LUKA 18 - Chasu New Testament 1967

Mlahi esina kitea

¹ Akavavwira mfwanano, kuti kivatara kumwomba Mrungu misi yose, neri vasiteshe ikuji.

² Akati, “Hekina mlahi masa he muzi uo msiku, temfoleka Mrungu, neri vantu.

³ Na he muzi uo hekina mche efwiiwe ni mme, ekinamswia genda, ekiti, ‘Nichwia na mmasa wangu.’

⁴ Naye akasua kantu kajinki; uko nyuma akaganya he ngoro yakwe, ‘Nziaho simfoleka Mrungu neri vantu,

⁵ mira kila uu mche efwiiwe ni mme enikorishakorisha, ninemchwia kwa kitea, nesa asinifikije kwa kunizia genda.’”

⁶ Mfumwa akati, “sikijani ra sa vuntu uo mlahi mkusu eteta.

⁷ Hamao, Mrungu tekavainke kwa kitea vala vakwe vesaghurwe, vemwiaghia hemsi na kio, naye e mrevarimiria?

⁸ Nimutio, Enemuinka kwa kitea hala indi; mira, Mwana wa Mntu ekineza o, h’ii, enevona mwitikijo he si ii?”

Mfarisayo na mreghuha kodi

⁹ Akavavwira mfwanano uu he vantu vekuvonie venye iti ni vakitea, vekibera vangi vose,

¹⁰ “Vantu veri vekweie kutonga he nyumba ya mtaso kuratasa, mmwe ni Mfarisayo, wa keri ni mreghuha kodi.

¹¹ Ula Mfarisayo, akaimuka na kuomba huvu he ngoro yakwe, ‘E, Mrungu, nikukaza ambu mi sifwanane na vantu vangi: vakibonda, vatungulu, varashinda, neri sa uu mreghuha kodi.

¹² Mi nichunga kantu keri he juma; nifunya matasi he vila nevona vyose.’

¹³ Mira ula mreghuha kodi ye akaimuka hae, neri asiidime kuvusha meso akwe noko wanga, mira akakubigha-bigha mpafu, ekiti, ‘E, Mrungu, univoneie mi m’banu.’

¹⁴ Nimutio, uu eseie kutonga na kaa hakwe, etaririwe kitea kuvecha ula ungi; ambu ula ekukweja, enesejwa, na ula ekuseja, enekwejwa.”

Yesu einka vana vadoro lutelwedi

¹⁵ Vakamwetie vana vadori iti avakunte; mira varateri vakwe vekivavona vakavabohija.

¹⁶ Mira Yesu akavaitanga vaze heye, akati, “Vashigheni vana vadori vaze hangu, neri musivakinde; ambu vantu sa avo, vufumwa vwa Mrungu ni vwavo.

¹⁷ Kididi nimutio, Kila mntu esighuhia vufumwa vwa Mrungu sa mwana mdori, tekaingie hevwo ye neri.”

Nkalamo ya kae na kae na kukindwa ni mari

¹⁸ Mntu m’baha mmwe akamvwija, ekiti, “Mcheji wedi, nikete ze nesa niidime kupala nkalamo ya kae na kae?”

¹⁹ Yesu akamti, “Hanini weniitanga wedi? Tehena wedi esire mmwe, Naye niye Mrungu.

²⁰ We wemanyije maamoro: ‘Usishinde, Usikome, Usiive, Usitete vuonwa vwa mongo, Vikia vaveo na mlala wenyu shima.’”

²¹ Akati, “Ivyo vyose nevigurishe too vudori vwangu.”

²² Yesu ekinasikie huvo, akamti, “Heshele kintu kimwe chekuduikie: Tagha vyose wena navyo, uvaghavie vakiva, nawe unevanza ndungu uko wanga; wekikenja, nzo uniratere.”

²³ Naye ekinasikie huvo, akasononoya haiwa, ambu ekina mari nyingi.

²⁴ Yesu ekinavone huvo, akati, “Ni kiziya venye mari kuingia he vufumwa vwa Mrungu.

²⁵ Ambu ni kijangu ngamia kuvecha he ivoro la singano, kukela mzuri kuingia he vufumwa vwa Mrungu.”

²⁶ Vala vesikie vakati, “Ni ani ra eneidima kuingia?”

²⁷ Akati, “Vyesiidimika he vantu, he Mrungu viidimika.”

²⁸ Petro akati, “Rereha, uswi tweshighie vintu vyetu vyose tukakuratera.”

²⁹ Akavati, “Kididi nimutio, Tehena mntu eshighie nyumba, kana mche, kana vandughu, kana vamoghi, kana vana, he vuntu vwa vufumwa vwa Mrungu,

³⁰ esikaviinkwe kukela, kantu kajinki, he igheri ili, na he ilo isanga leneza, nkalamo ya kae na kae.”

Yesu erota kifwa chakwe ka katatu

³¹ Akavatika vala ikumi na veri, akavati, “Rerehani, tukwea kutonga Yerusalemu, na vila vyose vyemwindikiwe Mwana wa Mntu ni varoti vinekoloshwa.

³² Ambu enegerwa he mikono ya Vakiisanga, enefalajwa, eneketiwa tiri na kutufiwa mate;

³³ venem’bigha viboko, na venekoma; na msi wa katatu enevuka he vefwie.”

³⁴ Mira tevetwarije ivyo viteto neri hadori, icho kintu chekivisiwe hevo, neri tevetwarije icho chetetiwe.

Yesu ebanja ituntu

³⁵ Aho ekifika hafuhi na Yeriko, mntu mmwe ituntu ekiikae si mbaimbai ya nzia, ekitanja;

³⁶ ekinasikie mavungano vekivecha, akavwija, “Hena ni?”

³⁷ Vakamti, “Yesu wa Nazareti evecha.”

³⁸ Akalonzisha ekiti, “Yesu Mwana Davidi, univoneie.”

³⁹ Vala verongore vakam’bohija iti ahuje; mira ye akazikalonzisha, “E, Mwana Davidi, univoneie!”

⁴⁰ Yesu akaimuka, akati aetwe heye; ekimfikia, akamvwija,

⁴¹ “Uenda nikuketie ni?” Akati, “Mfumwa, niidime kuvona.”

⁴² Yesu akamti, “Inkwa ra kuvona; mwitikijo wako wakkubanja.”

⁴³ Hala indi akavona, akamratera ekimkaza Mrungu. Na vantu vose vekivona vakam’bumija Mrungu.