LUKA 19 - Chasu New Testament 1967

Zakayo

¹ Aho ekiingia Yeriko, akavechija ghati hewo.

² Naho hekina mntu, izina lakwe niye Zakayo, m’baha mmwe wa vareghuha kodi, naye ni mzuri.

³ Uo ekiendisha kumvona Yesu iti ni mntu ani, mira vuntu vwa irivati la vantu, asiidime, ambu neki mfuhi.

⁴ Akarongora ekisara, akakwea he mkuu, nesa amvone, ambu eneravechija he nzia iyo.

⁵ Yesu ekinafike hala hantu akarereha na wanga, akamti, “Zakayo, sea fia, ambu yoo kinitara kuikaa he kaa yako.”

⁶ Akasea fia, akamghuhia na kuizihirwa.

⁷ Niho vantu vekinavone huvo, vakadughunyika, vekiti, “Aingia na kuikaa ha mntu m’banu.”

⁸ Zakayo akaimuka, akamti Mfumwa, “Rereha Mfumwa, kibaje cha mari yangu niinka vakiva, na kari nemghumbie mntu kintu kwa kiavya, nimhunduia kantu kane.”

⁹ Yesu akamti, “Yoo lukio lwafika he ii nyumba, ambu uu naye nire mwana Abrahamu.

¹⁰ Ambu Mwana wa Mntu ezie kuenda kila chetekie na kukikija.”

Mfwanano wa mafungu

¹¹ Vekinasikie huvo, akazikateta mfwanano, ambu ekiho hafuhi na Yerusalemu, navo vakadunganya iti vufumwa vwa Mrungu vunevoneka hala indi.

¹² Niho akati, “Mntu mmwe wa kifumwa ekizoka he isanga la hae, nesa aghuhe vufumwa na kuhunduka.

¹³ Akaitanga vantu ikumi he vazoro vakwe, akavainka mafungu ikumi a fedha, akavati, ‘Susurijeni najo mhaka nekineza.’

¹⁴ Mira vantu va muzi wakwe vakamvihhiwa, vakatuma ntume kumratera, vekiti, ‘Tetuenda uu atutetie.’

¹⁵ Igheri ekirahunduka aho anavona vufumwa vwakwe, akatuma iti vala vazoro veinkiwe fedha vaitangwe, nesa amanye mnesha wa kila mntu emazie he kususurija.

¹⁶ Hakaza wa kuvoka, akati, ‘Mfumwa, ifungu lako lamaza mafungu ikumi kukela.’

¹⁷ Akamti, ‘Ni chedi, u mzoro wedi; kila weokie mkitengo he vintu vidori, unetetia mizi ikumi.’

¹⁸ Hakaza wa keri, akati, ‘Mfumwa, ifungu lako lamaza mafungu masano.’

¹⁹ Akamti uu naye, ‘Nawe utetie mizi misano.’

²⁰ Hakaza ungi, akati, ‘Mfumwa, lila ifungu lako nilo ili, nekilivanzie he mhaluma.

²¹ Ambu nakufoleka, kila we we mntu mkuji, ukughuhiha kintu wesikivikie, ufindika kintu wesikihandie.’

²² Akamti, ‘Ninekulaha kwa vya momo wako: U mzoro mvivi, wenimanyije iti mi ni mntu mtungulu, neghuha hantu nesivikie, na kufindika kintu wesihandie;

²³ hanini wesekivika fedha yangu he vala veinkija na mnesha, hesa nekiza niivone hamwe na mnesha wayo?’

²⁴ Akavati vala veimuke hala hafuhi Mghumbeni ilo ifungu, muremunka ula ena mafungu ikumi.

²⁵ Vakati, ‘Mfumwa, ena mafungu ikumi.’

²⁶ Nimutio, ‘Ula ena kintu eneinkwa, mira ula esina kintu, eneghumbwa na kila ena nacho.

²⁷ Kangi, vala vanzo vangu vesienda nivatetie, vaeteni aha muvakome mozya hangu.’”

Yesu eingia Yerusalemu kwa ngazo

²⁸ Ekinakenje kuteta huvo, akarongora mozya ekikwea kutonga Yerusalemu.

²⁹ Igheri ekinazengelele Betfage na Betania, he ntuvi yeitangwa ya Mizeituni, akatuma veri he varateri

³⁰ ekiti, “Tongani mhaka he kala kamuzi keho mozya henyu, mwekiingia munevona ndama ya njeo yechungiwe, yesinaveka mntu na rini, ichungeni muiete aha.

³¹ Kakicha mntu emuvwija, ‘Hanini mweichungua?’ Teteni huvu, ‘Mfumwa eienda.’”

³² Vala vetumiwe vakatonga, vakavona sa vuntu evavwirire.

³³ Aho vekichungua ndama ya njoe, venye vakavati, “Hanini mwechungua ndama ya njoe?”

³⁴ Vakavati, “Mfumwa eienda.”

³⁵ Vakaitonja he Yesu, vakatandisha suke javo wanga he ila ndama ya njoe, vakamkweja Yesu.

³⁶ Aho vekitonga, vakatandisha suke javo nzieni.

³⁷ Aho ekizengelela ha kusea he ntuvi ya Mizeituni, irivati lose la varateri vakwe vakavoka kuizihirwa na kumkaza Mrungu na izii ibaha he vuntu vwa vila vyose vevonie erongie na nzinya,

³⁸ vakati, “Mwene lutelwedi ni mfumwa ula eza he izina la Mfumwa; mporere na ngazo uko wanga.”

³⁹ Va kumwe he Vafarisayo vekiho he luvungano, vakamti, “Mcheji, uvakanye varateri vako.”

⁴⁰ Akagharusha akati, “Nimuti unywi, ava vekihuja, mabwe enelonza.”

Yesu eiia Yerusalemu

⁴¹ Ekifika hafuhi, akavona muzi, akauia,

⁴² ekiti, “Nanga wekimanya hata we, he uu msi, vila vyetara mporere! Mira iki vyaviswa meso ako.

⁴³ Ambu misi ineza, vanzo vako venekujengia lukuta, lukujunguluke; venekujivirija na kukukindirija myondo yose;

⁴⁴ na venekugusha si, we na vana vako vewaho ndeni, vasikushighie ibwe, ni kila wasamanya igheri la kuziiwa kwako.

Yesu ezerija nyumba ya mtaso

⁴⁵ Akaingia he nyumba ya mtaso, akavoka kuvafunya vala vekizorana,

⁴⁶ ekivati, “Cheandikwe: ‘Nyumba yangu ineoka nyumba ya kuombia,’ mira unyywi mwaighosha mpanga ya vaipato.”

⁴⁷ Naye kila msi akacheja he nyumba ya mtaso. Mira vabaha va vatasi na vaandiki, na vabaha va vantu, vekienda nzia ya kumkomia;

⁴⁸ vasivone cha kuketa, ambu vantu vose vekitonjanya naye, vekimsikija.