LUKA 15 - Chasu New Testament 1967

Igonji letekie

¹ Niho vareghuha kodi vose na vabanu vakamzia iti vamsikije.

² Vafarisayo na vaandiki vakadughunyika, vekiti, “Mntu uu eghuhia vabanu, kangi ela navo.”

³ Akavavwira mfwanano uu, ekiti,

⁴ “Ni ani henyu ena magonji ighana, imwe lekimtekera, esikashighe ala makumi kenda na kenda sakeni, akaratera lila letekie mhaka ekilivona?

⁵ Naye ekikenja kulivona, eliveka he vituro vyakwe ekiizihirwa.

⁶ Ekifika kaa hakwe, eitanga vambwie vakwe na vala etujane navo, ekivati, ‘Izihirwani hamwe nami, ambu nakenja kuvona igonji langu lekitekie.’

⁷ Nimutio, nirehuvo heneketa kuizihirwa uko wanga vuntu vwa m’banu mmwe echwa mti, kuvecha vuntu vwa venye kitea makimi kenda na kenda chesivatara kuchwa mti.

Shilingi yetekie

⁸ “Kana ni mche ani ena shilingi ikumi, ekitesha mwe, esiasha taa na kuhaghia nyumba, na kuendisha mhaka aivone?

⁹ Ekikenja kuivona, eitanga vambwie vakwe na vala etujanye navo, ekivati, ‘Izihirwani hamwe nami, ambu navona ila shilingi yetekie.’

¹⁰ Nimutio, nirevwo vuntu heneketa kuizihirwa he malaika va Mrungu, vuntu vwa m’banu mmwe echwa mti.”

Mwana etekie

¹¹ Akati, “Mntu mmwe ekina vana veri;

¹² ula mdori akamti vavee, ‘Vava ninka ifungu la mari lenitera!’ Akavaghavia vintu vyakwe.

¹³ Hesinavecha misi mingi, ula mwana mdori akavunganya vyose, akazoka isanga la hae; uko akakonda mari yakwe kwa kumelemeleta.

¹⁴ Ekikenja kula vyose, he lila isanga hakaingia nzota mbaha, ye naye akavoka kuoka msovu.

¹⁵ Akatonga, akakuguranya na mntu mmwe wa lila isanga; uo akamtonja he mghunda wakwe kurisha nguve.

¹⁶ Akadomwadomwa ni mirangi, iti nanga ekuighusha na ala masesa eliwa ni nguve, neri tehena mntu emunkie kintu.

¹⁷ Ekinaganye he ngoro yakwe, akati, ‘Vandima vakwe vava ni vangahi vela kijo na kuimija, nnami aha nifwa nza.

¹⁸ Ninevuka nitonge hakwe vava wangu, nimti: Vava, nateshanya uko wanga na hewe;

¹⁹ tekinifwenye kuitangwa mwanao kangi; unighoshe du sa mmwe wa vandima vako.’

²⁰ Akavuka akatonga he vavee. Ereho cha hae, vavee akamvona, akamsikiwa vwasi, akamsarira, akamshashata, akam’bwita mno.

²¹ Ula mwana akamti, ‘Vava, neteshanye uko wanga na hewe; tekinifwenye kuitangwa mwanao kangi.’

²² Mira vavee akavati vazoro vakwe, ‘Eteni fia suke yedi mumdoke, kangi mumgere mpete he kichaa, na viratu he maghu;

²³ eteni na ndama ila yenorire muikome; na uswi tule na kuizihirwa;

²⁴ ambu uu mwana wangu ekifwie, iki avuka, ekitekie, iki avoneka.’” Vakavoka kubigha mng’aro.

²⁵ Ula mwana m’baha ekiho he mghunda, aho ekiza, ekifika hafuhi na kaa, akasikia maizii a nyimbo na kuvina.

²⁶ Akaitanga mzoro mmwe, akamvwija, ‘Haketa ni aho?’

²⁷ Akati, ‘Mndughu wako aza, na vaveo akamkomia ndama yenorire, ambu amvona wa erewedi.’

²⁸ Akasikia oro, akasua kuingia. Vavee akafuma, akamsembereka.

²⁹ Akamgharusha vavee, akati, ‘Rereha, ni miaka mingahi ii nanakutumikia, neri narini sinakonda iazero lako, mira mi tunaninka neri katangina niizihirwe na vambwie vangu;

³⁰ mira uu mwanao elie vintu vyako hamwe na vareshinda, ekinaze, ye wamkomia ndama yenorire.’

³¹ Akamti, ‘Mwanawa, we misi yose uho hamwe nami, na vyose nena navyo ni vyako.

³² Kangi kitara kuizihirwa na kubigha mng’aro, ambu uu mndughu wako ekifwie, iki avuka; ekitekie, iki avoneka.’”