FILEMONI 1 - Chasu New Testament 1967

Kivokio

¹ Paulo, mnkore wakwe Kristo Yesu, ne Timoteo e mndughu, Hakwe Filemoni mkunde wetu, mndima hamwe na uswi,

² hakwe Afia, mndughu wetu, na hakwe Arkipo msikari mghenji wetu, na kanisa yeho he nyumba yako.

³ Mbonea na mporere vyefuma he Mrungu Vava wetu na he Mfumwa Yesu Kristo, iikae na unywi.

Kuanjela

⁴ Nimwanjela Mrungu wangu misi yose, nekikukumbuka hena maombi angu;

⁵ nekisikia lukundo lwako na mwitikijo wena nawo he Mfumwa Yesu na vala vezerire vose;

⁶ nesa vumwe vwa mwitikijo wako vuronge ndima yakwe, he kiugho cha kila kintu e chedi cheho hetu, he Kristo.

⁷ Ambu nekina kuizihirwa kujinki na kutujwa he vuntu vwa lukundo lwako, ni hala ngoro ja vala vezerire jatundanywa niwe mndughu wangu.

⁸ Heicho, nziaho nina ndekero he Kristo kukuazera chekutara;

⁹ mira he vuntu vwa lulundo nikusemba, ambu ni sa vuntu mi neikee, Paulo ne mghosi, kangi mnkore wakwe Kristo Yesu.

¹⁰ Nikusembisha he vuntu vwa mwanangu Onesimo nemmghiie he vichungo vyangu;

¹¹ eye aho kuvoka esekikuveia mira iki ekuveia hamwe nami;

¹² nemtumie hako ye mwenye, ambu ye ni ngoro yangu;

¹³ ambu mi nekienda aikae hangu; aidime kunihirira hantu hako he vichungo vya Mburi Yedi.

¹⁴ Mira siendie kuronga kintu chochose, esire kwa mburi yako, nesa vwedi vwako vusioke iti wetegurirwa, miraa we etukunda.

¹⁵ Ambu hangi nicho cheshighie akatanywa nawe ikenda idori, nesa uikae wa naye kae na kae;

¹⁶ kuvokia iki si sa mzoro kangi, mira kuvecha mzoro, mndughu mkunde; mi nemkundie mno, mira hewe kukela mno, he kimwiri na he Mfumwa.

¹⁷ Heicho, wekivona iti mi ni mmwe hamwe nawe, mghuhie uu sa mi mwenye.

Lusembo Vuntu vwa mzoro eahie

¹⁸ Kakicha henacho ekukondiie, kana henacho wemwava, ukiniave mi.

¹⁹ Nimi Paulo neandike kwa mkono wangu mwenye, mi nineiha. Sikuvwira iti nikuava ngoro yako.

²⁰ Yee, mndughu wangu, nivone lumazo hako he vuntu vwa Mfumwa; unitundanye ngoro yangu he Kristo.

Msirikijo

²¹ Kila neitikije kusikia kwako, nicho chanishigha nikakuandikia, nekimanya iti uneronga vyekelile ivyo neteta;

²² hamwe na ivyo univikie hantu ha kuikaa; ambu niarira iti he vuntu vwa maombi enyu muneinkwa kunivona.

²³ Epafra, echungiwe hamwe nami he vuntu vwakwe Kristo Yesu, ekukezya;

²⁴ ne Marko, Aristarko, Dema, ne Luka, veronga ndima hamwe nami.

²⁵ Mbonea ya Mfumwa Yesu Kristo na iikae hamwe na mpeho wenyu.