LUKA 11 - Chasu New Testament 1967

Uombo wa Mfumwa

¹ Igheri eho hantu hasiku ekiomba, ekinakenje, mmwe he varateri vakwe akamti, “Mfumwa, tucheje na uswi kuomba, sa vuntu Yohane echejije varateri vakwe.”

² Akavati, “Mwekiomba mutio, ‘Vava wetu weho uko wanga! Izina lako lizerijwe, Vufumwa vwako vuze. Kikundire chako kifunyanywe aha he si ii sa uko wanga.

³ Utuinke kijo chetu kila msi.

⁴ Utushighie mabanu etu, ambu na uswi tumshighia kila ye twemwava; kangi usitugere he mighesho, mira tukije he ula mvivi.’”

Kuomba chesihakana na mfwanano wa mmbwie ezie kio ghati

⁵ Akavati, “Ni ani henyu ena mbwiae, enemswia kio ghati, na kumti, ‘Mbwiaa, nihisha rando mikate mitatu,

⁶ ambu mbwiaa aza hangu, efuma he ntambo, nami sina cha kumringanyija.’

⁷ Na ula eho nyumba amgharushe ekiti, ‘Usinirishe vwasi, luvwi lwakenja kufingwa, na uswi twashinjia he kitanda mi na vana vangu; siidima kuvuka nikunke.’

⁸ Nimutio, Na kakicha tekivuka amunke kwa kuti ni mbwiae, mira kila esishigha kumtanja, enevuka na kumunka vuntu eenda.

⁹ Nami nimutio, Ombani, na unywi muneinkwa; endani, na unywi munevona; kokotani, na unywi munejuvuiwa.

¹⁰ Ambu ula eomba eneinkwa; na ye eenda enevona; na ula ekokonta enejuvuiwa.

¹¹ Kana ni ani wa henyu ena vava, mwanawe ekiomba mkate, enemunka ibwe? kana samaki, hantu ha samaki amunke nyoka?

¹² Kana ekimwomba igi amunke kishushe?

¹³ Ikio, kakicha unywi mwe vavivi, mwemanyije kuvainka vana venyu vintu vyedi, hamao, Vava eho uko wanga tekazike mno kuvainka Mpeho Wedi vala vemwomba?”

Yesu ekana iti tekinya mpepo kwa nzinya yakwe Belzebuli

¹⁴ Ekifunya mpepo yesiteta; igheri ila mpepo yekinafume, ula esiteta akateta, mavungano vakamaka.

¹⁵ Vakumwe hevo vakati, “Efunya mpepo kwa Belzebuli m’baha wa mpepo.”

¹⁶ Vangi vakamghesha vekienda luvengo lwefuma uko wanga.

¹⁷ Naye ekimanya madunganyo avo, akavati, “Kila vufumwwa vwekikuomanya vujenye, vukondika; na kila nyumba yekikuomanya yo njenye, igwa.

¹⁸ Heicho, kakicha Shetani ekikuomanya ye mwenye, vufumwa vwakwe vuneimuka ze? Ni hala unywi mweti ai nifunya mpepo kwa Belzebuli.

¹⁹ Kakicha nifunya mpepo kwa Belzebuli, hamao, vana venyu vejifunya nani? Heicho avo nivo vemulaha.

²⁰ Mira kari nifunya mpepo na kichaa cha Mrungu, vufumwa vwa Mrungu vwakenja kumuzia.

²¹ Mntu ena nguju ekudokie mavuta akwe, ekirinda nyumba yakwe, vintu vyyakwe viikaa kwa mporere;

²² mira mntu emkelile nzinya ekimswia na kumzima, emghumba mavuta akwe ose eo ekiavikiie ikuji, na kughavanya mitahe yakwe.

²³ Mntu esiho hamwe nami eniomanya; na mntu esivunganya hamwe nami esakanya.

Mpwasi he miikarire yesikoloke

²⁴ “Mpepo mbivi yekifuma he mntu, ivecha hantu hesina mpombe, yekienda hantu ha kuhema; yekisavona, iti, ‘Ninehunduka nyumba hangu hantu nefumie.’

²⁵ Yekirafika, ikavona iti yahaghiwa na kuhambwa,

²⁶ niho yenetonga kukonga mpepo jingi mfungate, e mbivi kuivecha yo njenye, jiingie na kuikaa aho; na ula mntu miikarire yakwe ya msirikijo, ioka mivivi kuvecha ya kuvoka.”

²⁷ Aho ekiteta viteto ivyo, mche mmwe he lula luvungano akateta na wanga, akamti, “Vwedi ni vwa iyo ndeni yekumoghie, na mavee weaamwie.”

²⁸ Mira ye akati, “Yee, varela vwedi ni vala vesikia kiteto cha Mrungu na kukigurisha.”

