2 YOHANE 1 - Chasu New Testament 1967

¹ Mi Mghosi, ha Mlala ngwa esaghurwe na vana vakwe nevakundie he idi; neri simi mwenye mira na vose vemanyije ila idi;

² he vuntu vwa iyo idi yeikaa he uswi, kangi ineikaa na uswi kae na kana kae.

³ Mbonea na mbazi na mporere vyefuma he Mrungu Vava ne Yesu Kristo Mwana wakwe Vava, vineikaa na uswi he idi na lukundo.

⁴ Neizihirwe mno kila nevonie vakumwe he vana vako vetongia he idi, sa vuntu tweinkiwe iazero ni Vava.

⁵ Iki ra, Mcheku, nikusemba, si iti nitakuandikia iazero ishaa, mira nire lila twekirena nalo too kuvoka, iti tukundane.

⁶ Ulu nilo lukundo: Tutongie he kuratera maazero akwe. Ilo nilo iazero sa vuntu mwesikie too kuvoka iti mutongie helo.

⁷ Ambu vazakengera vajinki vavoneka he si ii, vesizumira iti Yesu Kristo ezie he mwiri. Uo niye Mzakengera na Mkinda Kristo.

⁸ Kurereheni venye musizetesha vila twehirire, mira muvone mhako wekoloke.

⁹ Kila mntu evecha kiringanyo ekisadinda hena michejire yakwe Kristo, ye tena Mrungu. Ula edinda he iyo michejire, uo emna Vava na Mwana.

¹⁰ Mntu eneza henyu ekisaete michejire iyo musizemghuhia kaa henyu, neri musizemkezia.

¹¹ Ambu ula emkezya egurana na mihiro yakwe mivivi.

¹² Kila nena mburi nyingi, sienda kujiandika he karatasi na wino; mira niarira kuza henyu, nitete na unywi momo kwa momo, nesa kuizihirwa kwetu kukoloshwe.

¹³ Vana va mjinao esaghurwe vekukezya.