LUKA 10 - Chasu New Testament 1967

Ndima ya ntume makumi mfungate na kuhunduka kwavo

¹ Niho ivyo vyekivecha, Mfumwa akavatika wa vangi makumi mfungate, akavatuma veri veri, vamrongorire kutonga he kila muzi na kila hantu eenda kutonga ye mwenye.

² Akavati, “Mafindiko ni mangi, mira vandima ni vaghere; mwombeni Mfumwa wa mafindiko atume vandima he mafindiko akwe.

³ Tongani; rerehani, nimutuma sa vugonji ghati he maghinga.

⁴ Musitike ibene neri mkoba, neri viratu; neri musikezye uko nzieni.

⁵ Kila nyumba mweingia, murongeti, ‘Mporere naiikae he nyumba ii;’

⁶ kakicha hena mwana wa mporere ewaho, mporere yenyu inemwikaia; kakicha tehena, mporere yenyu inemuhundukia.

⁷ Ikaani he iyo nyumba mwekila na kunwa vya havo; ambu mndima chemfwenye kuinkwa mhako wakwe. Musisame kufuma he nyumba ii na kutonga he nyumba ingi.

⁸ Na muzi wowose mweneingia, vekimughuhia, lani vijo vila vyevikiwe mozya henyu.

⁹ Banjani vawaji vewaho, vatini, ‘Vufumwa vwa Mrungu vwazengelela he unywi.”

¹⁰ Na muzi wowose mweneingia, vekisamughuhia, fumani aho, na mwekivecha he nzia javo, muti,

¹¹ ‘Hata teri ya muzi wenyu yeho he maghu etu, twaimukukuntia. Mira manyani icho, iti vufumwa vwa Mrungu vwazengelela.’

¹² Nimutio, Ula msi, kineoka kijangu kukela, Sodoma kugumirija mabigho awo, kukela uo muzi.

¹³ “Vwasi vwako Korazini! Vwasi vwako Betsaida! Ambu nanga vila virumo vyeketike henyu vyekiketike uko Tiro na Sidoni, wekikicha vakenja kuchwa mti, na kuikaa si he magunia na maivu.

¹⁴ Mira ula msi wa mchwio kineoka kijangu Tiro na Sidoni kugumurija mabigho awo, kuvecha unywi.

¹⁵ Nawe Kapernaumu, unekwejwa mhaka uko wanga? unesejwa mhaka uko he nkoma.

¹⁶ Ye emusikija unywi, anisikija mi, na ula emusua unywi, anisua mi; na ye enisua mi, amsua ula enitumie.”

¹⁷ Niho vala makumi mfungate vakahunduka na kuizihirwa, vekiti, “Mfumwa, hata mpepo jitisikia he izina lako.”

¹⁸ Akavati, “Nemvonie Shetani ekigwa kufuma uko wanga sa luimiko.

¹⁹ Rereha, namuinka nzinya ya kuvata nyoka na vishushe, na nzinya jose ja ula mnzo, neri tehena kintu chenemukonda.

²⁰ Mira musiizihirwe iti mpepo jimusikia; esire izihirwani iti mazina enyu eandikwe uko wanga.”

Yesu eanjela

²¹ Saa ila ila akang’ara kwa Mpeho Wedi, akati, “Nikuanjela Vava, Mfumwa wa uko wanga na wa ii si, ni kila ivyo wevivisie vala vena viugho na vechee, ukavafunukurira vana vadori; yee Vava, ambu nicho ahekuizihira we.”

²² Akati, “Neinkiwe vyose ni Vava wangu, neri tehena ye emmanya Mwana esire Vava, neri tehena emmanya Vava esire Mwana, na kila ye, Mwana ekunda kumfunukurira.”

²³ Akavagharukia varateri vakwe, akateta navo kimpiso, “Vwedi nivwa meso evona ivyo unywi mwevona.

²⁴ Ambu nimuvwira iti, Varoti vajinki na vafumwa veendie kuvona ivyo unywi mwevona, vasivivone; na kusikia ivyo unywi mwesikia, vasivisikie.”

Cheneshigha tuvone nkalamo va kae na kae

²⁵ Niho mremanya myomongwa mmwe akaimuka iti amgheshe; ekiti, “Mcheji, nikete ze nesa nipale nkalamo ya kae na kae?”

²⁶ Akamti, “He myomongwa heandikwe ni? Wesomie ze?”

²⁷ Akagharusha, akati, “Mkunde Mfumwa Mrungu wako kwa moo wako wose, na kwa ngoro yako yose nakwa nzinya jako jose, na kwa kucha kwako kwose; na mghenji wako sa we mwenye.”

²⁸ Akamti, “Wegharushe nezo; keta huvo, nawe unekalama.”

²⁹ Naye ekienda kukughosha mkitea, akamvwija Yesu, “Mghenji wangu ni uhi?”

Mfwanano wa Msamaria wedi

³⁰ Yesu akamgharusha, akati, “Mntu mmwe ekisea kufuma Yerusalemu kutonga Yeriko, akafumiwa ni vakibonda; vakamhambua suke, vakam’bigha, vakamgera vionda, vakavuka vakatonga, vakamshigha hafuhi kufwa.

³¹ Kwa luhanda, hakasea mtasi mmwe na nzia ila; naye ekinamvone, akavecha kamondo.

³² Mlevi naye nirehuvo, ekinafike hala, akamvona, akavechija mondo.

³³ Mira Msamaria mmwe ekizoka, akafika hala hantu eho; naye ekinamvone, akamsikia vwasi;

³⁴ akamswia, akamchunga vionda vyakwe, akavigera mafuta na mvinyo; akamkweja wanga he njoe yakwe, akamtonja mhaka he nyumba ya vagheni, akam’waja.

³⁵ Hala yavo akafunya dinari mbiri, akamunka ula mwenye nyumba ya vagheni, akati, “Um’waje uu, na chochose wefunya kukela, nekihunduka ninekuiha.

³⁶ We uvona ze, he avo vatatu, ni uhi eokie mghenji wa ula efumiiwe ni vakibonda?”

³⁷ Akati, “Ni ula emvoneie.” Yesu akamti, “Tonga nawe ureketa huvo.”

Marta ne Maria

³⁸ Aho he kutonga kwavo, vakaingia he kamuzi kamwe; mche mmwe izina lakwe Marta akamghuhia he nyumba yakwe.

³⁹ Naye ekina mjinawe eitangwa Maria, ekiikae si he maghu akwe Yesu ekimsikija viteto vyakwe.

⁴⁰ Mira Marta ekipipilika mno; akamswia, akamti, “Mfumwa, tekikushinira, mjinawa ekinishighia nikupipirikie mwenye? Heicho mvwirw anighenje.”

⁴¹ Mfumwa akamgharusha, akamti, “Marta, Marta, ula vwasi na kukubinusha he vuntu vwa vintu vingi;

⁴² mira heendwa kintu kimwe du; Maria esaghure ifungu ledi, elo esikarelighumbwa.”