⁸ Uo akafumirira saa ila ila akamwanjela Mrungu, na vose vala vekiinda lukio he Yerusalemu, akavavwira mburi jakwe.

Vudori vwakwe Yesu

³⁹ Niho, vekinakenje kukolosha vyose sa vuntu veazerwe ni myomongwa ya Mfumwa, vakahunduka Galilaya he muzi wavo wa Nazareti.

⁴⁰ Ula mwana akaeha, akaongejika nzinya, eizue kiugho, na mbonea ya Mrungu yekiho heye.

⁴¹ Vazima vakwe navo vekinatonga Yerusalemu kila mwaka he igheri la msi m’baha wa Pasaka.

⁴² Ekinakoloshe miaka ikumi na miri, vakakwea he msi m’baha sa vuntu vemanyere.

⁴³ Navo vekinakoloshe ila misi, igheri la kughotoka, ula mwana Yesu akashala uko nyuma Yerussalemu, na vazima vakwe tevekimanyije.

⁴⁴ Vakati usiche eho he vacharo; vakaotonga msi mzima, vakamwenda he vandughu na vaghenji vavo;

⁴⁵ vekinamsove, vakahunduka Yerusalemu vekiramwenda.

⁴⁶ Hekivecha misi mitatu vakamvona he nyumba ya mtaso, eikae si ghati he vacheji, ekivasikija na kuvavwija mburi.

⁴⁷ Vose vemsikie vakamashwa ni kumanya kwakwe na migharushije yakwe.

⁴⁸ Vekinamvone vakamaka, mlala wavo akamti, “Mwanawa, hanini wekituketia huvo? Rereha vaveo nami twekuendie kwa lusoyoyo.”

⁴⁹ Akavati, “Hanini mwekinienda? Temumanyije iti kinitara kuikaa he nyumba ya Vava wangu?

⁵⁰ Navo tevetwarije icho kiteto avavwira.

⁵¹ Akasea hamwe navo mhaka Nazareti, akaikaa ekivasikia; na mlala wavo akavika ivyo vyose he ngoro yakwe.

⁵² Yesu akaongejika kiugho na kueha, akamwizihija Mrungu na vantu.