3 YOHANE 1 - Chasu New Testament 1967

¹ Mi Mghosi, hakwe Gayo mkunde, nemukundie he idi.

² Mkunde, nisemba ulojokiwe he vintu vyose, na kubutuma, sa vuntu ngoro yako yelojokiwe.

³ Ambu neizihirwe mno vandughu vakinaze na kutetia idi yako vuonwa, sa vuntu wetongia he idi.

⁴ Tehena cho cheniizihira kukela iki, nekisikia iti vanangu vetongia he idi.

⁵ Mkunde ila ndima ni ya vukitengo wevarongia vala vandughu hata avo vagheni,

⁶ vekutetiie vuonwa vwa lukundo lwako mozya he kanisa; uneronga nezo wekivazosha sa vuntu chetara he Mrungu.

⁷ Ambu he vuntu vwa ilo izina vekifumie vesighuhie neri kintu he Vakiisanga.

⁸ Huvo kitutara kuvaghuhia vantu sa avo, nesa tuoke vandima hamwe na idi.

⁹ Hena kintu neandikie kanisa, mira Dioterefe eye eenda kuoka wa kuvoka havo, tetusikia.

¹⁰ Heicho nekiza ninekumbuka mihiro yakwe ehirire vuntu efunya vurundu he uswi ekituteta uvivi; neri ivyo tevimkoloke, mira ye mwenye tevaghuhia avo vandughu, hata vekunda kuvaghuhia evakinda ekivangasha he kanisa.

¹¹ Mkunde, usiratere vuvivi, mira uratere vwedi. Ula eronga vyedi ni wakwe Mrungu, mira ula eronga vivivi tenamvona Mrungu.

¹² Demetrio etetiiwe vuonwa ni vantu vose, kangi hata ila idi yo njenye. Hata uswi tukonesha huvo, nawe wemanyije iti vuonwa vwetu ni vwa idi.

¹³ Nekina mburi nyingi ja kukuandikia, mira sikunda kukuandikia kwa wino na kalamu.

¹⁴ Mira niarira kukuvona hafuhi, na uswi tunegaya momo kwa momo.

¹⁵ Mporere hewe. Vambwie vetu vekukezya. Vakezye avo vambwie vetu wekilanga mntu na izina lakwe.