LUKA 12 - Chasu New Testament 1967

Yesu evachunda varateri vakwe kukurinda he lung’ong’o

¹ Igheri ilo mavungano a viku na viku vakamvungania, mhaka vakatana; akarongavwira varateri vakwe, “Kurindeni na chachu ya Vafarisayo, eyo ling’ong’o.

² Mira tehena kintu chevisike chesikazefunukurwa, neri chevisiwe chesikazemanyika.

³ Huvo, vyose mwetetiie he kija, vinesikiiwa he kianga, na vila mwewewese he isikio la mntu uko he vyumba vya ndeni, vinebirikirwa wanga he nyumba.

Yesu evadindija varateri vakwe

⁴ “Nami nimuvwira unywi vambwie vangu: Musivafoleke avo vekoma mwiri, na vekikenja hesina cho veidima kuronga kukela.

⁵ Mira nimuvonyesha ye mwenemfoleka, Mfolekeni ula eye ekikenja kumkoma mntu, ena nzinya ya kumtagha na he gehena; yee, nimutio: mfolekeni uo.

⁶ Hamao, vuntoronto vusano tevutaghwa kwa senti mbiri? Mira tehena neri kamwe keivawa mozya he Mrungu.

⁷ Mira hata nywii ja mitwi yenyu jetarirwe jose. Heicho ra, musifoleke, unywi mwekelile vutoronto vujinki.

⁸ Nami nimutio, Ye enenizumira he vantu, Mwana wa Mntu naye enemzumira he vamalaika va Mrungu;

⁹ na ula enenikana he vantu, uo enekanwa he vamalaika va Mrungu.

¹⁰ Na mntu enemteta Mwana wa Mntu uvivi, eneshighiwa, mira ye emfalaja Mpeho Wedi, tekashighiwe.

¹¹ Vekinemutonja unywi mozya, musile vwasi na kudunganya viteto vyenyu vuntu mwenegharusha kana kuteta;

¹² ambu Mpeho Wedi saa iyo iyo enemmucheja vyetara kuteta.”

Lukolo na mfwanano wa mzuri erundie

¹³ Mntu mmwe he luvungano akamti, “Mcheji, mvwire mndughu wangu anighavie vupuli vwetu.”

¹⁴ Akamti, “We mntu, ni ani enivikie kuoka mremuchwia kana mghavi wenyu?”

¹⁵ Akavati, “Rerehani, kurindeni he ndambi, ambu nkalamo ya mntu teiho he vujinki vwa vukina vwa mntu ena navwo.”

¹⁶ Akavavwira kisoma, ekiti, “Mghunda wa mntu mmwe mzuri wegerire haiwa;

¹⁷ akavoka kudunganya he ngoro yakwe ekiti, ‘Nikete ze, ambu sina hantu ha kuvika ndungu ya mafindiko angu?

¹⁸ Akati, Nineketa huvu:Ninebaja majumba angu, nijenge angi mabaha kukela, na aho ninevika vijo vyangu vyose na vintu vyangu.

¹⁹ Nekikenja ninekuti: We moo wangu, una vintu vyedi vijinki wekuvikiie ndungu he miaka mingi; hema ra, ule, unwe, uizihirwe.’

²⁰ Mira Mrungu akamti, ‘U kirundu we, kio iki cha yoo veenda ngoro yako, na ivyo wekuimbikie vineoka vyakwe ni?’

²¹ Nivwo vuntu mntu ekuvikia ndungu eikee, ekisakughosha mzuri he Mrungu.”

Mabinuko na kumwitikija Mrungu

²² Akavati varateri vakwe, “Heicho nimutio, musibinukie kukaa na moo kwenyu, Munela ni, neri miri yenyu iti, Munedoka ni.

²³ Ambu kuikaa na moo kwekelile kijo, na mwiri wekelile suke.

²⁴ Dunganyijani he makunguru, iti teehanda neri teefindika; teena gu neri nyumba ja ndungu, na Mrungu eraarera. Unywi mwekelile madeghe kantu kajinki.

²⁵ Ni ani wa henyu, hata ekitakubinusha, eidima kukuongejija vueza vwakwe neri mkono mmwe?

²⁶ Igheri, ukinakiche temuidima kintu kidori, hanini mwekubinusha vuntu vwa vintu vingi?

²⁷ Dunganyani cha virangare vuntu vyeeha tevironga ndima neri tevimiricha; nami nimutio, na ere Salomoni he vwedi vwakwe vwose, tedokiwe nezo sa kimwe cha ivyo.

²⁸ Ukinakiche Mrungu ehamba huvo mani tekamuketie unywi kukela, unywi mu va mwitikijo mdori?

²⁹ Unywi musiende vyo mwenela kana vyo mwenenwa; neri musiweriwerite;

³⁰ ambu ivyo vyose nivyo vyeendwa ni vaisanga va si ii, mira Vava wenyu emanyije iti ivyo muvienda.

