LUKA 17 - Chasu New Testament 1967

Mafundisho masiku akwe Yesu

¹ Akavati varateri vakwe, “Vikuvajo tevikatere kuza, mira vwasi vwa ula mntu vyeneza vuntu vwakwe.

² Chekimtara kukela, uo mntu achungijwe loa he singo yakwe, aregerwa he bahari, hantu enemgera mmwe wa ava vadori kuteshanya.

³ Kurindeni, kakicha mndughu wako ekiteshanya, mchunde, ekichwa mti, mshighie.

⁴ Hata kakicha eteshanya hako kantu kafungate he msi mmwe, na kuhunduka hako kantu mfungate, ekiti, ‘Nachwa mti,’ iremshighie.”

⁵ Ntume vakamti, “Mfumwa tuongejije mwitikijo!”

⁶ Mfumwa akati, “Nanga mwekiketa mwitikijo kiringanyo cha ntembe ya haradali, mwekiuti uu mkuu, ‘Ng’oleka urehandwa uko he bahari,’ nawo wekimusikia.

⁷ Mira, ni ani wa henyu, ena mzoro eima kana kurisha ng’ombe, eye enemti hala indi ekihunduka he mghunda, ‘Nzo fia, ikaa si ule kijo?’

⁸ Hamao, tekamti, ‘Niharehia kijo nile, kudoke unipipirikie mhaka nekikenja kula niho nawe wenela na kunwa?’

⁹ Ngea enemti ula mzoro nahavache, kila ahareha sa vuntu eazerwe?

¹⁰ Na unywi nirevwo, mwekikenja kuronga vyose mweazerwe, tini, ‘Uswi vazoro vesina lumazo; twarinda du kila chetutara kuronga.’”

Yesu ebanja vareumbuka ikumi

¹¹ Igheri aho veho nzieni vekitonga Yerusalemu, eho ekivecha ghati ya Samaria na Galilaya.

¹² Ekiingia he kamuzi kamwe, akakintana na vantu ikumi veumbuka; vakaimuka hae,

¹³ vakateta na wanga vekiti, “E, Yesu, Mfumwa, utuvoneie!”

¹⁴ Ekinavavone akavati, “Tongani murekuvonyesha he vatasi.” Aho vekitonga, vakazera.

¹⁵ Mmwe wavo ekivona iti abanda, akahunduka ekimkaza Mrungu na izii ibaha;

¹⁶ akasoma vusho si he maghu akwe, akamwanjela; naye neki Msamaria.

¹⁷ Yesu akagharusha, akati, “Tevezerijwe vose ikumi, vala kenda veohi?

¹⁸ Tehevoneke vehunduke kumunka Mrungu ngazo, esire uu mgheni?”

¹⁹ Akamti, “Vuka, kutongire, mwitikijo wako wakukija.”

Kuza kwa vufumwa vwa Mrungu

²⁰ Ekinavwijwe ni Vafarisayo, “Vufumwa vwa Mrungu vuza rini?” Akavagharusha, akavati, “Vufumwa vwa Mrungu tevuza kwa kuvusungia;

²¹ neri tevekati, ‘Rereha, vuwaha;’ kana, ‘Nzivula;’ ambu, rereha, vufumwa vwa Mrungu vuho ndeni he unywi.”

²² Akavati varateri, “Misi ineza, eho mwenesikia nkwina kuvona msi mmwe he misi ya Mwana wa Mntu, mira temukauvone.

²³ Kangi venemuti, ‘Rereha, kula! Rereha kunu!’ Musivuke hantu mweho, neri musivaratere;

²⁴ ambu sa vuntu luimiki lweimika kufuma mondo uu mhaka mondo ungi, nivwo vuntu Mwana wa Mntu eneoka he misi yakwe.

²⁵ Mira kuvoka, kimtara arishwe mavwasi mangi, na kusuwa ni lukolo ulu.

²⁶ Sa vuntu chekiikee he misi yakwe Noa, nivwo vuntu cheneoka he misi ya Mwana wa Mntu.

²⁷ Vekila na kunwa, vekilondola na kulondolwa, mhaka ula msi Noa aingia he safina, mpombe mbaha ikasea, ikavabunta vose.

²⁸ Nirevwo vuntu cheikee he misi yakwe Loti, vekila na kunwa, vekizorana na kutaghija, vekihanda na kujenga;

²⁹ mira msi ula Loti afumia Sodoma hakagwa moto na kibiriti kufuma uko wanga vikavabunta vose.

³⁰ Huvwo nivwo vuntu cheneoka he msi ula Mwana wa Mntu enefunukurwa.

³¹ He msi uo, eho wanga he nyumba, na ntanu jakwe jeho nyumba, asisee iti ajighuhe; nirehuvo, eho he mghunda asihunduke na nyuma.

³² Mkumbukeni mche wakwe Loti.

³³ Kila mntu eenda kukija moo wakwe eneutesha, na ula eneutesha, eneukija.

³⁴ Nimutio, kio icho vantu veri veho he kitanda kimwe; mmwe eneghuhwa, mmwe eneshighwa.

³⁵ Vache veri veshagha hamwe; mmwe eneghuhwa, mmwe eneshighwa.

³⁶ Vantu veri veho he mghunda; mmwe eneghuhwa, mmwe eneshighwa.”

³⁷ Vakagharusha, vakamvwija, “Hio Mfumwa?” Akavati, “Hantu hena kimba, niho hantu mitonyi yevungana.”