Ichundwe iti vasiende luvengo

²⁹ Mavungano vekimvungania, akavoka kuti, “Lukolo ulu ni lukolo luvivi; luenda luvengo, neri lwesikainkwe luvengo, esire luvengo lwakwe Yona.

³⁰ Ambu sa vuntu Yona eokie luvengo he Vaninive, nivwo vuntu Mwana wa Mntu eneoka he lukolo ulu.

³¹ Mfumwa wa kiche wa mondo wa ishi msi wa mchwio wa mburi, eneimuka hamwe na lukolo ulu, enevalaha iti vena nzune; ambu ye ekizie kufuma mginto wa isanga, asikie viugho vyakwe Salomoni, na aha hena m’baha kumkela Salomoni.

³² Msi wa mchwio wa mburi, vantu va Ninive veneimuka hamwe na lukolo ulu, navo veneulaha iti luna nzune, ambu vo vechwie mti kwa kubirikira kwakwe Yona, na aha hena m’baha kumkela Yona.

Mafundisho a taa

³³ “Tehena mntu easha taa na kuivika hantu hevisike, kana ndeni he kizembe; mira eivika wanga he kivandiko, nesa vala veingia vaideme kuvona kianga.

³⁴ Taa ya mwiri ni iziso; heicho, iziso lako ereledi, mwiri wako wose uneangaa, mira lekikondika, mwiri wako nawo uneketa kija.

³⁵ Rereha ra, kianga cheho hewe kisireoka kija.

³⁶ Kakicha kianga chegishije he mwiri wako wose, neri teuna hantu hena kija, mwiri wako uneangaa wose chwe, sa vuntu taa yekuimikia na kinga chayo.”

Yesu ebohia Vafarisayo na varemanya myomongwa

³⁷ Aho echeriteta, Mfaisayo mmwe akamwenda aze hakwe ale kijo; akaingia, akaikaa si kula kijo.

³⁸ Mfarisayo uo ekinamvone, akamaka, ambu terongeoja mikono esinala.

³⁹ Mfumwa akamti, “Unywi Vafaisayo, muoja vikombe na sahani cha nze, mira ndeni henyu mweizue vukibonda na vuvivi.

⁴⁰ Unywi mu virundu, ye eharehe cha nze, sireye eharehe na vya cha ndeni?

⁴¹ Mira, funyani matasi vila vya cha ndeni, aho vyose vioka vyedi he unywi.

⁴² Mirao, vwasi vwenyu Vafarisayo, ambu muinkija matasi a matunduja na mburuja na mabogha ose, mira mishigha vila vya singisirya na lukundo lwa Mrungu; chekimutara kurongaketa ivyo, na kusashigha ivyo vya keri.

⁴³ Vwasi vwenyu Vafarisayo, ambu mukunda kuikaa si ha mozya he masinagogi na kukeziwa he viete.

⁴⁴ Vwasi vwenyu, ambu mwefwanane na mbira jesivoneka, vantu vekivecha wanga hejo vesimanyije.”

⁴⁵ Mntu mmwe he varemanya myomongwa akamgharusha, akamti, “Mcheji, wekiteta huvo utukonda na uswi.”

⁴⁶ Akamti, “Na unywi varemanya myomongwa, vwasi vwenyu, ambu muvatwisha vantu mijigho yesiytikika, mira unywi temukunta iyo mijigho, neri na kichaa chenyu kimwe.

⁴⁷ Vwasi vwenyu, ambu mujenga mbira ja varoti, uko vavava venyu nivo vevakomie.

⁴⁸ Heicho, mutetia ndima ja vavava venyu vuonwa na kujikunda; ambu vo vevakomie, na unywi muvajengia mbira.

⁴⁹ He vuntu vwa icho, kiugho cha Mrungu, chetie, ‘Rereha, ninemtuma havo varoti na ntume, navo venevakoma va kumwe vavo na kuvagharusha.’

⁵⁰ Nesa he lukolo ulu, sakame ya varoti vose ivwijwe, ila yeitike too isanga lekirumbwa;

⁵¹ kuvokia sakame yakwe Abeli mhaka sakame yakwe Zakaria, ekimiiwe ghati ya meza ya mtaso na nyumba ya mtaso. Yee, nimutio, inevwijwa he lukolo ulu.

⁵² Vwasi vwenyu unywi varemanya myongongwa, ambu muvusha ufunguo wa icha; unywi venye temuingie, na vala vekiingia mukavakinda.”

⁵³ Ekifuma aho vaandiki na Vfarisayo vakavoka kumjunguluka uvivi na kumvambijija kwa mavwijo majinki,

⁵⁴ vekimtegha iti vavone kiteto chefuma he momo wakwe.