³¹ Mira endani vufumwa vwa Mrungu, na ivyo muneongejijwa.

³² “Musifoleke unywi kafio kadori, ambu Vava wenyu evonie iti ni chedi kumuinka vula vufumwa.

³³ Taghani vila mwena, mufunye matasi; kuharehiani mabene esisakaa, ndungu yesiduika uko wanga, hantu hesifika mkea, neri mpeghesa yesikonda.

³⁴ Ambu hantu ndungu yenyu yeho, nireho hantu na ngoro jenyu jeneikaa.

Vurinji vwedi na mfwanano wa mzoro mkitengo

³⁵ “Ikaani mwekuchungie vikwidi, na taa jenyu jekiaka.

³⁶ Na unyi okani sa vantu vewinda mzuri wavo, ekihunduka kufuma he mlondola, nesa ekiza na kukokonta vamjughuie hala indi.

³⁷ Varela vwedi ni vazoro vala mzuri wavo ekiza enevakicha veavije. Kididi nimutio, enekudoka na kuvaikaja si he kula, eneza na kuvapirikia.

³⁸ Ekiza lughojo lwa keri kana lwa katatu, ekiravakicha huvo, vazoro avo ni varela vwedi.

³⁹ Mira manyani kiteto iki, kuti, nanga mwenye nyumba ekimanya saa mkea enezia, ekiyaa kiavi, neri tekishigha nyumba yakwe ibawe.

⁴⁰ Na unywi ikaani mwerekuringanya, ambu saa mwesiirekere, niho Mwana wa Mntu eza.”

⁴¹ Petro akamti, “Mfumwa, kisoma icho utuvwira uswi du, kana ni na vantu vose?”

⁴² Akati, “Ni ani msungaji mkitengo, mkiugho, eye mzuri enemvika he vandima vakwe vose, avainke vantu chala he igheri lekifika?

⁴³ Mrela vwedi ni mzoro ula eye mzuri wakwe ekiza enemkicha ekiratera huvo.

⁴⁴ Kididi nimutio, Enemvika wanga ya vintu vyakwe vyose.

⁴⁵ Mira ula mzoro ekiti uko he ngoro yakwe, ‘Mzuri wangu akaisha,’ akavoka kubigha vazoro vaghinji, va kiume na va kiche, ekila na kunwa na kuengea;

⁴⁶ mzuri wa uo mzoro eneza msi esiurekere, na saa esiimanyije, enemchwa vihindi viri, na kumvika ifungu lakwe hamwe na vala vesiitikije.

⁴⁷ Na mzoro ula emanyije, kikundire cha mzuri wakwe, asikuringanye, neri kuronga kikundire chakwe, enebighwa haiwa.

⁴⁸ Ula seimanyije, naye akaronga vyetara kubighwa, enebighwa hadori. Na ula einkiwe vijinki, heye heneendwa vijinki; na ula evikiiwe mbizyo vintu vijinki, heye uo venemwenda vijinki kukela.

Igheri la maluvengo

⁴⁹ “Nezie kugera mbaghia he si ii, kakicha ra yakenja kuaka, nikini neenda kukela?

⁵⁰ Mira nina m’batizo wenitara kubatizwa, nami nina vwasi sani mhaka ukoloshwe.

⁵¹ Hama mudunganya iti nezie kuete mporere he si ii? Nimutio, Hai, si huvo, esire misopano.

⁵² Ambu kuvokia iki he nyumba mwe heneketa vantu vasano vesopane, vatatu he veri, veri he vatatu.

⁵³ Vava na mwanawe wa kibwange venesakana, na mwana wa kibora na mlala wavo; mkwewe mntu na mkwe, mkwe na mkwewe mntu.”

⁵⁴ Akavwira hata ala mavungano, “Mwekivona ijumbi lekikwea mondo wa kigwaizuva, hala indi muiti, ‘Mvua ineza;’ kioka huvo.

⁵⁵ Nkungu yekifefeta kufuma mondo wa ishi, muti, ‘Heneketa ndughuri;’ na nivwo vuntu cheoka.

⁵⁶ Unywi valung’ong’o, muidima kutwarija fwani ya isanga na uko wanga; cheikee ze ra aha mwesiidima kutwarija magheri sa aa?

⁵⁷ Hanini ra he ngoro jenyu mwesichwa kwa singisirya?

⁵⁸ Ambu wekitonja na mmasa wako kutonga kitala, aho nzieni, kukindije kukundanywa naye, asize kubulula mhaka mozya ya mzalaha; na ula mzalaha akarekuinkija he mikono ya mzarihija, na ula mzarihija akakugera he kichungo.

⁵⁹ Nikutio, Tukahafume neri, mhaka ukenje kuriha ila senti yakenjija.”